¹ Ia ni sa oji na vika ke au a raicia na agilose e le va eratou sa tu ina tutu i vuravura e va, ka tauria na cagi e va ki vuravura, me reva ni liwa ki vuravura na cagi, se ki na wasawasa, se ki na dua na kau. ² Ia au a raicia e dua tani voki na agilose sa qai mai natuicake, a sa tu vua na vatu ni drega ni koya na Kalou bula; a sa kaci ina domo levu o koya vi iratou na agilose e le va, o iratou sa soli kinia me ratou vacacani vuravura vata ki na wasawasa, ³ ka tukunia, "Tei reva mada ni vacacani vuravura, se na wasawasa, se na kau, ka malua me kitou vola mada na yadredra na tamata ni noda Kalou." ⁴ Au a rogocia na kedrai wiliwili era sa volai: sa le dua na drau ka vasagavulu ka va vokiliga na udolu, sa volai vi ira keceliga na nodra viyavusa na luve i Isireli. ⁵ Vi ira na yavusa i Juta sa volai e le tinikarua na udolu. Vi ira na yavusa i Rupeni sa volai e le tinikarua na udolu. Vi ira na yavusa i Kata sa volai e le tinikarua na udolu. ⁶ Vi ira na yavusa i Aseri sa volai e le tinikarua na udolu. Vi ira na yavusa i Nafitalai sa volai e le tinikarua na udolu. Vi ira na yavusa i Manasa sa volai e le tinikarua na udolu. ⁷ Vi ira na yavusa i Simioni sa volai e le tinikarua na udolu. Vi ira na yavusa i Livai sa volai e le tinikarua na udolu. Vi ira na yavusa i Isaka sa volai e le tinikarua na udolu. ⁸ Vi ira na yavusa i Sepuloni sa volai e le tinikarua na udolu. Vi ira na yavusa i Josefa sa volai e le tinikarua na udolu. Vi ira na yavusa i Penijamini sa volai e le tinikarua na udolu. ⁹ Sa oji ke, au sa varaicia, ka raicia, sa dua nai soqosoqo levu sara, e reva e dua na tamata e wilikia rawa, mai na vivanua kece, vata ki na vimataqali, vata ki na vimatanitu, vata ki na duivosavosa, ra sa tu ina mata ni jikojiko vaturaga, vata ki na mata ni Lami, ra vaisulu i nai sulu vulavula, ka tauria nai viu ina ligadra; ¹⁰ Ra sa kaci ina domo levu, ka tukunia, A vu ni bula na noda Kalou, o koya sa jiko i nai jikojiko vaturaga, vua na Lami vokiliga. ¹¹ O ira keceliga na agilose ra sa tucake tu ka vavolivolijia nai jikojiko vaturaga, vata ki ira na qase vata ki na ka bula e le va, ka cuva vatoboicu ina mata ni jikojiko vaturaga, ka varokoroko vua na Kalou, ¹² ka tukunia, "Emeni! Na vamolimoli, vata ki nai ukuuku, vata ki na vuku, vata ki na vavinavinaka, vata ki na varokoroko, vata ki na kaukauwa, vata ki na qaqa, me nona liga na noda Kalou ka reva ni mudu. Emeni." ¹³ Sa qai vosa e dua na qase, ka tarogi au, "O cei beka o ira ke sa vaisulu i nai sulu vulavula? Ra qai beka maivi?" ¹⁴ Au sa qai tukunia vua, "O iko, saka, o sa kila." A sa tukunia vi au o koya, "O ira ke ra sa qai mai na vivararawataki levu, ia ra sa sava nodra i sulu, ka vavulavulataka ina dra ni Lami. ¹⁵ O koya ra sa jiko kinia ina mata ni jikojiko ni Kalou, ra sa qaravi koya ina siga vata ki na bogi i nona valenilotu; ia na jiko vata ki ira o koya sa jiko i nai jikojiko vaturaga. ¹⁶ Ra na reva voki ni viakana, se viagunu voki; na reva ni kati ira na siga, se dua tani na katakata. ¹⁷ Ni na vakani ira na Lami sa jiko ina loma ni jikojiko vaturaga, ka na tuberi ira ki nai vurevure ni wai bula: ia na tavoya keceliga na Kalou na wai ni mata mai na matadra.