¹ Sa qai soqoni vata vua o ira na Farisi, ki na vunivola eso, era sa qai mai Jerusalemi. ² Ia ni ra sa raicia na nona tisaipeli eso era kana ni sa dukadukali na ligadra, ka ni sa reva ni vuluvulu mada, era sa vakaucacataka. ³ Ia o ira na Farisi, ki ira keceliga na kai Jutia, era sa reva ni kana ni ra sa reva ni vuluvulu vavinaka mada, ni ra sa vabaujia na nodrai vavuvuli na qase. ⁴ Ia ni ra sa lesu voki mai na vivoli, era sa vuluvulu mada, a ra sa qai kana. A sa levu voki na ka tani era sa vabaujia me ra muria, na dere bilo ni gunu, ki na bilo i varau, ki na bilo parasa, ki nai jikojiko. ⁵ Sa qai tarogi koya o ira na Farisi, ki ira na vunivola, Ena cava era sa reva ni muria na nodrai vaavuvuli na qase o ira na nomu tisaipeli, ni ra sa kana ka reva mada ni vuluvulu? ⁶ A sa vosa o koya, ka tukunia vi ira, Sa tukuni ikodou vinaka eliu o Aisea, oi ikodou na dauvivaisini, me va sa volai, O ira na tamata ke, era sa varokorokotaki au ena belenigusudra, Ia na yalodra sa yawa tani vi au; ⁷ A sa reva ni yaga na nodra masuji au, Ni ra sa vatavuvulitakia na vunau ni tamata mei vavuvuli. ⁸ Ni dou sa dainia tani na vunau ni Kalou, ka vabaujia nai vavuvuli ni tamata. ⁹ A sa tukunia vi ira o koya, Sa dina sara ni dou dainia na vunau ni Kalou, mo dou vabaujia na nomudoui vavuvuli. ¹⁰ Ni sa tukunia ko Mosese, Varokoroko vi rau na tamamu ki na jinamu; ia, o koya sa vosavacacatakia na tamana se na jinana, me sa vamatei. ¹¹ Ia dou sa tukunia, Keva sa dua na tamata ena tukunia vi tamana se jinana, Sa Koripani a kenai balebale, Sa tabu me nei koya na Kalou na noqu ka sa yaga vi iko; ¹² dou sa qai tarovia me kakua ni caka e dua na ka me yaga vua na tamana se na jinana: ¹³ dou sa vatawayagatakia kinia na vunau ni Kalou ena nomudoui vavuvuli dou sa dauvatavulica: a sa levu na ka vake dou sa caka. ¹⁴ Ia ni sa kacivi ira keceliga mai na lewe levu o koya, sa tukunia vi ira, Dou rogoci au oi ikodou keceliga, ka mo dou kila: ¹⁵ Sa reva na ka e taudaku ni tamata, ni sa curumia sa vadukadukalitakia rawa; ia na veika sa curu yani mai vua, gona liga sa vadukadukalitakia na tamata. ¹⁶ Keva e dua na tamata sa vadaligana me rogocia, me mani rogocia sara. ¹⁷ Ia ni sa daini ira na lewe levu o koya, ka curu ki vale, sa tarogi koya o ira na nona tisaipeli ena vuku ni vosa vatautauvata. ¹⁸ A sa tukunia vi ira o koya, Oi ikodou talega, dou sa reva ni kila rawa k, ne? Dou sa reva beka ni kila, na ka keceliga etaudaku sa curumia na tamata, sa reva ni vadukadukalitakia rawa; ¹⁹ ni sa reva ni curu djina ki na yalona, ki ketena waleliga, a sa qai qai tani ki nai benubenu, a sa caka kinia me savasava na kakana keceliga? ²⁰ Sa tukunia vokiliga o koya, A ka sa curu yani mai na tamata, gona liga sa vadukadukalitakia na tamata. ²¹ Ni sa curu yani mai loma, mai na yalodra na tamata, na nanumia ca, na dauyalewa, na daudara, na daulaba, ²² na daubutako, na daukocokoco, nai valavala ca, na dauvivaisini, na daugagano, na mata ca, na vosa vacaca, na viavialevu, na lialia: ²³ a ka ca keceliga ke sa curu yani mai loma, a sa vadukadukalitakia na tamata. ²⁴ Sa qai cavu tu o koya, ka qai tani maikeri va ki na viyasana i Taia ki Saitoni, a sa curu ki na dua na vale, ka reva ni vinakajia me dua na tamata me kila: ia e reva ni vuni rawa o koya. ²⁵ Ni sa dua na yalewa ka curumia na luvena sa goneyalewa e dua na yalo velavela, sa rogocia na kenai tukutuku, a sa qai mai ka cuva ki na yavana: ²⁶ a yalewa mai na dua na matanitu tani, a yalewa ni Sairo-finisia; a sa masuji koya me vaseva tani na tevoro mai na luvena-yalewa. ²⁷ A sa tukunia vua o Jisu, Me ra mamau mada o ira na gone; ni sa reva ni vinaka me kau na kedra na gone, ka dainia vi ira na koli. ²⁸ A sa vosa na yalewa, ka tukunia vua, E dina liga, Turaga; ia o ira na koli e ruku ni tepeli era kania na meme ni kedra na gone. ²⁹ Sa qai tukunia vua o koya, ena vuku ni vosa ke, mo qai liga; sa qai tani mai na luvemu-yalewa na tevoro. ³⁰ Ia ni sa yaco ki nona vale, sa raicia ni sa qai tani na tevoro, a sa davo e nai mocemoce na luvena-yalewa. ³¹ A sa lesu voki o koya mai na viyasana i Taia ki Saitoni, a sa qai e loma ni vanua va-Tikapoli, ki na wai mai Kalili. ³² A ra sa yadjia mai vi koya e dua sa djidjivara, a sa kaka; a ra sa masuji koya me tabakia ena ligana. ³³ A sa yadji koya vajikijiki maivi ira na lewe levu, a sa daramakia na nonai qaqalo ki na daligana ruarua ni tamata, ka kasu, ka tara na yamena; ³⁴ 34sa qai ta cake ki lomalagi, ka vutugu, ka tukunia vua, Efaca, a kenai balebale, Mo rogo mada. ³⁵ A sa qai rogo na daligana ruarua, a sa sereki na wa ni yamena, ka sa vosa macala mai. ³⁶ Sa qai varojia vi ira ko koya, me ra kakua ni tukunia vua e dua na tamata: ia ni sa varojia valevu vi ira o koya, era sa dautukunia valevu sara kinia; ³⁷ ka sa kurabui valevu sara o ira, ka tukunia, Sa caka vavinaka na ka keceliga o koya; sa cakaji ira na djidjivara me ra rogo, ki ira vokiliga na galu me ra vosa.