¹ Ra sa mani yaco yani i na tai ni drano kadua, i na nodra vanua na kai Katara. ² Ia ni sa sobu yani i vanua o Jisu, sa sota kaya sara i dua na tamata ka curumi koya jiko e dua na yalo velavela, sa qai mai na i bulubulu ³ na vanua e dau jiko voli kinia. E reva ni dua na tamata e vesukia rawa; na sinucodo mada liga qai reva ni yaga. ⁴ Sa dau vesu wasoma o koya ena i vesu ni yava vataki na sinucodo, ia e qai dau gutugutulakia na sinucodo ka drutidrutilaka na i vesu ni yava, ka reva ni bau dua e tarovi koya rawa. ⁵ Sa dau qoqolou voli ena bogi vataki na siga ena viulunivanua vataki na i bulubulu, ka sa tavatavalakia na yagona ena vatu. ⁶ Sa tu mai vayawa o koya ena gauna sa raici Jisu kinia; ka sa qai cici yani, ka tekiduru e matana, ⁷ ka sa kaci ena domo levu, “I Jisu, na Luve ni Kalou Cecere sara! A cava o nu sa vinakatakia vi au? Au sa kerei ikonu ena yaca ni Kalou, ni kakua ni vararawataki au!” ⁸ (A sa tukunia vake balejia ni sa tukunia oji vua o Jisu, “Yalo velavela, mo qai ⁸tani mai vua na tamata ke”) ⁹ Sa qai tarogia o Jisu, “O cei na yacamu?” E a saumia o koya ka tukunia, “Na yacaqu o ‘Vavakoso’, ni kimamu sa lewe levu!” ¹⁰ Sa qai vamasuji Jisu vagumatua o koya me kua ni vatalai ira tani na yalo velavela mai na vanua o ya. ¹¹ Ra a kakana voli ena yasa ni delana sa voleka e kea e dua na qele ni vuaka levu. ¹² Era sa qai vamasuji Jisu na yalo velavela, ka tukunia, “Ni vatalai kimamu vi ira na vuaka, me kimamu curumi ira.” ¹³ Sa mani laivi ira ko Jisu me ra qai, ka ra sa qai yani na yalo velavela ka curumi ira na vuaka. Era sa qai ciciva sobu na baba ena yasa ni drano o ira na vuaka ka lutu kece ki na loma ni drano ka luvu kece sara liga. E raujia jiko ni 2,000 na kedra levu. ¹⁴ Ra sa qai dro na kedra i vatawa, ka la'ki tukunia na kena i tukutuku ki na koro, ki na vivanua era volekatia. Ra sa qai na tamata, me ra la'ki raicia na ka sa yaco e kea. ¹⁵ Ra sa qai vi Jisu, ka raici koya ka a curumia tu e levu na yalo velavela ni sa dabe jiko e kea, sa vaisulu tu, ka sa tu vinaka na nona vakasama; ka ra sa rere sara. ¹⁶ Era sa qai tukunia vi ira na qai yani o ira ka a raicia na ka a yaco vua ka curumi tevoro ki na ka e baleji ira na vuaka. ¹⁷ Ra sa mani kerei Jisu me qai tani mai na nodra vanua. ¹⁸ Ia ena gauna sa vodo kinia ki waqa o Jisu, a sa qai kerei koya na tamata ka a curumi yalo velavela, ka tukunia, “Au kerea me'u qai vata yani ki ikonu!” ¹⁹ Ia, a sa reva ni vadonuya o Jisu. Sa qai tukunia liga vua, “Mo lesu voki ki na nomu vale vi ira na wekamu, ka tukunia vi ira na levu ni ka sa caka vi iko na Turaga, ki na levu ni nona yalololoma vi iko.” ²⁰ Sa mani qai yani na tamata o ya ka tekivu vacurumia yani na Koro e jini, ka tukunia voli na vika sa caka vua o Jisu. Ra sa qoroqoro na tamata keceliga ra sa rogocia. ²¹ A sa lesu voki o Jisu ena waqa ki tai kadua ni drano. Era sa soqoni vata yani vua na lewe levu ena bati ni drano. ²² Sa qai qai yani vua o Jairo, e dua na i valesilesi ni valenilotu. Ni sa raici Jisu, sa qai bale sobu ki yavana ²³ ka vamasuji koya vabibi, ka tukunia, “Na luvequ yalewa lailai sa tauvimate levu sara. Au kerea mo ni qai mada mai ka tabakia ena ligamunu ,me sereki tani kinia na nona tauvimate, ka bula!” ²⁴ 24E rau sa mani qai vata yani kei Jisu. Era sa salavata ki Jisu e lewe levu sara na tamata, ka ra sa vidrigidrigi kaya mai na viyasana keceliga. ²⁵ E jiko ena kedra maliwa e dua na yalewa, sa turudrabalavu ka sa yabaki jinikarua na kena dede. ²⁶ Sa lewe levu na vuniwai era sa qaravi koya oji ka sa vayalia kinia na nona i yau, ia sa reva ni vinaka cake kinia na nona bula, ka sa toro sobu jikoliga. ²⁷ A sa rogocia o koya na i tukutuku me baleti Jisu, ka sa qai qai mai kinia e tovuna ena kedra maliwa na lewe levu, ka tara na nona i sulu, ²⁸ ni sa kaya e lomana o koya, “Kevaka waleliga au tara na nona i sulu, au na bula.” ²⁹ A sa tara na i sulu i Jisu, ka sa mudu sara vasauri na kena qai jiko na dra; ka sa kila sara e yagona ni sa vabulai mai na mate ca o ya. ³⁰ I na gauna vata o ya, sa kila e lomana o Jisu ni sa qai tani mai vua na kaukauwa, a sa qai vuki vi ira na lewe levu, ka tukunia, “O cei e tara na noqu i sulu?” ³¹ E ratou sa qai tukunia vua na nona tisaipeli, “O ni sa raicia na nodra vidrigidrigi kei ikonu na tamata, a cava o ni qai tarogia voki kinia se o cei e tarai ikonu ?” ³² Ia sa viraiyaki voliliga o Jisu me raici koya ka a caka na ka o ya. ³³ Ia na yalewa, ni sa kila na ka sa yacovi koya, sa qai qai mai, ka sa sautaninini ena levu ni rere, ka bale sobu ki na yava i Jisu, ka tukunia vua na kena dina taucoko. ³⁴ Sa qai tukunia vua o Jisu, “Na luvequ, sa vabulai iko na nomu vabaujia. Mo qai ena vacegu ka sereki mai na nomu leqa.” ³⁵ Ia ni sa vosa jikoliga o Jisu era sa qai mai eso mai na vale ni vailesilesi ni valenilotu, ka kaya, “Sa mate na luvemu; kua ni vaoga voki na i Vavuvuli.” ³⁶ Ia ni sa rogocia o Jisu na vosa era tukunia, sa tukunia sara vua na turaga ni vale ni lotu, Kakua ni yalo lailai, vadinajia liga. ³⁷ A sa reva ni laiva e dua me muri koya, o iratou liga o Pita, ki Jemesa, ki Joni na taci i Jemesa. ³⁸ A sa yaco o koya ki na vale ni turaga ni vale ni lotu, a sa raicia na nodra tagiyaso, era sa tagi ka qoqolou valevu. ³⁹ Ia ni sa curu yani o koya, sa tukunia sara vi ira, “Na cava o ni sa mamaue ka tagi jiko kinia? E reva ni mate na goneyalewa gona, e moce jikoliga!” ⁴⁰ Era sa qai dredrevaki koya, ka sa qai vatalai ira kece kinia ki tautuba o koya. A sa yadji rau liga na i tubutubu ni gone vataki iratou na nona jisaipeli e tolu ka ratou curu ki na rumu sa davo koto kinia na gone. ⁴¹ Sa qai tauria na ligana, ka tukunia vua, “Talica, kumi!” (A kena i balebale, “Goneyalewa lailai, au sa tukunia vi iko mo tucake mai!”) ⁴² Ena gauna vata gona, a tucake sara kinia na goneyalewa ka tekivu viqaiyaki. (Sa yabaki tinikarua o koya.) Ni sa yaco na ka ke, era sa kurabui valevu sara kinia. ⁴³ Ia sa varoti ratou matua ko Jisu me ratou kua sara ni tukunia voki vua e dua na vika sa yaco, ka sa qai tukunia, “Dou solia vua e dua na ka me kania.”