¹ A sa curu voki o koya ki na vale ni lotu; a sa jiko kinia i dua na tamata sa malai na ligana. ² A ra sa varaici koya, se na vabulai koya i na siga ni vacecegu, se reva; me ra qai beitaki koya. ³ Sa qai tukunia o koya vua na tamata sa malai na ligana, Tucake mai. ⁴ A sa tarogi ira, Sa tara beka me caka na ka vinaka i na siga ni vacecegu, se me caka na ka ca? me ia na vivabulai, se na vivamatei? A ra sa galu liga. ⁵ Ia ni sa rai voli vacudrucudru vi ira o koya, ni sa rarawa na lomana ena vuku ni kaukauwa ni yalodra, sa tukunia vua na tamata, Dodoka mai na ligamu. A sa dodoka yani: a sa vabulai na ligana ka yaco me va na ligana kadua. ⁶ A ra sa qai yani na Farisi, ka bosei koya sara o ira vata ki ira nai tokani i Eroti, se ra na vamatei koya vaevei. ⁷ A sa qai tani o Jisu va ki wai ki ira vata kaya na nona tisaipeli: a ra sa lewe levu sara sa muri koya mai Kalili, ki Jutia, ⁸ mai Jerusalemi vokiliga, ki Itumia, ki na tai kadua ni Joritani; o ira vokiliga i na viyasana i Taia kei Saitoni, era lewe levu sara, ni ra sa rogocia na levu ni vika sa caka o koya, era sa qai mai vi koya. ⁹ A sa tukunia o koya vi ira na nona tisaipeli, me toka i dua na waqa lailai o koya i na vukudra na lewe vuqa, de ra drigiji koya. ¹⁰ Ni ra sa lewe levu sa vabula o koya; a ra sa drigiji koya kinia me ra tarai koya, o ira keceliga era sa tauvimate. ¹¹ O ira voki liga na yalo velavela, ni ra sa raici koya, era sa cuva sobu i matana, a ra sa qoqolou, ka tukunia, O iko na Luve ni Kalou. ¹² A sa varota matua vi ira o koya, me ra kakua ni tukuni koya. ¹³ A sa cabe i na ulu-ni-vanua, ka kacivi ira mai sa djigitakia: a ra sa qai mai vua. ¹⁴ A ra sa lewe tinikarua sa lesia o koya, me ra jiko vata kaya, ka me vatalai ira o koya me ra vunau, ¹⁵ me tu voki liga vi ira na kaukauwa me ra vasevi ira na tevoro: ¹⁶ A sa vayacani Saimoni o koya me o Pita: ¹⁷ ki Jemesa na luve i Sepete, ki Joni na taci i Jemesa, a sa vayacani rau o koya mei Poanaji, i kenai balebale, A luve ni kurukuru: ¹⁸ ki Adriu, ki Filipi, ki Pacolomiu, ki Maciu, ki Tomasi, ki Jemesa na luve i Alifio, ki Cateo, ki Saimoni i dua vi ira sa vatokai Na gumatua, ¹⁹ ki Jutasa Isikarioti, o koya sa soli koya yani. A sa curu o koya ki na dua na vale. ²⁰ A ra sa lewe levu sa soqoni vata voki, a ra sa reva kinia ni kania rawa na kedra. ²¹ Ia ni ratou sa rogocia ko iratou na wekana, eratou sa qai mai me ratou tauri koya: ni ratou sa tukunia, Sa lialia o koya. ²² Ia o ira na vunivola ka qai sobu mai Jerusalemi, era sa tukunia, Sa jiko vua o Pielisipupi, a sa vasevi ira na tevoro i na kaukauwa ni nodra turaga na tevoro. ²³ A sa kacivi ira mai o koya, ka tukunia vi ira i na vosa vatautauvata, E rawajia vaevei ko Setani me vasevi Setani? ²⁴ Ia kevaka sa dua na matanitu sa visei vai koya, ena reva ni tu dei rawa na matanitu o ya: ²⁵ ia kevaka sa dua na vale sa visei vai koya, ena reva ni tu dei rawa na vale ko ya. ²⁶ Ia kevaka sa ia ko Setani me vivala vai koya, ka visei, ena reva ni tu dei rawa, ena oji liga. ²⁷ Sa reva na tamata me curumia rawa na vale ni qaqa, ka kovea na nonai yaya, keva sa reva mada ni vesukia na qaqa, ena qai kovea imuri na nonai yau. ²⁸ Au sa tukunia vaidina vi ikodou, Sa rawa me bokoci laivi na nodrai valavala ca keceliga na luve ni tamata, ki na nodra vosa ca keceliga era sa vosavacacatakia kinia na Kalou: ²⁹ ia o koya sa vosavacacatakia na Yalo Tabu ena reva jikoliga ni bokoci na nonai valavala ca, ia sa tu vua na nona cala ka reva ni mudu: ³⁰ ni ra tukunia, Sa dua na yalo velavela sa jiko vua. ³¹ Sa qai mai o iratou na tinana, ki na tacina, a ratou sa tu e tuba, ka talaki vua me qai mai. ³² ia era sa lewe levu sa jiko vavolivolijia; ka ra sa tukunia vua, Raicia, na tinamu ki iratou na tacimu eratou sa tu e tuba, eratou mai qarai iko. ³³ A sa vosa vi ira, ka tukunia, O cei na jinaqu se ko iratou na taciqu? ³⁴ A sa varaici ira era sa jiko vavolivoliti koya, ka tukunia, Raicia na jinaqu ki ira na taciqu! ³⁵ o koya yadua ena muria na loma ni Kalou, sai koya ke na taciqu, se na ganequ, se na tinaqu.