¹ I na savulaci ra sa qai bose vata o ira na bete levu vata ki ira na matua vata ki ira na vunivola vata ki ira kece na matavilewai, sa vesuki Jisu, ka yadjia tani, sa solia vi Pailato. ² Sa tarogi koya o Pailato, o sa nodra Tui na kai Jutia, se reva? Sa vosa o koya, ka tukunia vua, o sa tukunia djina mai. ³ A sa levu na ka ra sa beitaki koya kinia o ira na bete levu. ⁴ Sa qai tarogi koya voki o Pailato, ka tukunia, o sa reva ni tukunia e dua na ka ne? raicia na kena levu ni ka ra sa beitakia vi iko. ⁵ Sa reva na ka sa tukunia o Jisu; sa kurabui kinia o Pailato. ⁶ Sa dau nonai valavala i na solevu gona me serekia vi ira e dua na tamata vesu, o koya ra sa djigitakia. ⁷ Sa jiko e dua, na yacana o Parapa, sa vesuki vata ki ira eso na tamata ra sa ue, ka laba kinia. ⁸ Ra sa kaci jiko na lewe levu, ka vamasuta me caka vi ira me va sa dau nonai valavala. ⁹ Sa vosa vi ira o Pailato, ka tukunia, Dou sa vinakatakia meu serekia vi ikodou na nodra Tui na kai Jutia, se reva? ¹⁰ ni sa kila o koya ra sa soli koya yani o ira na bete levu ni ra sa vuvutakia. ¹¹ Ra sa vauqeti ira na lewe levu o ira na bete levu, me sereki Parapa liga vi ira o koya. ¹² Sa qai vosa ko Pailato, ka tukunia voki vi ira, A cava dou sa qai vinakajia meu caka vua dou sa vatoka me nodra Tui na kai Jutia? ¹³ A ra sa qoqolou voki, Vakojia ki na kauveilatai. ¹⁴ Sa qai tukunia vi ira o Pailato, na cava na ka ca sa caka o koya? Ra sa qai qoqolou valevu cake, Vakojia i na kauveilatai. ¹⁵ Ni sa vinakatakia o Pailato me valomavinakataki ira na lewe levu, sa sereki Parapa vi ira, sa soli Jisu yani, ni sa vakanakuitatakia mada eliu, me vakoji i na kauveilatai. ¹⁶ Ra sa yadjia tani o ira na sotia i na yasana ni vale ni turaga, sa vasoqoni ira vata na mata sotia taucoko. ¹⁷ Ra sa vasulumi koya i nai sulu lokaloka, ra sa talia e dua nai sala i na viwa-vavotona, ka vaisalataki koya kinia. ¹⁸ Ra sa vatekivu me kidavakia, Sa loloma, na nodra Tui na kai Jutia! ¹⁹ Ra sa warolakia na uluna i na dua na dravo, ra sa kasuvia, ka tekiduru ka varokoroko vua. ²⁰ Ni ra sa valialia oji, ra sa luvajia vua nai sulu lokaloka, ka vasulumia i na nonai sulu djina, ra yadjia yani me ra vakojia i na kauveilatai. ²¹ Sa dua na kai Kirini, o Saimoni, a tamadrau o Alekisada vata ki Rufo, o koya sa qai tu, ni sa qai jiko mai vanua, ra sa vasaurarataki koya me colajia na nona kauveilatai. ²² Ra sa yadji koya i na dua na yasana, o Kolikoca, a kenai balebale, na vanua ni qavokavoka. ²³ Ra sa solia vua na waini sa viwaki vata ki na mura me somia; sa reva ni somia o koya. ²⁴ Ni ra vakojia i na kauveilatai, ra sa qai vota na nona visulu, ni ra vawiri madigi, me ra dui kila nodrai votavota. ²⁵ Sa kenai katolu ni aua, ni ra sa vakojia i na kauveilatai. ²⁶ Sa volai e colo na ka sa beitaki vua: A NODRA TUI NA KAI JUTIA. ²⁷ Ra sa vakojia vata kaya i na kauveilatai e le rua na daubutako; e dua i na ligana i matau, ka dua i na ligana i mawi. ²⁸ Sa vayacori kinia nai Vola Tabu, sa tukunia, Sa wili vata ki ira na tamatai valavala ca o koya. ²⁹ O ira sa qai voli, ra sa vosavakacacatakia , ni ra sa kuretakia na uludra, ka tukunia, Drasa, ko iko sa basukia na vale ni soro, ka tara i na bogi e tolu, ³⁰ vabulai iko mada, ka kevu sobu mai na kauveilatai. ³¹ Sa va kinia o ira na bete levu, ra sa valialia vai ira, vata ki ira vokiliga na vunivola, ra tukunia, O koya sa dauvabulai ira na tani; sa reva ni vabulai koya rawa: ³² me kevu sobu nikua mai na kauveilatai na Karisito na nodra Tui na Isireli, me kimamu raicia ka vabaujia. O rau vokiliga ratou a vakoji vata kaya i na kauveilatai, rau sa valialiai koya. ³³ Ni sa yaco nai kaono ni aua, sa butobuto na vanua taucoko, ka yacovia nai kaciwa ni aua. ³⁴ I nai kaciwa ni aua sa kaci o Jisu i na domo levu, ka tukunia, Ilai, Ilai, lama sapakicani? a kenai balebale, Noqu Kalou, Noqu Kalou, ko sa daini au i na vuku ni cava? ³⁵ E so vi ira sa tu voleka, ni ra sa rogocia, ra sa tukunia, Raicia, sa kacivi Ilaija o koya. ³⁶ Sa cici e dua, ka tonisua e dua na vutovuto i na wai wiwi, ka vivia i na dua na dravo, a sa vasomi koya, ka tukunia, dainia mada; me da raicia se na qai mai o Ilaija me kevutaki koya sobu mai, se reva ³⁷ O Jisu, ni sa kaci i na domo levu, sa qai ciba yani. ³⁸ Sa sei rua nai laji ni vale ni soro mai na jikinia e colo ka yadjia i ra. ³⁹ Ni sa raicia na turaga ni valu, o koya sa tu voleka ka donui koya, ni sa kaci vake o koya, ka qai ciba yani, sa tukunia, E djina liga sa Luve ni Kalou na tamata ke. ⁴⁰ Eso vokiliga na yalewa ra sa varaicia vayawa; e dua vi ira ko Meri na yalewa ni Makitala, vata ki Meri na jinadrau o Jemesa ka gone vata ki Josese, ko Salomi vokiliga; ⁴¹ ratou a daumuria, ka dauqaravia, ni sa jiko mai Kalili o koya; vata ki ira vokiliga na yalewa e le levu ra sa qai vata kaya i Jerusalemi. ⁴² Ni sa reavi mai, ni sa siga varau, na siga sa taravia na Siga ni Vakacecegu, ⁴³ sa qai mai o Josefa, na kai Arimacea, na matanivanua, sa dua vi ira na matavilewai, sa warakia na kena yaco na matanitu ni Kalou, sa qai doudou vi Pailato, ka kerea na yago i Jisu. ⁴⁴ Sa reucala o Pailato ni sa mate o koya; sa kaciva na turaga ni valu, ka tarogia se sa mate vadede o koya, se reva? ⁴⁵ Ni sa kila vua na turaga ni valu, sa solia na yagona vi Josefa: ⁴⁶ sa volia o koya e dua nai sole lineni, sa kevutaki koya sobu, ka solegia kinia, sa vadavoria i na dua nai bulubulu sa ta i na vatu; sa vaqiqicia e dua na vatu i na darava ni bulubulu. ⁴⁷ Rau sa raicia na yasana sa vadavori kinia o koya, o rau o Meri na yalewa ni Makitala vata ki Meri na tina i Josese.