¹ Ni sa qai tani o koya i na vale ni soro, sa tukunia vua e dua vi ira na nona tisaipeli, vavuvuli, raicia, na kenai rairai ni vivatu, vata na vivale ke! ² Sa vosa o Jisu, me tukunia vua, O sa raicia na vivale lelevu ke? ena reva ni vo e dua na vatu me vitaqataqai, ena talaraki sobu keceliga. ³ Ni sa jiko o koya mai na ulu-ni-vanua ni violive sa donuya na vale ni soro, ratou sa tarogi koya lo o Pita vata ki Jemesa vata ki Joni ki Adriu vokilga, ⁴ 4Mo nu tukunia mai vi keitou, se na yaco ninaica na vika ke; ka cava na kenai vatakilakila ni sa voleka ni yaco na ka keceliga ke. ⁵ Sa qai vosa vi iratou o Jisu, ka tukunia, Raicia vinaka de vacalai ikodou e dua: ⁶ Era le levu ena qai mai ka vacavutaki au, me ra tukunia, Sai au; ia ka le levu ra na vacala. ⁷ Ni dou na rogocia nai valu, vata nai rogorogo ni valu, dou kua ni kidroa; ni sa kilikili me yaco; ia sa bera liga nai vataotioti. ⁸ Ni ra na vibolebolei na vivanua eso, vata na vimatanitu eso; ena tavuki na vanua i na viyasana e levu, ena yaco vokiliga na dausiga: ke nai vatekivu liga ni ka rarawa. ⁹ Dou qarauni ikodou vinaka: ni dou na soli yani i na matavilewai, dou na vakanakuitataki i na vivale ni lotu: dou na yadji vokiliga i na matadra na kovana, vata na tui, i na vukuqu, mei vadjinadjina vi ira. ¹⁰ Ena vunautaki dina mada iliu nai tukutuku-vinaka i na vivanua keceliga. ¹¹ Ni dou sa yadji yani, ka soli me lewai, dou kua mada ni lomaocaoca se cava mo dou tukunia, dou kua vokilga ni vanananu iliu; na ka keceliga ena soli vi ikodou i na tiki-ni-siga gona, sai koya liga mo dou vosatakia: ni dou sa reva ni vosa o ikodou, sa vosa liga na Yalo Tabu. ¹² Era na dui soli ira yani na vitacini me vamatei, vata na tama ni gone ena solia na luvena; era na tu cake na gone vi ira na nodra qase, ka vavunia na nodra mate. ¹³ Era na cati ikodou o ira na tamata keceliga i na vuku ni yacaqu; o koya ena vosojia me yacovia nai vataojioji, ena vabulai o koya. ¹⁴ Ni dou sa raicia i na yasana sa tabu ni tu kinia na ka vasisila sa dauvivarusai, o koya sa vosa kinia o Taniela na parofita, (me kila o koya sa wilikia,) me qai dro i na viulu-ni-vanua o ira ra sa jiko i Jutia; ¹⁵ 15 me kua ni qai sobu i vale o koya sa jiko i delana, se curu kinia, me yadjia tani e dua na ka mai na nona vale; ¹⁶ me kua ni lesu voki o koya sa jiko i na were, me yadjia na nonai sulu. ¹⁷ Ka na ca vi ira sa bukete, vata ki ira era sa vasucumia na gone, i na gauna gona! ¹⁸ Dou masu me kua ni yaco na nomudou dro i na vula i liliwa. ¹⁹ Ni na yaco na ka rarawa i na gauna gona; sa reva ni vakinia mai nai vatekivu ni nona buli ka na Kalou ka yacovia na siga ke, ka na reva vokiliga imuri. ²⁰ Keva sa reva ni valekalekatakia na gauna gona na Turaga, sa reva na tamata me bula rawa: i na vukudra na djigitaki, o ira sa djigitakia o koya, sa valekalekatakia o koya na gauna gona. ²¹ Keva ena qai tukunia vi ikodou e dua, Raicia, eke na Karisito; se, Raicia, mai vanua gona; kua ni djinajia: ²² ni na tubu mai na Karisito vailasu eso, vata ki na parofita vailasu eso, ra na vatakila mai na vivatakilakila vata ki na vika e vivakurabuitaki, me vacalai ira kinia na djigitaki, keva e rawa. ²³ Dou qarauni ikodou vinaka: raicia, au sa tukuna eliu vi ikodou na ka keceliga. ²⁴ I na gauna gona, ni sa oji mada na ka rarawa gona, ena qai vabutobutotakia na mata-ni-siga; ena reva vokilga ni cila na rarama ni vula; ²⁵ ka na lutu mai na vikalokalo ni lomalagi, ka na vitosoyaki na vika kaukauwa ni lomalagi: ²⁶ ra na qai raicia na Luve ni tamata ni sa qai mai i na veio, i na kaukauwa levu vata nai ukuuku. ²⁷ Ena qai talai ira na nona agilose o koya, ka vasoqoni ira vata na nona djigitaki mai na mata ni cagi e va, mai nai yalayala ki vuravura vata nai yalayala ki lomalagi. ²⁸ Mo dou kila mada na vosa vatautauvata ni lolo; Ni sa qai lavovou na tabana, sa tubu na drauna, dou sa kila sa voleka na vula i katakata: ²⁹ me va vokiliga kinia oi ikodou, ni dou sa raicia sa yaco na vika ke, dou kila sa voleka o koya, io mai darava. ³⁰ Au sa tukunia vaidjina vi ikodou, Ena reva ni takali nai tabatamata ke, ena yaco mada eliu na ka keceliga ke. ³¹ Ena takali o lomalagi vata ki vuravura; ia na noqu vosa ena reva ni takali. ³² I na siga gona vata na jiki-ni-siga gona sa reva e dua e kila, o ira na agilose mai lomalagi e reva, se na Luvena, na Tamaqu dualaliga. ³³ Dou qarauni ikodou vinaka; dou vatawa, ka masu: ni dou sa reva ni kila na kena siga. ³⁴ 34Sa va e dua na tamata e qai ki na vanua tani, o koya sa dainia na nona vale, a sa lesia vi ira na nona tamata me ra lewa, ka lesia vi ira yadua na nodra cakacaka, a sa tukunia vokiliga vua nai vatawa me vatawa jiko. ³⁵ O koya mo dou qai vatawa: ni dou sa reva ni kila na jiki-ni-siga ena qai mai kinia nai taukei ni vale; se ni sa reavi, se ni sa lomaloma-ni-bogi, se ni sa tagi na toa, se ni savulaci; ³⁶ de qai vasauri mai, ka kunei ikodou ni dou sa moce liga: ³⁷ na ka au ma tukunia vi ikodou, au ma tukunia vi ira keceliga, Dou vatawa.