¹ Ni ra sa qai volekaji Jerusalemi, ka yaco i Pecifaki, i na ulunivanua ni violive, sa tala e le rua na tisaipeli o Jisu, ² ka tukunia vi rau, "Drau qai i na koro lailai sa donui kodrau, drau na raicia sara e dua na asa sa vesu tu, sa tu vata na luvena; drau serekia ka yadjia mai vi au; ³ ke dua sa vosa kinia vi kodrau, drau tukunia, sa yaga vua na Turaga; na qai solia sara kinia o koya. ⁴ Sa caka ke me vayacori kinia na vosa sa tukunia na parofita, ⁵ "Tukunia vua sa jiko mai Saioni, Raicia, sa qai mai vi iko na nomu Tui, sa yalomalua, sa vodokia e dua na asa vata ki na dua na luve ni asa." ⁶ Rau sa qai na tisaipeli, ka caka me va sa varojia vi rau o JIsu, ⁷ rau sa yadjia mai na asa vata na luve ni asa, ka tevukia kinia na nodrau i sulu, ka vavodoki koya kinia. ⁸ Sa le levu sara sa tevukia na nodra i sulu i tolo ni sala; sa so voki ra musukia eso na taba ni kau, ka dainia i tolo ni sala. ⁹ Ia o ira na le levu sa liu, vata ki ira sa muri, ra sa kaci ka tukunia, "Osana vua na Luve i Tevita! Sa kalougata o koya sa qai mai i na yaca ni Turaga! Osana i colo sara!" ¹⁰ Ia ni sa yaco i Jerusalemi o koya, ra sa yavala keceliga na lewe ni koro, ka tukunia, "O cei beka ke?" ¹¹ Ra sa tukunia na le levu, "Ke o Jisu na parofita mai Nasareci i Kalili." ¹² Sa curu o Jisu i na valenisoro ni Kalou, ka tovoci ira keceliga ra sa vivoli i na valenisoro; sa vukicia vokiliga na nodra teveli ra sa visau i lavo vata ki na nodrai jikojiko ra sa volitaki ruve; ¹³ sa tukunia vi ira o koya, "Sa volai, Na noqu vale sa vatokai me vale ni masu, ia dou sa caka me nodra qara na daubutako." ¹⁴ Sa qai mai vua i na valenisoro so na mataboko vata ki ira na lokiloki; sa vabulai ira o koya. ¹⁵ Ia ni ra sa raicia o ira na bete levu vata ki ira na vunivola na vika vivakurabuitaki sa caka o koya, vata ki ira na gone lalai ra sa kaci i na valenisoro, ka tukunia, "Osana vua na Luve i Tevita!" a ra sa cudru sara kinia, ¹⁶ ka tukunia vua, "O sa rogocia na ka ra sa vosatakia o ira ke, se reva?" Sa tukunia vi ira o Jisu, "Io; dou sa reva beka ni wilikia, mai na gusudra na gone lalai vata ki ira sa sucu jiko, o sa caka me vinaka sara na varokoroko?" ¹⁷ Sa daini ira o koya ka qai yani i na koro o Pecani, ka moce kinia. ¹⁸ Ni sa savulaci sa lesu voki o koya i na koro, a sa via kana. ¹⁹ Sa raici e dua na vu ni lolo i na tolo ni sala, sa reva ni raicia kinia e dua na ka, na drauna la liga, sa tukunia o koya, "Mo kua voki ni vua ka reva cava." Sa malai sara vasauri na vuni lolo. ²⁰ Ni ra sa raicia na tisaipeli, ra sa kurabui ka tukunia, "Sa caka vacava ni sa malai vasauri na vuni lolo ke? ²¹ Sa vosa o Jisu ka tukunia vi ira, "Au sa tukunia vaidjina vi ikodou, ke tu vi ikodou na vabaujia ka reva ni vajijiqa, dou na reva ni caka laliga na ka sa yaco i na vu ni lolo, ia ke dou na tukunia vokiliga vua na ulunivanua ke, mo cavu tani, ka dai i na wasaliwa; ena yaco liga, ²² vata na ka kece sara dou na kerea i na masu, ni dou sa vadjinajia, dou na rawajia. ²³ Sa curu o koya i na valenisoro ni sa vatavuvuli jiko, sa qai mai vua o ira na bete levu vata ki ira na nodra matua na tamata, ka tukunia, "O sa lesi mai vei mo caka na vika ke? O cei sa solia vi iko nai lesilesi ke?" ²⁴ Sa qai vosa o Jisu ka tukunia vi ira, "Au na tarogi ikodou vokiliga i na dua na ka; ke dou na tukunia vi au, au na qai tukunia vokiliga vi ikodou se au sa lesi mai vei meu caka na vika ke: ²⁵ Sa vu mai vi na papitaiso i Joni? Mai lomalagi, se mai vua na tamata?" A ra sa vivosakitakia vata ki ira, ka tukunia, "Ke da tukunia, E vu mai lomalagi, na qai tukunia o koya vi kita, ia dou sa reva ni vadjinaji koya i na vuku ni cava? ²⁶ Ia ke da tukunia, E vu mai na tamata, da sa rerevaki ira na le levu; ni ra sa vasama keceliga sa parofita o Joni." ²⁷ Sa ra vosa vi Jisu ka tukunia, "Kitou sa reva ni kila." Sa qai tukunia vi ira o koya, "Au na reva vokiliga ni tukunia vi ikodou se au sa lesu mai vi meu caka na vika ke." ²⁸ "Ia cava dou sa nanumia? Sa dua na tamata sa le rua na luvena tagane; sa qai vi koya qase, ka tukunia, "Na luvequ, qai cakacaka ni kua i na noqu teitei ni vivaini." ²⁹ Sa vosa o koya ka tukunia, "Au sa reva ni vinakajia;" sa qai vivutuni i muri ka qai. ³⁰ Sa qai vi koya gone ka vosa vokiliga vua, sa vosa o koya ka tukunia, "Au sa qai beka;" ia ka reva ni mani qai. ³¹ O cei vi rau sa muria na loma i tamana? Ra sa tukunia vua, "O koya qase." Sa tukunia vi ira o Jisu, "Au sa tukunia vaidjina vi ikodou, O ira sa kumunia nai vacavacava vata ki ira na dautagane, ra sa curu iliu vi ikodou i na matanitu ni Kalou." ³² Ni sa qai mai vi ikodou o Joni i nai valavala ni yalododonu, ia dou sa reva ni vadjinajia; ia o ikodou ni dou sa raicia, dou sa reva ni vivutuni i muri, mo dou vadjinajia. ³³ "Dou rogocia dua voki na vosa vatautauvata; sa dua na tamata sa dua nona vale, ka tea e dua na vivaini, sa vabaitakia wavoki, ka kelia kinia na waisa ni vaini, sa tara na nodra vale nai vatawa ni vaini, ka lisitakia vi ira, ka qai tani yani. ³⁴ Ia ni sa voleka mai na vulai matumatua, sa talai ira na nona tamata o koya vi ira na vatawa ni teitei, me ra yadjia mai na vuana. ³⁵ Sa tarai ira na nona tamata o ira nai vatawa ni teitei, ra sa vamavoatakia e dua, ka vamatea e dua voki, ka virikia vokiliga na kedratou i katolu. ³⁶ Sa tala voki yani eso na tamata, ra le levu cake vi ira ra ma liu, a ra sa caka vakinia vi ira. ³⁷ Sa oji sa qai tala na luvena vi ira, ka tukunia, "Ra na varokorokotakia na luvequ." ³⁸ Ia ni ra sa raicia na luvena o ira nai vatawa ni teitei, ra sa tukunia vata ki ira, "O koya ke nai taukenia i muri, tu mai vamatea, me da tu sugujia na vanua me noda." ³⁹ Ra sa tauria ka bilirakia i na bili ni vi were ni vaini, ka vamatea. ⁴⁰ Ia ni sa qai mai na taukei ni were ni vivaini, na cava na caka vi ira nai vatawa ni teitei ke? ⁴¹ A ra sa tukunia vua, "Ena vararawataki ira ka vamatei ira na tamata ca ke, ka lisitakia na vi vaini vi ira voki eso nai vatawa ni teitei, ra na solia vua na vuana e na kena yabaki. ⁴² Sa tukunia vi ira o Jisu, "Dou sa reva beka ni wilikia nai Vola Tabu, Na vatu ra sa cajia o ira na matai ni vale, sa yaco me kenai vadei i na tutu ni vale; Ke na cakacaka i Jiova, sa vivakurabuitaki i matada?" ⁴³ O koya gona au sa tukunia kinia vi ikodou, "Na yadji tani vi ikodou na matanitu ni Kalou, me solil vi ira na lewe ni vanua ra na vuatakia na vuana. ⁴⁴ O koya na lutu i na vatu ke, na dasila kinia; ia o koya na lutukia, na vurumemea me va na nuku." ⁴⁵ Ia ni ra sa rogocia o ira na bete levu vata ki ira na vunivola na vosa vatautauvata ke, ra sa kina ni sa vosataki ira o koya. ⁴⁶ Ni ra sa via tauri koya, ra sa rerevaki ira na le levu, ni ra sa vasamatakia sa parofita o koya.