¹ Sa yaco na vika ke ni sa oji na nona vosa o Jisu, ka sa qai tani i Kalili, ka yaco i na yasayasa va-Jutia i na tai kadua ni Joritani. ² Ra sa le levu sara ra sa muri koya, sa vabulai ira mai kinia o koya. ³ Sa qai mai vi koya o ira na Farisi, ka vatovolei koya, ka tukunia, "Sa tara vua na tagane me dainia na wajina i na vuku ni ka keceliga, se reva?" ⁴ Sa vosa o koya, ka tukunia vi ira, "Dou ma reva beka ni wilikia, o koya sa buli rau i nai vatekivu sa buli liga na tagane vata na yalewa? ⁵ Sa tukunia, "I na vuku ni ka ke ena daini tamana vata na jinana na tagane ka kabijia na wajina: rau sa na le dua liga? ⁶ Koya gona ra sa reva kinia ni le rua, rau sa le dua liga, na ka sa vaucia na Kalou, me kua ni tawasea rua na tamata,." ⁷ Ra sa tukunia vua, "Cava sa tukunia o Mosese me soli vua nai vola ni visere, ka qai tani?" ⁸ Sa tukunia vi ira o koya, "I na vuku ni nomudou lomaqa sa vosoji ikodou kinia o Mosese mo dou dainia tani na wajimudou ia ma reva ni vake i nai vatekivu. ⁹ Au sa tukunia vi ikodou, O koya na dainia na wajina, ke sa reva ni dautagane, ka qai vawaji vata e dua voki, sa dauyalewa o koya vokiliga vata ki rau sa qai viwajini kaya sa dainia, sa dauyalewa." ¹⁰ Sa tukunia vua o ira na nona tisaipeli, "Ke sa vake na lewa vua na tagane vata na wajina, sa vinaka me kua liga ni vawaji. ¹¹ Sa tukunia viira o Jisu, Sa reva ni rawa na ka ke na tamata keceliga, o ira liga sa soli vi ira. ¹² So e ra reva ni vawaji, ni ra sa sucu vakinia mai na kete i jinadra, ka so sa ra reva ni vawaji, ni sa selevi ira o ira na tamata: ka so sa kua ni vawaji, ni ra sa lewa me vakinia i na vuku ni matanitu valomalagi. O koya sa rawa me ciqomia, me ciqomia." ¹³ Sa qai yadji mai vua eso na gone lalai, me tabaki ira o koya i na ligana, ka masulakia: a sa vunauci ira o ira na tisaipeli. ¹⁴ Sa tukunia o Jisu, "Daini ira na gone lalai, kua ni tarovi ira, ni ra sa qai mai vi au; ni sa nodra na matanitu valomalagi." ¹⁵ Sa qai tabaki ira i na ligana o koya, ka qai tani mai kinia. ¹⁶ Ka raicia, sa qai mai e dua, ka tukunia vua, "Vavuvuli vinaka, na cava na ka vinaka meu caka me'u rawajia kinia na bula reva ni mudu?" ¹⁷ Sa tukunia vua o koya. "Na cava o sa tarogi au kinia i na vuku ni ka vinaka? Sa dua liga sa vinaka; ia ke o sa via curu i na bula, mo muria na vunau." ¹⁸ Sa tukunia vua o koya, "Na cava na vunau?" Sa tukunia o Jisu, "Mo kua ni laba, Mo kua ni ia na vibutakoci, Mo kua ni butako, Mo kua ni vibeitaki vaseseni, ¹⁹ Varokoroko vi rau na tamanu vata na jinamu: ka mo lomania na kai nomu me vaka o sa lomani iko," ²⁰ Sa tukunia vi koya na cauravou, Na ka keceliga qori au ma vabaujia niu ma se gone ka yacovia na siga ke, cava voki se vo vi au?" ²¹ Sa tukunia vua o Jisu, "Ke o sa vinakatakia mo vinaka sara, mo qai mo volitakia na nomui yau, ka solia vi ira sa dravudravua, o na qai vaiyau mai lomalagi: ia mo qai mai, mo muri au. ²² Ia ni sa rogocia na vosa ke na cauravou, sa qai tani, sa rarawa na lomana; ni sa levu na nonai yau, ²³ Sa tukunia vi ira na tisaipeli o Jisu, "Au sa tukunia vaidjina vi ikodou, "Na mama vua na tamata vutuniyau me curu i na matanitu valomalagi: ²⁴ ka au sa tukunia voki vi ikodou, sa rawarawa me curu i na mata ni cula na kameli, ia ka mama vua na vutuniyau me curu i na matanitu ni Kalou, ²⁵ Ni ra sa rogocia na nona tisaipeli, ra sa reucala ka tukunia, "O cei na qai vabulai rawa?" ²⁶ Sa varaici ira o Jisu ka tukunia vi ira, "Ke sa mama sara vi ira na tamata; sa rawarawa vua na Kalou na ka keceliga." ²⁷ Sa qai vosa o Pita, ka tukunia vua, Raicia, kitou sa dainia na ka kece, ka muri ikonu, na cava na qai nitou?" ²⁸ Sa tukunia vi ira o Jisu, "Au sa tukunia vaidjina vi ikodou, o ikodou sa muri au, ni na yaco na vivadodonutaki, ni na jiko na Luve ni tamata i nai jikojiko vaturaga ni nonai ukuuku, dou na qai jiko vokiliga i nai jikojiko vaturaga e jinikarua, me lewai ira na mataqali ni Isireli e jinikarua. ²⁹ O koya yadua sa dainia na vale, se na tacina, se na ganena, se na tamana, se na jinana, se na luvena, se na vanua, ena vuku ni yacaqu, na yadrau na rawajia; na taukenia vokiliga na bula tawa cava. ³⁰ Ra le levu sa liu ra na muri; vata ki ira vokiliga sa muri ra na liu.