¹ Sa ra qai mai o ira na Farisi vata ki ira nai tokani ni Setoki, me ra vatovolei koya, ra sa masujia me varaitakia vi ira e dua nai vatakilakila mai lomalagi. ² Sa vosa o koya ka tukunia vi ira, "Ni sa raiyavi, nu sa tukunia, Ni sa siga vinaka; ni sa damudamu na lomalagi." ³ Ia na savulavi, ena draki ca ni kua; ni sa damudamu ka loaloa na lomalagi. "O ikodou na dauvivakaisini, nu sa kila rawa na mata ni lomalagi; ia dou sa reva beka ni kila na vi vatakilakila ni gauna ke? ⁴ Nai tabatamata ca ka dauyalewa sa dauvasaqara e dua na i vaitakilakila; ka na reva ni soli kinia e dua nai vatakilakila, nai vatakilakila liga ni Jona na parofita." Sa qai daini ira o koya, ka qai tani yani. ⁵ Ni sa yaco o ira na nona tisaipeli i yasana kadua, ra sa guilecavia me ra yadjia na madrai. ⁶ Sa qai tukunia vi ira o Jisu, Dou raicia ka qarauni ikodou mai na nodra leveni na Farisi vata ki ira nai tokani ni Setoki. ⁷ Ra sa vivosakitakia vaira, ka tukunia, "Sa ka beka ni da sa reva ni yadjia mai na madrai." ⁸ Ni sa kila o Jisu, sa tukunia vi ira, "O ikodou sa lailai na nomudou vabaujia, na cava dou sa vinanuyakia kinia i lomamudou, ni dou sa reva ni yadjia mai na madrai? ⁹ Dou sa reva beka ni kila rawa mai, se nanumia nai buli madrai e lima vi ira na le lima na udolu, ka vitu nai su nu ma vasinaijia? ¹⁰ "Se nai buli madrai e vitu vi ira na le va na udolu, ia ka vica na sova dou ma vasinaijia?" ¹¹ E vacava ni dou sa reva ni kila rawa niu sa reva ni vosatakia na madrai, na nodra leveni liga na Farisi vata nai tokani ni Setoki au sa tukunia mo dou qarauni ikodou mai kinia?" ¹² Ra sa qai kila ni sa reva ni vosa o koya me ra qarauni ira mai na leveni ni madrai, mai na nodrai vavuvuli liga na Farisi vata nai tokani ni Setoki. ¹³ Ni sa yaco o Jisu i na yasayasa va-Sisaria-Filipai, sa tarogi ira na nona tisaipeli, ka tukunia, "Ra sa tukunia na tamata se o cei o au na Luve ni tamata?" ¹⁴ So voki ra sa tukunia , "O Joni na dauvipapitaiso: ka so, o Ilaija; ka so voki o Jeremaia, se dua voki na parofita. ¹⁵ Sa qai tukunia vi ira o koya, "Ia dou sa tukunia se o cei o au?" ¹⁶ Sa qai vosa o Saimoni Pita, ka tukunia, "O Ikonu na Karisito, na Luve ni Kalou bula." ¹⁷ Sa vosa o Jisu, ka tukunia vua, "O sa kalougata, Saimoni Pa-Jona: ni sa reva ni vatakila vi iko na lewe vata na dra, na Tamaqu liga sa jiko mai lomalagi. ¹⁸ Au sa tukunia vokiliga vi iko, O iko Pita, ena dela ni vatu ke, au na tara kinia na noqui soqosoqo le ni lotu; ia ena reva ni rawajia na matamata-ni-koro mai Etesi." ¹⁹ Au na solia vokiliga vi iko nai dola ni matanitu valomalagi: ia na ka keceliga o na vaucia i vuravura, na vauci mai lomalagi; ia na ka keceliga o na serekia i vuravura, na sereki mai lomalagi. ²⁰ Sa qai varojia vi ira na nona tisaipeli, me ra kua ni tukunia vua e dua ni sai Jisu Karisito o koya. ²¹ I na gauna gona sa tekivu kinia o Jisu me vatakila vi ira na nona tisaipeli, ni sa dodonu me qai i Jerusalemi, ka vosojia na ka e levu mai vi ira na matua, vata ki ira na bete levu vata ki ira na vunivola, ka me vamatei ka me vaturi voki mai nai katolu ni siga. ²² Sa qai yadji koya o Pita ka tekivu me vunauci ira ka tukunia, "Me kua vi Ikonu na Turaga: na ka ke na reva ni yaco vi ikonu." ²³ Sa vuki o koya ka tukunia vi Pita, Qai tani i tovuqu Setani: o sa via bukiveretaki au; ni o sa reva ni vananumakia na ka ni Kalou, na ka liga ni tamata." ²⁴ Sa qai tukunia vi ira na nona tisaipeli o Jisu, "Ke dua sa via muri au, me kua ni muria na lomana, ia me cola na nona kauvelatai, ka muri au. ²⁵ Ia o koya yadua sa via maroroya na nona bula, ena vayalia: ia o koya yadua sa vayalia na nona bula i na vukuqu, e na maroroya. ²⁶ Ia ka cava na kena yaga vua na tamata, ke rawaji vuravura taucoko, ka vayalia na yalona? Se cava na solia na tamata mei sau ni yalona? ²⁷ Ni na qai mai na Luve ni tamata i nai ukuuku ni Tamana, ki ira vata kaya na nona agilosi; ena qai saumia o koya vi ira na tamata yadua me va na nodrai valavala. ²⁸ Au sa tukunia vaidjina vi ikodou, sa tu ke eso , ra na reva ni mate, ra na raicia mada na Luve ni tamata ni sa yaco mai na nona matanitu."