¹ I na siga gona, sa qai tani mai vale o Jisu, ka qai sobu i matasawa. ² Sa le levu sara ra soqoni vata vi koya, sa vodokia dua na waqa o koya, ka jiko sobu: ra sa tu kece mai matasawa na le levu. ³ Sa levu na ka sa vosatakia vi ira o koya ina vosa- vatautauvata ka tukunia: "Raicia, sa dua na daukabukaburaki sa qai kabukaburaki; ⁴ ia ni sa qai kabukaburaki jiko; Sa lutu eso ina i tutu ni sala, sa qai mai na manumanu vuka ra sa kania. ⁵ Sa lutu voki eso ina vanua vivatu, sa reva ni levu kinia na qele" sa tubu cake vatotolo sara, ni sa reva ni vavaku na kena qele. ⁶ Ia ni sa cabe na siga, sa malai; ka ni sa reva na wakana, sa raqosa sara. ⁷ Sa lutu eso i na viwa-vavotona; sa tubu cake na viwa-vavotona ka varugujia. ⁸ Sa lutu voki eso ina vanua vinaka, sa vuavuai vinaka, sa vuai drau eso, sa onosagavulu eso, sa tolusagavulu eso. ⁹ O koya sa vadaligana me rogocia, me mani rogocia sara." ¹⁰ Sa ra qai mai o ira na tisaipeli, ka tarogi koya, "O sa vosa jikoliga vi ira i na vosavatautauvata ina vuku ni cava? ¹¹ Sa qai vosa o koya ka tukunia vi ira, "Ni sa soli vi ikodou mo dou kila na vika vuni ni matanitu valomalagi, ia ka reva liga ni soli vi ira. ¹² Ni sa tu vua na tamata e dua na ka, na qai soli valevu vua ka na levu na nona; ia na tamata sa reva ni tu vua e dua na ka, na qai yadji tani mai vua na ka sa tu vua." ¹³ O koya gona au sa vosa kinia vi ira ina vosa-vatautauvata ni ra sa varaicia ka reva ni raicia; ra sa rogocia ka reva ni rogocia, ka guilecavia tu. ¹⁴ Sa qai vayacori kinia na nona varovisai o Aisea, ka vake, "Dou na daurogocia jikoliga, ka nanulecajia tu; ia dou na dauraicia jikoliga ka reva ni raicia;" ¹⁵ Ni sa uro mai na lomadra na tamata ke, sa djidjivara na daligadra, sa bobo na matadra; De dua na siga na rai na matadra, ka rogo na daligadra, ka kila na lomadra, ra na saumaki mai, ia au na vabulai ira. ¹⁶ Sa kalougata na matamunu , ni dou sa raicia, vata na daligamudou, ni dou sa rogocia. ¹⁷ Niu sa tukunia vaidjina vi ikodou, ra le levu na parofita vata na tamata yalododonu ra ma via raicia ka dou sa qai raicia, ka ra ma reva ni raicia ka rogocia na ka dou sa qai rogocia, ka ra ma reva ni rogocia. ¹⁸ O koya mo dou qai rogocia na vosa vatautauvata ni dauvikaburaki: ¹⁹ Ni sa dua e rogocia na vosa ni matanitu, ka guilecavia jiko, sa qai mai na vu-ni-ca, sa kovea na ka sa kaburakia i lomana. Sai koya ke sa kaburakia ina tutu ni sala. ²⁰ Ia o koya sa kaburakia ina vanua vivatu, koya ke sa rogocia na vosa, sa vabaujia sara ina marau. ²¹ ia ni sa reva na wakana i lomana, sa tu dede valailai liga: ni sa tubu na rarawa, se na vivacacani ina vuku ni vosa sa tarabe sara. ²² Ia o koya sa kaburakia ina viwa-vavotona, koya ke sa rogocia na vosa: ia na lomaocaoca ina vuku ni vuravura ke, vata nai yau e dauvivakaisini, sa varugujia na vosa, sa reva kinia ni vua. ²³ Ia o koya sa kaburakia ina vanua vinaka, koya ke sa rogocia na vosa, sa kila na kenai balebale, sa vua, ka vuai drau eso, sa onosagavulu eso, sa tolusagavulu eso. ²⁴ Sa dua voki na vosavatautauvata sa tukunia vi ira o koya, sa vatautauvatatakia na matanitu valomalagi vata dua na tamata sa kaburakia na sila vinaka ina nona i teitei; ²⁵ ia ni ra sa moce o ira na tamata, sa qai mai na nona meca ka kaburakia vata na sila ca i na loma ni viwiji, mani qai sara yani. ²⁶ Ni sa tubu mai na sila ka vua, sa qai vua vokiliga mai na sila ca. ²⁷ Sa qai mai vua na kena i taukei o ira na nona tamata, ka tukunia vua, "O ma reva beka ni kaburakia na sila vinaka ina nomu teitei? Sa yadji mai ke vi au na sila ca?" ²⁸ Sa qai tukunia vi ira o koya, "Na ka ke sa caka e dua na meca." Ra sa tukunia vua o ira na tamata, "O sa vinakatakia beka me kitou qai cavurakia tani?" ²⁹ Sa tukunia o koya, Se kua mada, de nu cavurakia vokiliga na wiji vata na sila ca. ³⁰ Dainia liga me rau tubu vata ruarua me se cava mada na yabaki: ia ni sa cava na yabaki au na tukunia vi ira na dautatamusuki, Dou kumunia vata mada na sila ca, ka vesukia vata me visa; ia dou kumunia vata na wiji ka dainia ina noqu lololo. ³¹ Sa dua voki na vosavatautauvata sa tukunia vi ira o koya, Sa tautauvata na matanitu valomalagi vata na dua na sore ni mosita, o koya sa yadjia e dua na tamata, ka tea ina nona teitei: ³² ia o koya sa lailai sobu ina sore ni kau keceliga; ni sa tubu cake, sa levu cake na kena mataqali gona, sa yaco me kau djina, sa qai ro i tabana na manumanu vuka. ³³ Sa dua voki na vosavatautauvata sa tukunia vi ira o koya: Sa tautauvata na matanitu valomalagi vata na leveni, sa tauria e dua na yalewa, ka vunia i loma ni madrai droka e tolu nai varau, me valevenitaki kece mada. ³⁴ Na ka keceliga ke sa tukunia o Jisu vi ira na le levu ina vosavatautauvata; sa reva ni vosa laliga vi ira, sa vosavatautauvata jikoliga. ³⁵ O koya gona sa vayacori kinia na vosa ni parofita ka tukunia, "Au na vosa liga ina vosavatautauvata; Au na tukunia eso na ka sa vuni tu mai na gauna se qai buli kinia na vuravura." ³⁶ Sa qai vatalai ira yani na le levu o Jisu, ka curu i vale; sa qai mai vua o ira na nona jisaiveli ka tukunia, "Dou vamacalatakia mai vi kitou na vosavatautauvata ni sila ca mai nai teitei. ³⁷ Sa vosa o koya ka tukunia vi ira, O koya sa kaburakia na sila vinaka, gona na Luve ni tamata; ³⁸ ia nai teitei gona na vuravura; na sila vinaka gona o ira na gone ni matanitu; ia na sila ca ke o ira na luve ni vu-ni-ca: ³⁹ ia na meca sa kaburakia sai koya na tevoro: ia na yabaki nai vataojioji ki vuravura: ia na dautatamusuki ke o ira na agilosi. ⁴⁰ Ia me vaka sa kumuni vata na sila ca ka visa ina buka, na vavokiliga kinia i na vataojioji ki vuravura ke: ⁴¹ na talai ira yani na nona agilose na Luve ni tamata, me ra soqonia vata mai na nona matanitu na ka keceliga sa dau vivacalai, vata ki ira sa caka jiko na ka ca; ⁴² ra na balaji ira i na lovo buka waqa; ra na dautagi kinia ka vasequruquru baji. ⁴³ sa na qai serau na tamata yalododonu, me vaka na siga i na matanitu ni Tamadra. O koya sa vadaligana me mani rogocia sara. ⁴⁴ Sa dua voki, sa tautauvata na matanitu valomalagi ki nai yau sa vuni tu i na dua nai teitei; a sa dua na tamata sa raicia, ka reva ni via tukunia, ia ni sa marautakia, sa qai volitakia na ka keceliga sa tu vua, sa mani qai volia na teitei gona o koya. ⁴⁵ Sa dua voki sa tautauvat na matanitu valomalagi ki na tamata dauvivoli, sa vaqara eso na nona mata-ni-civa vinaka: ⁴⁶ ia ni sa raicia e dua na mata-ni-civa talei sara, sa qai ka volitakia na ka keceliga sa tu vua, ka sa volia o koya na ka gona. ⁴⁷ Sa dua voki sa tautauvata na matanitu valomalagi ki na lawa ni yavi, sa kolotaki i wai, sa rawa mai kinia eso mai na vimataqali keceliga; ⁴⁸ ia ni sa sinai, ra sa yavia i matavura, ra sa jiko sobu, ka tawania na ka vinaka i na sova, ka dainia tani na ka ca. ⁴⁹ Na vakinia nai vataojioji ki vuravura: ra na qai mai na agilosi, ka tawasei ira tani na tamata ca mai vi ira na yalododonu, ⁵⁰ ka daini ira tani i na lovo ni buka waqa: ra na dautagi kinia ka vasequruquru baji. ⁵¹ Dou sa kila nai balebale ni ka keceliga ke? Ra tukunia, Io. ⁵² Sa qai tukunia vi ira o koya, ia na vu-ni-bola keceliga s vatavuvuli i na vi ka ni matanitu valomalagi, sa tautauvata ki na tamata sa taukenia e dua na vale, o koya sa yadjia mai na nona loloma na vika vou vata na makawa vokiliga. ⁵³ Sa yaco ni sa vaojia o Jisu na vosa-vatautauvata kece ke, sa qai tani mai kinia. ⁵⁴ Ia ni sa yaco i na nona vanua, sa vatavulici ira o koya i na nodra valenilotu, a ra sa kurabui kinia, ka tukunia, E rawajia vacava o koya ke na vuku, vata na cakacaka mana ke? ⁵⁵ Sa reva beka ni luve ni matai o koya ke? Sa reva beka ni yaca i jinana o Meri? Vata na tacina o Jemesa, ki Josefa, ki Saimoni, ki Jutasa? ⁵⁶ Ki na ganena, ratou ma reva beka ni jiko vata kece ki kita? Sa qai rawajia vacava o koya na ka keceliga ke? ⁵⁷ A ra sa tarabe i na vukuna. Sa tukunia vi ira o Jisu, Sa varokorokotaki na varovita i na vivanua tani, ia sa reva liga i na nona vanua, se na nona vale. ⁵⁸ Sa reva ni caka o koya e levu na cakacaka-mana i vanua gona, balejia ni ra reva ni vabaujia.