¹ O Jisu ni sa oji na nona varojia vi ratou na nona tisaipeli le jinikarua, sa qai dainia na vanua gona, ka qai vatavuvuli ka vunau ina nodra vikoro. ² Ni sa rogocia o Joni mai na vale ni vivesu na cakacaka ni Karisito, sa qai tala e le rua na nona tisaipeli, ³ me tukunia vua, "O iko beka o koya e qai mai, se da warakia voki e dua?" ⁴ Sa vosa o Jisu, ka tukunia vi rau, "Drau qai, ka tukunia vi Joni na vika drau sa rogocia ka raicia: ⁵ Ni ra sa rai na mataboko, sa qai rawa na lokiloki; sa vasavasavataki na vukavuka, rogo rawa na didivara; sa ra wiri voki mai na mate, sa vunatakia nai tukutuku-vinaka vi ira na dravudravua. ⁶ Sa kalougata o koya ena reva ni tacaqe ina vukuqu." ⁷ Ni rau sa qai tani, sa tukunia o Jisu vi ira na le levu ina vukui Joni, "A cava nu sa qai via i na vanua lala mo dou raicia? na gasau beka sa yavalaji ina cagi? ⁸ Na cava dou qai via mo dou raicia? Na tamata beka sa vaicurucuru i nai sulu malumalumu? Raicia, o ira sa vaicurucuru i na i sulu malumalumu, ra sa jiko ina nodra vivale na tui. ⁹ Na cava nu sa qaivia mo nu raicia? Na varovita beka? Io, au sa tukunia vi kodou, e dua sa daumaki vua na varovita. ¹⁰ Ni sai koya sa volai va ke, "Raicia, au sa tala na noqui talai me liu i matamu. Ena caramakia o koya na nomu sala i matamu." ¹¹ Au sa tukunia vaidjina vi ikodou, Sa reva ni ni tubu e dua vi ira sa sucu mai na yalewa me daumaki vi Joni na dauvivavitaiso; ia o koya sa lailai sara ina matanitu valomalagi sa daumaki vi koya. ¹² Mai na gauna ni Joni na dauvivavitaiso ka yacovia na siga ke, sa rawa na matanitu valomalagi na gugumatua, ia o ira sa gugumatua sara, ra sa taukenia. ¹³ Ni ra sa dauvatavuvuli keceliga na varovita vata na vunau ka yacovia na siga ni Joni. ¹⁴ Ke dou sa via vabaujia, sai koya ke o Ilaija, o koya sa dodonu me qai mai. ¹⁵ O koya sa vadaligana me rogocia , me mani rogocia sara. ¹⁶ Na cava me'u vatautauvatatakia kinia nai taba tamata ke. Sa tautauvata ki ira na gone ka ra jiko ina vanua ke. Sa tautauvata ki ira na gone sa jiko ina rara ni vivoli, ka kaci yani vi ira sa jiko vata ki ira, ¹⁷ ka tukunia, Kitou ma uvu bitu vi ikodou, ka dou ma reva ni meke; kitou ma tagi vi ikodou, ka dou ma reva ni tagiyaso. ¹⁸ Ni sa qai mai o Joni ka reva ni daukana se dausomi, ra sa tukunia, "Sa jiko vua e dua na tevoro." ¹⁹ Sa qai mai na Luve ni tamata, sa kana ka somi, ra sa tukunia, "Raicia, na tamata daukana ka dausomi waini, na nodrai tau na daukumunia nai vacavacava, vata ki ira na tamata ivalavala ca. Ia sa vadonui na vuku o ira na luvena. ²⁰ Sa qai vatekivu o koya me vunaucia na vikoro ka ma caka kinia e levu na cakacaka mana, ni ra ma reva ni vivutuni. ²¹ O na ca o iko, Koresini! O na ca o iko Peciseita! ke ma caka mai Taia vata ki Saitoni na cakacaka mana ma caka vi kodrau, ke rau sa vivutuni makawa ina dravusa vata nai sulu taga. ²² Au sa tukunia vokiliga vi ikodrau, Ni na ca valailai o Taia vata ki Saitoni ina siga ni lewa, ia o ikodrau, drau na ca valevu cake. ²³ O iko vokiliga Kapenaumi, o na laveji cake i lomalagi? O na dai sobu voki i Etesi, ia ke sa caka mai Sotoma na vika mana ka caka vi iko,ke se tu liga ke me yacovia na gauna ke. ²⁴ Au sa tukunia vokiliga vi iko, ni na ca valailai o Sotoma ina siga ni lewa, o iko, o na ca valevu sara. ²⁵ Ina gauna gona, sa vosa kinia o Jisu, ka tukunia, "Au sa vavinavinaka vi ikonu Tamaqu, na Turaga ni lomalagi vata na vuravura, ni ikonu sa vunia na via ke vi ira na vuku vata ki ira na yalomatua ka vatakila liga vi ira na gone lalai: ²⁶ sai koya ke Tamaqu, ni sa vinaka e matamuni me vake. ²⁷ Sa solia mai vi au o Tamaqu na ka keceliga: ka sa reva ni dua voki e kila na Luvena, na Tamana duadua liga vata ki koya sa vinakatakia na Luvena me varaitaki koya vua. ²⁸ Nu qai mai vi au, kodou vayadua sa oca ka colajia nai colacola bibi, au na vacegui ikodou. ²⁹ Vataqa vi ikodou na noqu i vua, ka vuli vi au, ni'u sa yalomalua ka yalomalumalumu: dou na qai raicia kinia na vacegu ni yalomunu. ³⁰ Ni sa rawarawa na noqu i vua, ka mamada na noqui i colacola.