¹ O koya ke me da qai maroroya nai vatekivu ni vavuvuli i Karisito me da toro cake me da matua sara; me tou kakua ni lesuvia voki na yavu ni vabaujia, na vivutuni ena vuku ni tovo eda mate kinia, vata na vabautia na Kalou, ² Nai vavuvuli ni vipapitaisotaki, vata na vitabaki i na liga, vata na nodra tucake voki mai na mate, vata na vilewai reva ni mudu. ³ ena caka na ka ke kevaka e vatara na Kalou. ⁴ Ni sa mama sara me vavoui voki me ra vivutuni o ira ra ma vararamataki oti, ka ra sa tovolea nai solisoli valomalagi, ka vaivotavota i na Yalo Tabu, ⁵ ka tovolea na vosa vinaka ni Kalou, ki na kaukauwa ni bula ena muri mai, ⁶ a ra sa qai vuki voki; ni ra sa vakotia voki tiko na luve ni Kalou vataki ira ka beci koya I na matana votu. ⁷ Ni sa vakalougatatakia na Kalou na qele sa somia na uca sa qai wasoma kinia, sa vatuburia na kau sa yaga vi ira era sa kelia: ⁸ ia sa reva ni vabau ka sa vo e lailai me dai tani sa vatuburia na kau vavotona vata na soni,ka na kena I jinijini me visa. ⁹ Ia o ikodou liga, sa lomani, ka dina liga ni kitou sa vosa va ke, ia kitou sa nanumi ikodou ni dou sa vinaka cake, baletia ni sa tu vi ikodou na ka sa salavata na bula. ¹⁰ Ni sa reva ni dau cakacaka va reva ni dodonu na Kalou, ka na reva ni nanulecajia na nomudou cakacaka vata na loloma, dou a ma vatakila i na yacana I na nomudou qaravi ira o ira sa lotu, ka dou se viqaravi tiko liga ke. ¹¹ Ia kitou sa vinakajia mo dou dui vakaukauwa vakinia, mo dou vanuinui matua sara ina ka me yacovia nai vataojioji: ¹² mo dou kua ni vucesa, mo dou muri ira liga ka ra sa itaukei vika a yalataki ni ra a vabaujia ka vosojia vadede. ¹³ Ia ni sa yalayala vi Eparaama na Kalou, ka ni sa reva ni cavujia rawa e dua sa levu cake, sa qai cavuji koya liga i na nona bubului, ¹⁴ ka tukunia, E djina au na vakalougatataki iko valevu, ka valewevuqataki iko valevu sara. ¹⁵ Sa va liga kinia, ni sa vosotia vadede mada o koya, sa qai yaco me taukenia na ka sa yalataki. ¹⁶ Ia ni sa bubului o ira na tamata, ka ra sa dau cavujia na ka sa levu cake,ka sa oti vi ira na vileji i na bubului mei vadjinadjina. ¹⁷ Sa vakinia na Kalou, ni sa vinakajia o koya me vatakila djina sara vi ira ni ra na taukenia na ka ma yalataki ni sa tu dei na nona lewa, ka sa vadjinadjinatakia ena yalayala: ¹⁸ me rua kinia na ka sa tu dei sara, sa reva ni rawa kinia me vosa seni na Kalou, me da vacegui sara kinia, o kita eda sa qai varuru ni da sa tauria nai nuinui sa dai oti tu i matada: ¹⁹ koya gona sa tu vi kita na I nuinui ke mei kelekele ni yaloda, sa jina ka kaukauwa, ia sa curu sara i loma ni laji: ²⁰ ina tikinia gona sa curu sara kinia i na vukuda o Jisu, me noda i liuliu, ni sa lesi me bete levu ka reva ni oji me vatakia nai valavala i Melikiseteki.