¹ Sai ira na parofita ka vosa kinia iliu na Kalou vi ira na matua, i na levu na gauna, vata nai valavala: ² ia sai koya na Luvena sa vosa kinia vi kita o koya, ena gauna mai muri ke; o koya sa lesia o koya mei taukei ni ka keceliga, o koya sa bulia vokiliga kinia na vuravura keceliga; ³ o koya sa cila kinia na nona rarama vata na iyaloyalo ni nonai tovo, a sa tokonia na ka keceliga ena nona vosa mana, a sa tiko sobu i na liga i matau i Koya sa levu sara mai colo, ni sa savajia tani oti vataki koya na nodai valavala ca; ⁴ ni sa yaco me vinaka cake vi ira na agilosi, ni sa taukenia na yaca sa vinaka cake na mai na yacadra.

⁵ Io, o cei vi ira na agilosi sa kaya kinia o koya i na dua na siga, na Luvequ o iko, au sa vatuburi iko nikua? Se me kaya, oi au na Tamana, na Luvequ o koya? ⁶ Ia ni sa yadia mai o koya na Ulumatua i vuravura, sa tukunia, Me cuva vua o ira kece liga na agilosi ni Kalou. ⁷ Ia ena vukudra na agilosi sa tukunia o koya, O koya sa lesi ira na nona agilosi me cagi, vata ki ira na nonai talatala me yameyame ni buka. ⁸ Ia ena vuku liga ni Luvena, Ena reva ni oji na nomunu itikotiko-vaturaga, oi ikonu na Kalou: Sai titoko ni caka dodonu nai titoko ni nomunu matanitu: ⁹ o ikonu sa vinakatia nai caka dodonu, ka catia nai caka ca, ma lumuti ikonu kinia na Kalou, na nomunu Kalou, ena waiwai ni marau mo nu vinaka cake kinia vi ira na nomunu i tokani. ¹⁰ Ia, o ikonu na Turaga, o nu ma tauyavutakia na vuravura mai nai vatekivu; ia na cakacaka ni ligamunu o lomalagi: ¹¹ Ena rusa gona; ia o ikonu o nu na tikoliga: Ia ena madra kece mai gona me va nai sulu: ¹² O nu na lobia vokiliga me vaka nai tutuvi, ka na vaisosomitaki me va nai sulu: Ia o ikonu sai ikonu tikoliga, ka na reva ni oji na nomunu viyabaki. ¹³ Ia o cei vi ira na agilosi sa tukunia vua o koya e na dua na siga, Mo tiko i na ligaqu i matau, Ka me'u lesi ira oti mada na nomu meca mei tutu-ni-yavamu? ¹⁴ Ra sa reva beka ni yalo dauviqaravi ko ira keceliga, sa talai yani me qaravi ira ka ra na yaco imuri mei taukei ni bula?