¹ O Saula, sa cavujia jiko na vosa cudrucudru vata na vivamatei vi ira sa lotu vua na Turaga, ² sa qai vua na bete levu sa tarogia vua nai vola nodra na vivale ni lotu mai Tamasiko, ke raicia o koya eso ra sa muria nai varau gona, se ra tagane se yalewa, me vesuki ira, me qai yadji ira i Jerusalemi. ³ Ia ni sa qai tu, sa yaco voleka i Tamasiko, sa cila vavolivoliji koya vasauri dua na rarama mai lomalagi; ⁴ sa bale sobu i na qele, sa rogocia dua na domo sa tukunia vua, "I Saula, I Saula, o sa vacacani au i na vuku ni cava?" ⁵ Sa tukunia vua o Saula, "O cei o Ikonu, Na Turaga?" Sa tukunia na Turaga, "Oi au o Jisu, o sa vacacania; ⁶ sa sautaninini o koya, sa reucala, sa tukunia, "Ikonu na Turaga, Na cava me'u caka?" Sa tukunia vi koya na Turaga, "Cavu tu, qai i na koro, na tukuni vi iko na ka e dodonu mo caka." ⁷ O ira na tamata sa qai vata ki koya ra sa tu ka vagagalu liga: ra sa rogocia liga na domo, a ra sa reva ni raicia e dua. ⁸ Sa wiri mai na qele o Saula, ni sa dola na matana, sa reva ni raicai e dua na ka; ra sa tuberi koya, sa yadji koya i Tamasiko. ⁹ Sa bogi tolu sa reva ni rai rawa, sa reva vokiliga ni kana se somi. ¹⁰ Sa dua na tisaipeli mai Tamasiko, o Ananaiasa na yacana. Sa tukunia vi koya na Turaga, i na raivotu, "I Ananaiasa!" Sa tukunia o koya, "Raicia, oi au, Turaga." ¹¹ Sa tukunia vi koya na Turaga, "Mo tu yani,ka qai i sala levu na yacana o Dodonu, tarogia na kai Tarisu, o Saula na yacana i na vale ni Jutasa, ni sa masu jiko. ¹² Ni o sa raicia i na raivotu e dua na tamata o Ananaiasa na yacana, sa curu mai, tabakia i ligana, me rai rawa o koya." ¹³ Sa qai tukunia o Ananaiasa, "Ikonu na Turaga, ra sa le levu au sa rogocia kinia nai tukutuku ni tamata ke, na levu ni ka ca sa vayacoya vi ira na nomunu tamata yalosavasava mai Jerusalemi. ¹⁴ Ke vokiiga sa lesia o ira na bete levu me vesuki ira keceliga sa masujia na yacamunu." ¹⁵ Sa tukunia vi koya na Turaga, "Mo qai liga, o koya ke na tamata djigitaki vi au, me yadjia na yacaqu i na matadra na vimatanitu tani vata vi ira na tui eso vata vi ira na luvei i Isireli; ¹⁶ ni'u na vatakila vua na levu ni ka ina vosojia i na vuku ni yacaqu." ¹⁷ Sa qai o Ananaiasa, sa curu i vale. Sa tabakia o koya na ligana, sa tukunia, "Na wekaqu, Saula, na Turaga o Jisu, o koya sa rairai vi iko i na tolo-ni-sala o ma qai mai kinia, sa talai au mai mo rai rawa, mo vasjinaiji vokiliga i na Yalo Tabu." ¹⁸ Sa lutu vasauri mai matana na ka e vaka na vari ni ika, sa rai rawa sara o koya; sa tucake ka sa papitaisotaki; ¹⁹ Ni sa kana oji, sa kaukauwa mai. Sa jiko o Saula me vica liga na bogi vata ki ira sa lotu mai Tamasiko. ²⁰ Sa vunautakia sara i na vivale ni lotu, ni sa Luve ni Kalou na Karisito. ²¹ A ra sa kurabui keceliga ni ra sa rogocia, a ra sa tukunia, "O koya beka ke se reva ma dau vacavani ira mai Jerusalemi, ara sa masujia na yaca ke? Sa qai volikiga mai vanua ke me vayacoya vakinia, me yadji ira sa vesu tu vi ira na bete levu?"

²² Sa kaukauwa cake mai o Saula, sa vataqayataki ira na Jiu ra sa jiko mai Tamasiko, ni sa vadjinatakia sara ni sa Kaarisito o koya ke. ²³ Sa oji e vica na siga, sa ra qai bosea o ira na Jiu me ra sa vamatei koya. ²⁴ Sa kila o Saula na nodra sa bukiveretaki koya. A ra sa yadravia na vi-matamata ni koro i na siga vata na bogi me ra rawa ni vamatei koya. ²⁵ Sa qai yadji koya i na bogi o ira na nona tisaipeli, ra tukucia sobu i daku ni bai i na dua na sova. ²⁶ Ni sa yaco i Jerusalemi, sa via qai jiko vata ki ira na sa lotu o Saula, a ra sa rarataki koya keceliga, ni ra sa reva ni vadjinajia ni sa lotu o koya. ²⁷ Sa qai yadji koya o Panapasa, sa yadji koya vi ira nai apositolo, sa tukunia vi ira na nona raicia na Turaga i na tolo-ni-sala, sa vosa vokiliga vua, vata na nona vunau vadoudou mai Tamasiko i na yaca i Jisu. ²⁸ Sa jiko vata ki ira, sa qai wavoki vata ki ira o koya mai Jerusalemi. Sa vosa vadoudou i na yaca ni Turaga o Jisu ²⁹ sa vosa ka sa vileji vata ki ira na vulagi mai na vimatanitu tani; a ra sa saga me ra vamatei koya. ³⁰ Ni sa kila o ira na viwekani, ra sa yadji koya i Sisaria, ni ra sa vatalai koya sara yani i Tarisu. ³¹ Sa ra qai cegu nai soqosoqo lewe ni lotu mai Jutia taucoko vata ki Kalili vata ki Samaria ni ra sa vakaukawataki cake; sa dau nodrai varau me ra ravatakia na Turaga, sa vacegui ira na Yalo Tabu, ra sa tubu kinia me ra le levu. ³² Ni sa qai wavoki i na viyasana keceliga o Pita, sa qai sobu vokiliga vi ira na tamata lotu ra sa jiko mai Lita. ³³ Sa raicia kinia e dua na tamata o Inia na yacana, sa davo liga inai davodavo sa yabaki walu, ni sa tauvi koya na mate ni paralase. ³⁴ Sa tukunia vua o Pita, "Inia, sa vabulai iko o Jisu Karisito. Tu cake, vivigia na nomui davodavo," sa tu cake sara o koya. ³⁵ Sa raici koya o ira keceliga ra sa jiko mai Lita vata ki Sarona, a ra sa visau mai vua na Turaga. ³⁶ Sa jiko mai Jopa e dua sa lotu o Tapaica na yacana (kenai balebale o Tokasa"). Sa dauoga sara na yalewa ke i na cakacaka vinaka vata na cakacaka ni loloma sa vayacoya jiko vi ira na dravudravua. ³⁷ Sa yaco na gauna gona sa tauvi-mate o koya, sa ciba; ni ra sa savaji koya oji, ra sa vadavoya i na dua nai taba ni loma ni vale i colo. ³⁸ Me va ni rau sa vivolekaji o Lita vata ki Jopa, ra sa rogocia o ira sa lotu ni sa jiko kinia o Pita, ra sa tala e lewe rua na tamata vi koya, me vamasuji koya "Mo qai vatotolo sara mai" vi ira. ³⁹ Sa qai tu o Pita sa qai vata ki rau. Ni sa yaco yani o koya, ra sa yadji koya ina taba ni loma ni vale icolo, sa tu voleka vua o ira na yada keceliga, a ra sa tagi, sa varaitakia na nonai curucuru eso vata i nai curucuru sa cula o Tokasa ni ma se bula vata ki ira. ⁴⁰ Sa vatalai ira kece yani o Pita mai na rumu, sa tekiduru, sa masu; sa vukicia vake i na yagona, sa tukunia, "Tapaica, tucake." Sa dola na matana, ni sa raici Pita sa mata cake o koya. ⁴¹ Sa dodogia vua na ligana o Pita sa tuberi koya cake; ni sa kacivi ira na tamata lotu vata ki ira na yada, sa varaitaki koya ni sa bula. ⁴² Na ka ke sa kilai mai Jopa taucoko, ra sa le levu ra sa vabaujia na Turaga. ⁴³ Sa jiko voki me bogi vica o koya mai Jopa vata ki Saimoni na matai ni kuli-ni-manumanu.