¹ Sa qai tukunia na bete levu, "Sa djina na vika ke se reva?" ² Sa qai tukunia o Sitiveni, "Ikodou na mataviwekani, vata ki ikodou na matua, dou varorogo mada: "Na Kalou vaiukuuku sa rairai iliu vua na noda matua o Eparaama ni sa jiko mai Mesapotemia, ni sebera na nona jiko mai Karana; ³ sa tukunia vua, 'Qai tani i na nomu vanua ka daini ira na wekamu, ka qai i na vanua au na vatakila vi iko.' ⁴ Sa qai tani o koya mai na vanua o Kalitia ka qai jiko i Karana; sa jiko kinia, ni sa mate o tamana, sa tuberi koya tani mai kinia na Kalou ka sa vajikori koya i na vanua ke, dou sa qai jiko kinia ni kua. ⁵ Sa reva ni solia kinia vua o koya e dua na jiki ni vanua me taukenia, se me butukia i yavana. Sa yalayala liga vua me solia vi koya me taukenia, vi ira vokiliga na nona kawa ka ni sa reva ni dua na luvena. ⁶ Sa tukunia vake vua na Kalou, ni ra na jiko vulagi na nona kawa ina vanua sa reva ni nodra ka na vabobulataki ira ka vararawataki ira me va na drau na yabaki. ⁷ Sa tukunia na Kalou, 'Na matanitu ra na bobula kinia, au na lewa,' sa tukunia na Kalou, 'ra na qai tani mai ka qaravi au i na vanua ke.' ⁸ Sa solia vi Eparaama na Kalou na viyalayalaji ni vicili, sa tamai Aisake o Eparaama, sa bogi walu sa qai cilivi o koya; sa tamai Jekope o Aisake, sa tamadra na le jinikarua o Jekope. ⁹ Ia ni ra sa vuvutaki Josefa o ira na matua vua, ra sa volitaki koya i Ijipita; ia sa jiko vata ki koya na Kalou ¹⁰ ka vabulai koya mai na nona rarawa keceliga. Sa solia vua me vinaka ka vuku i na mata i Fero, na tui Ijipita, sa lesi koya me kovana me lewai Ijipita vata ki ira keceliga na nona le ni vale. ¹¹ Sa qai yaco na dausiga vata na rarawa levu i na vanua taucoko o Ijipita vata ki Kenani, ra sa reva ni raicia na kakana o ira na noda matua. ¹² Ia ni sa rogocia o Jekope ni sa tu mai Ijipita na sila, sa qai talai ira taucoko kinia na noda matua. ¹³ Ia nai karua ni nodra qai sa vatakilai koya o Josefa vi ira na tuakana, sa vatakilai na mataqali ni Josefa vi Fero. ¹⁴ Sa qai talatala o Josefa me qaivi o Jekope na tamana vata ki ira kece vokiliga na nona mataqali, ra sa le vitusagavulu ka lima taucoko. ¹⁵ Sa qai sobu i Ijipita o Jekope, sa mate, o koya vata ki ira na nodra matua. ¹⁶ A ra sa yadjia i Sikemi ka sa bulu i nai bulubulu koya ma volia o Eparaama i na jiki ni siliva eso vi ira na luvei Emori mai Sikemi. ¹⁷ "Ia ni sa voleka na gauna me vayacori kinia na vosa ni yalayala, ka bubului kinia na Kalou vi Eparaama, ra sa qai tubu o ira na tamata me ra le levu mai Ijipita, ¹⁸ ka yacovia na gauna sa buli kinia e dua tani na tui koya sa reva ni kilai Josefa. ¹⁹ Sa lawakitaki ira na wekada o koya ke, ka sa vacacani ira na nodra matua, me ra sa daini ira kinia na nodra gone i tuba me ra kua ni bula. ²⁰ Sa sucu o Mosese i na gauna gona; sa mata vinaka sara i na mata ni Kalou ka sa susugi vula tolu ina vale ni tamana. ²¹ Ia ni sa dai i tuba o koya, sa keveji koya na luvei Fero yalewa ka susugia me luvena. ²² Sa vavulici o Mosese i na nodra vuku keceliga na kai Ijipita, sa kaukauwa i na nona vosa vata i na cakacaka. ²³ Ia ni sa vasagavulu na nona yabaki, sa qai tubu i lomana me via qai raici ira na wekana na luve i Isireli. ²⁴ Ia ni sa raicia e dua vi ira sa vacacani, sa totakia, ka cudruvakia sa vararawataki, ka sa vamavoatakia na kai Ijipita: ²⁵ ia sa nanumia o koya ra na kila na wekana ni sa ligana e na vabulai ira kinia na Kalou, a ra sa reva liga ni kila. ²⁶ Ia i na siga taravia sa basika vi koya e le rua rau sa vivala, sa via vavinakajitaki rau voki, sa tukunia, 'Ikodrau na turaga; drau sa viwekani liga; na cava drau sa vivacacani kinia?' ²⁷ Ia sa biligi koya tani o koya sa vacacania na wekana, ka tukunia, 'O cei sa lesi iko mo turaga mo mai lewai kimamu? ²⁸ O sa via vamatei au beka, me va na nomu ma vamatea na kai Ijipita i nana?' ²⁹ Sa qai tuba o Mosese i na vuku ni vosa gona; sa qai vulagi jiko i na vanua o Mitiani, sa mani sucu kinia e le rua na luvena tagane. ³⁰ "'Ia ni sa oji e vasagavulu na yabaki, sa qai basika vi koya mai vikau e dua na agilosi ni Turaga i na ulu-ni-vanua o Saineai, i na yameyame ni buka i na dua na kau. ³¹ Ia ni sa raicia o Mosese, sa reucalatakia na ka sa raicia; ia ni sa torovia me varaicia sa rogo mai vua na vosa ni Turaga, ka tukunia, ³² 'Oi au na nodra Kalou na nomu matua, na Kalou ni Eparaama, vata na Kalou ni Aisake, vata na Kalou ni Jekope.' Sa sautaninini o Mosese ka sa rava ni varaicia. ³³ "Sa qai tukunia vi koya na Turaga, 'Luvajia tani na nomui vava mai na yavamu, ni sa qele tabu na vanua o sa tu kinia. ³⁴ Au sa raicia djina sara na nodra rarawa na noqu tamata ra sa jiko mai Ijipita; ia au sa rogocia na nodra vutugu, ia au sa qai sobu mai meu vabulai ira; ia ke, mo qai, au sa talai iko i Ijipita.' ³⁵ "O Mosese ke o koya ra sa cajia, ka tukunia, 'O cei sa lesi iko mo turaga ka mo lewa?' - o koya liga ke sa tala na Kalou me turaga kai vabula i na ligana na agilosi sa basika mai vua i na kau. ³⁶ Sa yadji ira yani o Mosese ni sa vayacoya oji eso na ka e vivareucalataki vata nai vatakilakila i na vanua o Ijipita, vata na wasa damudamu vata na vikau ka yabaki vasagavulu. ³⁷ "'O Mosese ke sai koya ma tukunia vi ira na Isireli, 'Ena vatubuya vi ikodou o Jiova na nomudou Kalou mai vi ira na wekamudou e dua na parofita me vataki au.' ³⁸ O koya ke sa jiko ki ira nai soqosoqo le ni soro i na vikau vata ki ira na agilosi sa vosa vua i na ulu-ni-vanua o Saineai, vata ki ira na noda matua, sa rawa o koya na vunau bula me solia vi kita. ³⁹ "Ra sa sece ni talairawarawa vua o ira na noda matua, ra sa biligi koya tani vi ira, sa suka voki na yalodra i Ijipita. ⁴⁰ Ra sa tukunia vi Eroni, 'Caka eso na noda Kalou me ra liutaki kita. O Mosese ke o koya ka yadji kita mai na vanua o Ijipita, da sa reva ni kila se cava yaco beka vua.' ⁴¹ Ra sa caka e dua na luve ni bulumakau i na gauna gona, ra sa vacaboya nai soro i na matakau, ra sa marautakia na cakacaka ni ligadra. ⁴² Sa qai vuki tani na Kalou ka daini ira tu me ra qaravia na vikalokalo ni lomalagi, me va na ka sa volai i na nodrai vola na pavofita, 'Ikodou na mataqali ni Isireli, dou sa vacaboya vi au na manumanu sa vamatei vata nai madrali, i na vikau me vasagavulu na yabaki se reva? ⁴³ Dou sa cola na vale ni Moloke vata na kalokalo ni nomudou Kalou o Remifani, vata na matakau dou ma caka mo dou soro kinia: ia au na yadji ikodou yani me sivi o Papiloni.' ⁴⁴ Sa tu liga vi ira na noda matua i vikau na vale ni Kalou sa tu kinia nai vunau, me va sa vosa kinia o koya ni sa tukunia vi Mosese, me caka me va na kena i vatakarakara sa raicia. ⁴⁵ O koya vokiliga ra sa tauria i muri na noda matua ka ra sa qai yadjia mai o ira vata ki Josua i nodra na vimatanitu tani. Sa vatovoci ira tani na Kalou i na matadra na noda matua. Sa jiko vi ira nai vunau me yacovia na gauna ni Tevita, ⁴⁶ o koya sa lomani mai vua na Kalou, ka sa kerea me nonai tavi e dua na vale me ni koya na Kalou i Jekope. ⁴⁷ Ia o Solomoni liga sa tara na vale me nona. ⁴⁸ Ia, sa reva ni jiko o Koya sa cecere sara i na vale sa caka i na liga, me va na vosa ni parofita, ⁴⁹ 'Na noqui jikojiko vaturaga o lomalagi, vata nai tutu-ni-yavaqu o vuravura, Na vale cava dou na tara me noqu? sa tarogia o Jiova, se na vanua cava me na noqui vavacegu?

⁵⁰ Sa reva beka ni caka na ka keceliga qori na ligaqu?' ⁵¹ "Ikodou na yalokaukauwa, ka reva ni cili na yalomudou vata na daligamudou, dou sa dauvorajia jikoliga na Yalo Tabu; ia o ikodou dou sa vayacoya me vataki ira na nomudou matua. ⁵² O cei vi ira na parofita ra sa reva ni vacacania o ira na nomudou matua? Ra sa vamatei ira ra ma tukunia iliu ni na qai mai o koya na Yalododonu; o koya dou sa qai solia yani ka vamatea, ⁵³ ia sa soli vi ikodou na vunau ni sa tukunia eso na agilosi ia dou sa reva liga ni vabaujia." ⁵⁴ Ia ni ra sa rogocia na vika ke, sa laucoka na yalodra, ra sa vasequruquru baji vi Sitiveni. ⁵⁵ Ia o koya ni sa sinai tu i na Yalo Tabu, sa rai matua i lomalagi ka sa raicia nai ukuuku ni Kalou; vata ki Jisu ni sa tu i na ligai matau ni Kalou. ⁵⁶ Sa tukunia o Sitiveni, "Raicia, au sa qai raicia sa wase rua na lomalagi, ka sa wiri tu na Luve ni tamata i na liga i matau ni Kalou." ⁵⁷ Ara sa qai qoqolou i na domo levu ka tabonakia na qara ni daligadra, ka cici vakaukauwa vua ni ra sa lomavata. ⁵⁸ A ra sa daini koya i nai bili ni koro ka cavokia i na vatu. Ia o ira ra sa beitakia, ra sa vadavoya na nodrai curucuru i na yavana e dua na cauravou na yacana o Saula ⁵⁹ A ra sa vacavoki Sitiveni i na vatu ni sa masu jiko ka tukunia, "Ikonu na Turaga Jisu, tauria na yaloqu." ⁶⁰ Sa tekiduru sobu o koya ka kaci i na domo levu, "Ikonu na Turaga, kua ni cudruvi ira i nai valavala ca ke." Ia ni sa vosa oji vake, sa qai moce.