¹ Sa qai tukunia vi Paula o Akaripa, "Sa qai tara mo vatusai iko mai." Sa qai dodokia na ligana o Paula ka tukuni koya. ² "Au sa nanumakia niu sa kalougata, vi Ikonu Akaripa na tui, niu na tukuni au ni kua i matamunu i na vuku ni ka keceliga ra sa beitaki au kinia na Jiu, ³ ia ni konu sa kila keceliga na nodrai valavala na Jiu vata na vika ra sa dauvilejitakia. O koya gona, au sa masuji ikonu kinia mo nu vosojia mada liga mo nu rogoci au. ⁴ Na noqui valavala niu ma gone ka yacovia na siga ke niu ma jiko vata ki ira na kai noqu mai Jerusalemi. ⁵ Ra sa kila keceliga na Jiu mai liu, o ira ra sa kilai au iliu, ke ra sa via tukunia mai, niu sai valavala va-Farisi me vataki ira ra sa daumuria vatamailalai sara na noda lotu. ⁶ Au sa qai tu vokiliga meu lewai i na vuku ni ka au sa vanuinuitakia na vosa ni yalayala ka solia na Kalou vi ira na nimamu matua. ⁷ Sai koya na ka ke ra sa vakasama me ra rawa o ira na nimamu yavusa e jinikarua, ra dau soro vagumatua i na siga vata na bogi, ia i na vuku ni nuinui ke, i Akaripa na tui, ra sa beitaki au kinia o ira na Jiu. ⁸ E vacava dou sa nanumakia beka ni sa ka e dauvivajijiqataki, me vaturi ira cake voki na mate na Kalou?" ⁹ O au vokiliga, au ma nanumakia i lomaqu ni sa dodonu meu vimecaki i na ka e levu vata ki na yaca i Jisu na kai Nasareci. ¹⁰ Ia na ka vokiliga ke au ma vayacoya mai Jerusalemi. A ra le levu ra sa lotu au ma sogoji ira i na vale ni vivesu, ni ra sa lesi au kinia na bete levu; ia ni ra sa vamatei, au sa tukunia me vakinia. ¹¹ Ia au ma cudruvi ira valevu i na vivale ni lotu keceliga ka vasaurarataki ira me ra dainia na lotu. Ia niu sa cudru valevu sara vi ira, au sa vacaca vokiliga i na vikoro tani. ¹² Ia niu ma qai jiko kinia i Tamasiko ni ra ma lesi au ka talai au na bete levu; ¹³ ni sa siga levu toka liga, na tui, au sa raicia e dua na rarama mai lomalagi, sa uasivia na kena remoremo na mata ni siga, sa cila vavolivoliji au vata ki ira keceliga ra qai vata ki au. ¹⁴ Ia ni kitou sa bale keceliga i na qele, au sa rogocia e dua na domo sa vosa vi au i na vosa va-Iperiu, ka tukunia, 'I Saula, I Saula, o sa vacacani au i na vuku ni cava? E ca vi iko mo caqejia na mata ni moto.' ¹⁵ Au sa qai tukunia, 'O cei o Ikonu, Turaga?' Sa tukunia na Turaga, 'O au o Jisu, o koya o sa vacacania. ¹⁶ Mo tucake liga; ka tu i yavamu; niu sa rairai vi iko i na vuku ni ka ke, meu lesi iko mo italatala vata ki na dautukutuku vokiliga i na vika o sa raici au kinia, vata ki na vika au na rairai kinia vi iko; ¹⁷ niu na vabulai iko mai vi ira na Isireli vata ki ira na kai vimatanitu tani, o ira au sa qai talai iko kinia, ¹⁸ mo qai basukia na matadra, ka me ra saumaki mai na butobuto i na rarama vata mai na kaukauwa vokiliga ni Setani ki vua na Kalou, me ra kua ni cudruvi i nai valavala ca ka me ra itaukei vata vokiliga imuri vata ki ira ra sa yalosavasava ni ra sa vabauji au.' ¹⁹ Ia ni sa oji ke, i Akaripa, na tui, au sa reva ni talaimama i na raivotu valomalagi; ²⁰ au sa tukunia mada iliu vi ira mai Tamasiko, vata i Jerusalemi, vata i na yasayasa kece va-Jutia, vi ira vokiliga na kai vimatanitu tani, me ra vivutuni ka saumaki mai vua na Kalou, ka vayacoya nai valavala e kilikili vata na vivutuni. ²¹ O koya gona, ra sa tauri au kinia na Jiu i na vale ni soro ka saga me ra vamatei au. ²² Ia sa vukei au na Kalou meu bula kinia ka yacovia na siga ke, ia au sa tukunia jiko vi ira ra lalai vata ki ira vokiliga ra sa cecere ni sa reva na ka tani au sa tukunia koya liga ra ma tukunia, na parofita vata ki Mosese ni na yaco mai, ²³ ni na mate na Karisito , ni na kedrai matai ra na tucake voki mai na mate ka na vatakila na rarama vi ira na tamata na Isireli, vi ira vokiliga na kai vimatanitu tani." ²⁴ Ia ni sa tukuni koya jiko vake o koya, sa vosa i na domo levu o Fesito, "I Paula, o sa lialia; sa valialia iko na nomu vuku." ²⁵ Sa tukunia o koya, "I Fesito, vaturaga sara, au sa reva ni lialia, au sa cavujia liga na vosa djina ka vuku. ²⁶ Ni sa kila na vika ke na tui; ia au sa vosa doudou kinia vua, niu sa kila sa reva ni vuni vi koya e dua na ka; ni sa reva ni caka na ka i na dua na yasana vuni. ²⁷ I Akaripa na tui, o nu sa vadjinaji ira na parofita se reva? Au sa kila konu sa vadjinajia liga." ²⁸ Sa qai tukunia vi Paula o Akaripa, "Sa vo va lailai mo rawai au meu lotu va-Karisito?" ²⁹ Sa qai tukunia o Paula, Au sa masu vua na Kalou, e reva i na vukumu duadualiga, i na vukudra kece vokiliga ra sa rogoci au ni kua, se me vo valailai se me kua liga ni vo, mo udo vataki au, ia me kua liga i na sinucodo ke" ³⁰ Sa qai tucake na tui, vata na kovana, vata ki Perinaise, vata ki ira ra sa jiko vata ki ratou; ³¹ ia ni ra sa qai vajikijiki tani, ra sa vivosaki vataki ira ka tukunia, "Na tamata ke sa reva ni vayacoya e dua na ka sa dodonu me mate kinia se me vesu." ³² Sa qai tukunia vi Fesito o Akaripa, "Na tamata ke sa reva ni cavuji Sisa me lewai koya, sa dodonu liga me sereki."