¹ Ia kau sa lewa va ke i na lomaqu, meu kakua ni qai voki vi ikodou i na vivararawataki. ² Ia kevaka kau sa vakararawatakia na lomamudou, o cei sa vamarautaki au, o koya duadua liga au sa vakararawatakia? ³ Ia kau sa vola vakinia vi ikodou, de vararawataki na lomaqu, niu qai yani i na vukudra meu marau kinia, kau sa vararavi liga vi ikodou kece ni sa nomudou kece liga na noqu marau. ⁴ Ni sa rarawa valevu ka yaluma na lomaqu niu a vola vi ikodou, a sa va wai valevu na mataqu, sa reva ni dou rarawa kinia, ia mo dou kila liga ni sa levu sara na noqu loloma vi ikodou. ⁵ Ia kevaka e dua sa ia na vivararawataki, sa reva ni vararawataki au liga o koya, ia (meu kakua ni bilitaki valevu) oi ikodou kece voki liga. ⁶ Sa rauii koya vakinia na kena i sau ke, sa yaco vua mai vi ira na lewe levu. ⁷ Ka sa kilikili cake kinia mo dou kua soii ni cudruvia, ka mo dou vaceguya, de luvuci koya sa va ke na nona rarawa levu sara. ⁸ O koya ke kau sa masuji ikodou kinia, mo dou vadjinadjinatakia na nomudou loloma vi koya. ⁹ Ni sa ka voki liga ke au sa vola yani kinia, meu kilai ikodou kinia, se dou talairawarawa i na ka kece liga, se reva? ¹⁰ Ia kevaka dou sa reva ni cudruvia e dua i na dua na ka, au sa va voki liga oi au, ia kevaka au sa reva ni cudrutakia e dua na ka, sa i ikodou liga au sa reva ni cudrutakia kinia, i na mata i Karisito. ¹¹ Me kakua ni rawai kita o Setani: ni da sa reva ni nanulevajia na noda dau lawaki. ¹² Ia niu a qai i Tiroa e na vuku ni tuktutuku vinaka i Karisito, a sa dola vi au na turaga. ¹³ Sa reva ni cegu na yaloqu niu sa reva ni raici Taito na wekaqu: au sa qai tatau vi ira, ka qai tani ki Masitonia ¹⁴ Me caka na vavinavinaka vua na Kalou, o koya sa tuberi kitou iiko liga i na marau i na yaca i Karisito, ka sa vatakila vata vi kitou i na yasana kece liga ni sa boi vinaka na kilai koya. ¹⁵ Ni sai Karisito kitou sa boi vinaka kinia i na mata ni Kalou, vi ira sa vabulai iiko, vi ira voki liga ra sa varusai iiko. ¹⁶ Vi ra ke sa boiboi vivamatei me ra mate kinia, vi ra qori sa boiboi vivabulai me ra bula kinia, ia o cei sa rawajia na vika ke? ¹⁷ Ni kitou sa reva ni dau vatanitakia na Vosa ni Kalou me vataki ira na lewe levu, ia kitou sa vataki ira sa djina sara, me vaka sa mai vua na Kalou, i na mata ni Kalou, kitou sa vosa i na yaca i Karisito.