¹ 1Dou vadamurimuri au, me va au sa muri Karisito. ² Ia au sa dokai ikodou, na viwekani, ni dou sa nanumi au i na ka keceliga, ka vabaujia nai vavuvuli, me va au a solia vi ikodou. ³ Ia au sa vinakajia mo dou kila ni sa ulu ni tamata yadua na Karisito; ia na ulu ni yalewa na tagane; vata ki na ulu i Karisito na Kalou. ⁴ A tagane yadua, sa masu se parofisai, ni sa ubi na uluna, sa reva ni doka na uluna. ⁵ Ia na yalewa yadua sa masu se parofisai ni sa reva ni ubi na uluna, sa reva ni doka na uluna: ni sa tautauvata liga ni sa tasi. ⁶ Ia ke sa reva ni ubi na yalewa, me tasi vokiliga: ia ke sa ka ni vivamaduataki me koji na yalewa se tasi, me qai ubi. ⁷ Ni sa reva sara liga ni dodonu vua na tagane me ubia na uluna ni sai yaloyalona vata ki na kenai ukuuku ni Kalou o koya: ia na yalewa nai ukuuku ni tagane. ⁸ Sa reva ni vu mai vua na yalewa na tagane; sa vu mai vua na tagane na yalewa. ⁹ Ni sa reva ni buli na tagane me nona na yalewa; sa buli liga na yalewa me nona na tagane. ¹⁰ O koya ke sa dodonu kinia me tu nai ubi i na ulu ni yalewa mei vatakilakila ni kena malumalumu, i na vukudra na agilose. ¹¹ Ia sa reva ni tu duadualiga na tagane ka me tu tani na yalewa, se tu duadualiga na yalewa me tu tani na tagane i na Turaga. ¹² Ni sa vu mai vua na tagane na yalewa, sa va vokiliga kinia na tagane i na vuku ni yalewa; ia sa vu mai vua na Kalou na ka keceliga. ¹³ Dou lewa vai ikodou: sa kilikili kaya na yalewa li me reva ni ubi ni sa masu vua na Kalou? ¹⁴ Sa reva li ni vavulici ikodou na nodai tovo vatamata, ke sa balavu na drau ni uluna na tagane, sa ka ni vivamaduataki vua? ¹⁵ ia ke sa balavu na drau ni uluna na yalewa, sa nonai ukuuku liga: ni sa soli vua na drau ni uluna me kenai ubi? ¹⁶ Ia ke sa via dauvileji e dua, sa reva ni nitou i valavala ke, se na nodra na visoqosoqo lewe ni lotu ni Kalou. ¹⁷ Ia niu sa varojia jiko ke, au sa reva ni dokai ikodou, ni dou sa reva ni vinaka cake ni dou sa soqoni vata, ia dou sa ca sobu kinia. ¹⁸ Io, na kenai matai, ni dou sa soqoni vata vaisoqosoqo lewe ni lotu, au sa rogocia ni dou sa dauvisei; ia au sa vadjinajia eso: ¹⁹ ni sa dredre me reva ni tubu na dauviba vi ikodou me rairai kinia o ira vi ikodou ra sa vinakaji. ²⁰ Ia ni dou sa soqoni vata i na dua na yasana, dou sa reva ni caka djina nai vayakavi ni Turaga. ²¹ Ia ni dou sa kana, dou sa dui kania yadua eliu na kenai vayakavi: a sa viakana kinia e dua, ka mateni e dua. ²² Oi? sa qai reva beka na nomudou vivale mo dou kana ka somi kinia? se dou vamaduataki ira beka sa reva na nodra, ka beca nai soqosoqo lewe ni lotu ni Kalou? A cava meu tukunia vi ikodou? meu dokai ikodou li i na ka ke? Au sa reva ni dokai ikodou. ²³ Niu a rogocia mai vua na Turaga na ka au a tukunia vokiliga vi ikodou, Ni sa tauria nai buli madrai na Turaga o Jisu i na bogi sa soli yani kinia o koya: ²⁴ ia ni sa vavinavinaka oji sa dovia, ka tukunia: Ke na yagoqu sa dovi i na vukumudou; caka ke mo dou vananumi au kinia. ²⁵ Sa va vokiliga kinia na bilo, ni sa kania oji nai vayakavi o koya, sa tukunia, "Na bilo ke na viyalayalati vou i na noqu dra; i na gauna keceliga dou sa somia kinia, dou caka ke mo dou vananumi au kinia. ²⁶ Io, i na gauna keceliga dou sa kania kinia na madrai ke, ka somia na bilo ke, dou sa vatakila kinia na nona mate na Turaga, ka yacovia na nona qai mai. ²⁷ Ia ina tarogia kinia i na vuku ni yago ni Turaga vata ki na nona dra, o koya yadua ena kania na madrai ke, ka somia na bilo ni Turaga, ka reva ni doka. ²⁸ Ia me dikevi koya mada na tamata vai koya, me qai kania na madrai o ya, ka somi i na bilo ko ya. ²⁹ Ni sa kania ka somia na nona cudruvi o koya sa kania ka somia ka reva ni doka, ni sa reva ni kila na yago ni Turaga. ³⁰ I na vuku ni ka ke sa lewe levu kinia vi ikodou sa malumalumu ka tauvimate, ka lewe levu sa moce. ³¹ Ia, ke kita sa lewai kita, kita na reva ni lewai. ³² Ia ni da sa lewai, sa qai cudruvi kita na Turaga, me da kua kinia ni lewai me cudruvi vata ki ira ra sa vavuravura. ³³ O koya ke ikodou na wekaqu, ni dou sa soqoni vata mo dou kana, dou viwaraki mada. ³⁴ Ia ke sa viakana, me kana liga mai vale; mo dou kakua kinia ni soqoni vata mo dou cudruvi. Ia na ka sa vo au na vadodonutakia niu sa qai yani.