¹ Oi au o Paula, ma kacivi mei apositolo i Jisu Karisito, i na lewa ni Kalou, vata ki Sosiceni na wekaqu, ² vi ira nai soqosoqo lewe ni lotu ni Kalou ra ma jiko mai Korinica, vi ira sa tu vata ki Karisito Jisu ka sa vasavasavatakia, ra sa kacivi me ra yalosavasava, vata ki ira keceliga i na viyasana keceliga ra sa masujia na yaca i Jisu Karisito na noda Turaga, io, na noda vata ki na nodra vokiliga: ³ Me yaco vi ikodou na loloma, vata ki na vacegu, mai vua na Kalou o Tamada, vata ki na Turaga o Jisu Karisito. ⁴ Au ma vavinavinaka i na visiga vua na noqu Kalou i na vukumudou, i na vuku ni loloma ni Kalou sa soli vi ikodou i na vuku i Karisito Jisu; ⁵ ni dou sa vavutuniyautaki i na ka keceliga i na vukuna, i na vosa keceliga vata ki na vuku keceliga; ⁶ me va ni sa vadjinadjinatakia vi ikodou nai tukutuku vata ki Karisito: ⁷ ka dou ma reva kinia ni vinaka sobu i na dua nai solisoli vayalo: ni dou sa warakia na kena varairaitaki ni noda Turaga o Jisu Karisito: ⁸ o koya ena vataudeitaki ikodou me yacovia na kenai vataojioji, mo dou reva ni cala i na siga ni noda Turaga o Jisu Karisito. ⁹ Sa djina na Kalou, o koya ma kacivi ikodou mo dou nonai tokani ni Luvena o Jisu Karisito na noda Turaga. ¹⁰ Ia au sa vamasuji ikodou, na viwekani, i na yaca ni noda Turaga o Jisu Karisito, mo dou tauvata keceliga i na vosa, ia me reva vi ikodou na visei; mo dou vivinakaji sara ni dou sa lomavata ka lewa vata. ¹¹ Ni sa tukuni ikodou mai vi au, ikodou na viwekani, o ira na lewe ni vale i Kiloi, ni dou sa dauvileji vai ikodou. ¹² Ia na ka ke kau sa vosa kinia, ni dou sa tukunia yadua, Oi au sa ni Paula; ia, Oi au sa ni Apolosa, ia, Oi au sa ni Kifa; ia, Oi au sa ni Karisito. ¹³ Sa tawase beka na Karisito? sa vakoji beka ki na kauveilatai i na vukumudou o Paula? se dou sa papitaisotaki beka i na yaca i Paula? ¹⁴ Au sa vavinavinaka vua na Kalou niu sa reva ni papitaisotakia e dua vi ikodou, oi rau liga o Kirisipo vata ki Keio; ¹⁵ de tukunia e dua ni dou sa papitaisotaki i na yacaqu. ¹⁶ Au sa papitaisotaki ira vokiliga na lewe ni vale i Sitifana: ia au sa reva ni nanumia ni au sa papitaisotakia e dua tani voki. ¹⁷ Ni sa reva ni talai au na Karisito meu vipapitaisotaki, meu vunautakia liga nai tukutuku-vinaka: ia ka reva liga i na vosa sa vuku, de vatawayagataki kinia na kauveilatai i Karisito. ¹⁸ Ni sa ka lialia vi ira sa rusa na kena vunautaki na kauveilatai, ia sa kena kaukauwa liga ni Kalou vi kita sa vabulai. ¹⁹ Ni sa volai, Au na varusa na nodra vuku era sa dauvuku, Ka vatawayagatakia na nodra yalomatua era sa dauyalomatua. ²⁰ Ivei na vuku? Ivei na vunivola? Ivei na dauvileji ni vuravura ke? sa reva beka ni valialiatakia na vuku ni vuravura ke na Kalou? ²¹ Io, ni sa vuku tu na Kalou, ra sa reva ni kila na Kalou na kai vuravura i na nodra vuku, sa qai vinakajia na Kalou me vabulai ira ra sa vabaujia, i na vosa valialia. ²² Ni ra sa tarogia nai vatakilakila o ira na Jiu, a ra sa vasaqara na vuku o ira na kai Kirisi: ²³ ia kitou sa vunautaki Karisito ni sa lauvako ki na kauveilatai, a ka ra sa tarabe kinia o ira na Jiu ka sa ka lialia vi ira na kai Kirisi: ²⁴ ia vi ira liga era sa kacivi, se ra Jiu se ra kai Kirisi, na Karisito na kaukauwa ni Kalou, vata ki na vuku ni Kalou. ²⁵ Ni sa ka vuku na sesewa ni Kalou ka sa vinaka vi ira na tamata; a sa kaukauwa na malumalumu ni Kalou me vinaka vi ira na tamata. ²⁶ Ni dou ma raicia, na viwekani, na kenai valavala ni nomudou kacivi, ni sa reva ni lewe levu ra sa vuku vayago, sa reva ni lewe levu ra sa kaukauwa, sa reva ni lewe levu ra sa turaga me sa kacivi: ²⁷ ia sa djigitakia na Kalou na vika valialia i vuravura, me vamaduataki ira na vuku; ia na vika sa malumalumu i vuravura sa djigitakia na Kalou me vamaduatakia na vika sa kaukauwa; ²⁸ vata ki na vika vakaisi e vuravura, vata ki na vika e beci, sa djigitakia na Kalou, vata ki na vika sa reva laliga, me varusa na vika sa tu dei; ²⁹ me reva kinia na tamata me dokai koya i na mata ni Kalou. ³⁰ Ia maivi koya liga dou sa tu vata kinia ki Karisito Jisu, o koya sa caka na Kalou me vu ni vuku vi kita, ka vu ni vadonui, ka vu ni vasavasavataki, ka vu ni bula; ³¹ me yaco kinia na ka sa volai, O koya sa vosa doudou, me vosa doudou i na vuku ni Turaga.