¹ Iyacatee aberi asiali Ramataim neni siseride Zofim nese, Efraím iyacalena analimerica, ipidenericate Elcana, iruquei Jeroham, iirica yai Eliú, iirica yai Tohu, iirica yai Zuf, aberi efrateo. ² Idenicate puchaiba yacawetowa, uni idabechuaca yacawetoca uipidenaca Ana, ya uai aibaca uipidenaca Penina. Uai Penina udenieca uenibewa, quewa ya uai Ana canaca udenieri uenibecawa. ³ Ya asialica yacawa sisa iyacalee nesewa, camui idenaminamaa, ya yanaca inuaca cuwesi irii yai WAIWACALI, chai Silo neni. Niae puchaiba Elí yenibeca, Ofni ya Finees, nacai ibeideiyeica WAIWACALI irii, nayaca neni. ⁴ Ya yanaca eeri Elcana yacatei pinacawa inuaca irii cuwesi, iyuwata macai camui, caita nacai yacaa wasu inasi uai yacaweta Penina, caita nali macaita niae yenibe cawa. ⁵ Quewa ya yacaa manui yawani uli aai Ana, iwawa caina uai Ana, ewitaca camita ide WAIWACALI yaca uli uenibenei pina. ⁶ Ya uai uema (Penina) usaicaca uni wawasi macai eerita iwerete ide ubeiniedaca, camita caina WAIWACALI imaca udenieca uenibewa. ⁷ Nese camui idenaminama uacaliwa WAIWACALI icape iricule uenanei yapichawa, ua uema (penina) macai erita usaicaca uli wawasi. Iwalise ya uichanica camita nacai uya uyacalewa. ⁸ Ya uacaweri Elcana imacaa uli: "Ana, ¿canasi pichani? ¿Cana camita nua mainiri? ¿Cayabaca piri pina naicha niai diez (10) penibecawa? ⁹ Nese idenami yai wawasica, Ana imichacawa idecanami uyaca ya uiraca uyacalewa Silo neni. Ya Elí icuerica Dios icape yaunericawa yalubai inata iwaluanacawa yai icapenumaca ya naiwacali icapeca. ¹⁰ Ya awisisiwata uwawa ya utanica yapicha yai iuwacalicawa nese ya uichanisiwacata. ¹¹ Ya umacaca aberi tacaisi ya umaca: "WAIWACALI iri, picacali utulecana uai piasu weneiwica ibaidechuca ya pemiaca nacai usana, camita pimaicha ua, ya piaca uli aberi sumai nese ya nuaca nuiwicali iri macai erita ya nucaucacawa, camita pinata iria ya iwitabainacawa". ¹² Ya ua idecunitacawa itanica WAIWACALI, yapicha, Elí icuaca icawa ya unumaca. ¹³ Ana itanica uwalicuta. Ya udule iwenuenicawa, ya usanaca camita asai isaná ya Elí imacaca ucamaca. ¹⁴ Ya Elí imaca: ¿Caina idecuni pina picamaca? ¡Yacata inumamira pimaca ya irracalesica! ¹⁵ Ya Ana yebaca isana: "Camita, abechua inaneica nua yai awisichua ina. Canata nuireri irracalesica, canata aiberi irracalesi cachainirica, nuyaca nucutaca nuwawa iricuisewa Nuiwacali ichawa". ¹⁶ "Pica pinidawa uasica nuasu weneiwicaca abechua inanei bawechua; manuicata nacai uica uwawa Waiwacali iwali ya aibali achumacata nacai uwawa". ¹⁷ Ya nese Elí yebaca usana ya imaca uli: "Piaba casimaita ya caina Dios Israel yasu imani pinaca yai picuterica icha". ¹⁸ "Ya umaca: "Pimaca ua piasu weneiwica yanaca yai ucuterica pipichale". Nese ua inanai uacawa ayapu iricuba ya uyaca nacai uyacalewa ya camita awisi ya unanica. ¹⁹ Ya namichacawa mapisaita ya nacutaca niawawa WAIWACALI icha, nese ya nepuacawa ale nacape iyerica Rama neni. Elcana imaca uapicha uai yacawetua Ana, ya WAIWACALI yemiaca ucuterica. ²⁰ Nese eeri ichabacadenamiwa, ya Ana idericuca ya asaica aberi uiri asiali. Ya uaca ipidena Samuel umaca: "Nucuteri caina WAIWACALI ichani". ²¹ Aberi yawiri mamaladecata, Elcana napicha macaita niai yenaneicawa, nairiecawa nacatena WAIWACALI cayaberi camui iwali ya napaidaca nasu wawasicawa. ²² Ya ua Ana camichuta yawa; ya umaca uacaweri iriwa: "Nua camichuta yawa iwereta ideca imaca irraca ya inisica; nese pina ya nutecani, cai pina ya yewaca iyaca WAIWACALI ipichale ya iyaca neni cairipinata". ²³ Ya uacaweri Elcana imaca uli: "Pimani ya cayaberica picaca. Pimaca ide imaca ya inisica; aberita WAIWACALI imani ya itacaicawa nese ya inaneica uyamacawa ucuaca ya uiricawa idecataleta imacaca ya inisica. ²⁴ Ya idecanami umaca icha ya inisica, uedaca ya sumanica, aberi paca yapicha idenieri maisiba camui, veintidós (22) kilos inasii, abechua botella irracalesi, uanaidaca WAIWACALI icape nere Silo. Nese yacawa sumanaica achumericawa. ²⁵ Ya nanuaca yai pacaca nese nate Elí yatale ya sumaica. ²⁶ Ya umaca: ¡Oh, pia nuiwacalica! Caide iyuwata piyana, pia nuiwacalica, nuacata uai inanai iyechu chai itanichuca irri yai WAIWACALICA piapicha. ²⁷ Yaca nucuteri sumaica yai WAIWACALI yemiaca nusana. ²⁸ Ina ideca nuepodaca WAIWACALI irini, idecunitaca iyaca, ibaidapinaca WAIWACALI iri". Ya ibaidaca WAIWACALI iri neni.