¹ Tela imamala alele egiteu la Disaipel gomai te Isus egite viala mago, "Ere isasa eiage uru tela mautu la sagegela tela la uru?" ² Tio e Isus goio tolea e guliki isa Bisi,eia vimagiri posea kabili tegiteu, ³ eia goio veia giteu mago,Eau vei selea mutou, Mae amuto kamage vulo la vulo mutou ge sibitala maroka mae e guliki bisiele,Amuto kama karamuli ge goilo tela mautu la sagegela. ⁴ Mae la tahalo isasa eiage vagotalo lou eia mae e guliki bisie le, Eia moli koramuli ge tiroro soilo tela mautu la sagegela te la tahalo uru. ⁵ Eme ere kaka tavu isa e guliki bisisi mae aleie oilo tela isagu,Me alele eme abi eau soilo taume. ⁶ Mae la tahalo isasage viruru isasa egite bisisi ale roromuli eau,A taritigi moli mae ge kisia la holola isauru la wati ge pigi tilomua olau la tia la utu. ⁷ La tikumula ge tela mautu la magasa lavuhula la imala buroru! La imala alele ge gomai sele Age la ilo burukola te la tahalo ale poga tavu la imala alele ⁸ Maege la limamu me la vahamu ge virurumei,eia taritigi emege vali taroa ge pigia.A tartigi ge abi la mahulila ale la tapasila ouka, mae la vahamu ge isasa moli, eala moli akama taritigi mae ge goio la havi vikapopo mela limamu mela vahamu tomi. ⁹ Mae la matamu igo boru mei, Eia taritigi emege suba taroa pigia, eia taritigi emege abi la mahulila ale la kaluvula ge ouka vikapopo mela matamu isasa moli,eala moli eia kama kokora mae emge goilo la havi bibila vikapopo mela matamu ilua. ¹⁰ Emege mata tigi taho,soukage emege muku pile isa tegite bisisisi ele, Eau veiseleamu,oilo tela la ilo lalage egite tahoka e angelo tegite oio, egite pou sele tela lalagu le tete, ale oata la ilo lalage. ¹¹ E latula la tahalo gomaige vimahulli la valua me hatavile ale kokovuti tela vulovulo ale kama kokora. ¹² Eme gabutala mave? Mae la tahalo isa taola la sipsip salatu sasa, me isa goio ruru, Eia ge piligi egite la sipsip ale savulu valasiu gete valasiu oio tel vai la olu,me eia kama goio ge pamuli ale isasa kokovuo? ¹³ Mae eiage pogea,Eau veiseleamu, eiage sagege pepeho teale isamoli eia suvititia le, loio teale savulu valasiu gete valasiu egite kama ruru. ¹⁴ Tela gauru moli alele, E tama mutou ale oata la mori kama masaga isasa tegite guliki ge kokovu. ¹⁵ Maege e tabaramu isa ge igo la iruru soio tame, goio veiala la iruru tetala, age kabili tamulua moli, mae eiage lolome,emege abi rivu e tabaramuele me amula ge vipuhi tigilou. ¹⁶ Ala moli mae eia kamage lolo la merera taume,puli lou tahosa ouka taholua, Amuto ge pou vikapopo ge lapu matata la iruruele. ¹⁷ Maege eia kamage lolo la merera tegiteu, emge abila la paga alele soio tela lotu, maege eia kamage lolo la merera tegite la ururu la lotu, hilo eia mae la tahalo la ilabila wati ouka la tahalo e Juda ¹⁸ La selela eau ge veia mutou,la papaga tomi ale eme kisitolea otalo la magasa,la tahalo uru tai ge kisia oata la ilo lalage,me larova tomi eme kopea otalo la magasa,la tahalo uru tai ge kopea oatala la ilo lalage. ¹⁹ Eau ge vei loua mutou,Mae taholua ge vikapopo la tia gira ge isasa moli,larova egira kakea,Me e tamagu oata la mori ge abia gira la rova egira kaka eia ovola. ²⁰ Tela ba ale mave taho lua ouka taho tolu, egite vikapopo oiolo te la isagu,me eau ge pou kabili vikapopo me giteu. ²¹ Mulmuli Pita goio tahi e Isus, Eau ge lube la iruru te tabaragu tagara iriva, mae eia ge igo la iruru somai taku? soioge vaka vitu ia? ²² E Isus veiala mago, eau kama veiamu vaka vitu, ouka, emege lube la iruru tetala karamae savulu vitu gete vitu. ²³ La mautu la sagegela te tahalo uru eia mae e king isasa,masaga ge lapu matata la makodo vikapopo me egite la valua la igogolu tetala. ²⁴ La imamala eia soko la ilapu matata la makodo,egite puli isa la tahalo la igogolu tetala somai, eia makodo la beki la wati la silva 1000, oio te king. ²⁵ Eala moli eia kama tahoka la wati ge koli la makodo tetala, La mulugaluga te tala igo isa la merera ale vagari,viage baha la tahalo la igogolu tetala, e rutula me latatula vikapopo mela golgolu tetala tomi,ge koli la makodo tetala . ²⁶ Tio, la tahalo la igogoluele boru lagutugu otalo,eia veiala mulugaluga tetala mago, emege gogo eau, eauge koli rivuamu la papaga tomi. ²⁷ Ala la mulugalua tetala,gogo seselea la tahalo la igogolu tetalale,eia goio lube la iriru tetala,me eia bahataroa eia tuga. ²⁸ Goio la tahalo la igogolu tuga goio poga isa la tahalo ale egira vigogolu tomi, la tahalole makodo oio tetala la salatu isasa, eia goio beberoboa,eia viala mago,abirivuagu la makodo tegaku. ²⁹ la tahalole goio lagutugu otalo, eia goio veiala mago, eme gogo eau, eauge koli rivu la makodo taku soio taume. ³⁰ Alamoli la muluga la tahalo la igolu kama masaga,Goio a tuga goio laba eia soilo la luma la totorobo karamae age loto rivuala la makodo tetala. ³¹ La imala la tahalo la igolu tetala hilo larova sibitala,La ilo gite buruko sele, Egite gomai tela la mulugaluga tegite veiala la rova tomi ale sibitala tio. ³² La mulugaluga tela tahalo la igolu tola eia, Goio veiala,Eme la tahalo la igolu ale kamakora, Eau lube la iriru taume tela makodo taume, la vuhula eme kaka tavu eau. ³³ Mave eme kama gogo la tahalo la igolu taume,mae ale eau gogome? ³⁴ La mulugaluga tetala igotolo a tau eia soio tegite ale ge abiala la iligiligi karamae age loto la makodo. ³⁵ E tamagu tai oata la mori ge igo taia muto,Mae moli isasa tamuto kamage lube la iruru te tabarala loilo la hatela