अध्याय १
1
येशु ख्रिस्ता दास पौल, आने तीमथ्य होवेने; आने आमा आरी काम केअनारो आने आमा जीयाप खुब मोया हाय अेहडो फिलेमोन ईयाल,
2
आने बोही अफ्फिया इयुल आने अर्खिप आमा हेंगातयो शिपाई ईयाल आने तोअ कोअ जी ख्रिस्ता मोंडली हाय तियुल,
3
देव आपु बाहाको आने प्रभु ख्रिस्ता इया होवेन्यो तुमहाल कृपा आने शांती रेअ .
4
माय मआ प्रार्थनाम सदानेकदा तोअ याद किइने, मा देवा उपकारस्तुती किअहु ;
5
काहाका प्रभु येशुप ताेअ जो विश्वास हाय आने होग्गे विश्वासी माहाव तो माया हाय, तिया विषय माय उनालो हाय.
6
आने एहकी प्रार्थना कीहु का तुमाहाम रेअनारो ख्रिस्त येशुमेने प्रत्येक हाऱ्या गोठ्या पुरे ज्ञान विजाय ताहा तुमा विश्वासाम सहभागीपण कार्यकेअनारे वेअरी.
7
आने तोअ मोया की माल खुब खुशी आने सांत्वन लागी आने हे पावुहु, तो लीदे पवित्र लोकहामोने समाधानी वेअ.
8
इयाकेअता जो हारोहाय तिया तुल आज्ञा कीइन अखुला जाहा मला ख्रिस्ता द्वारे पुरो धैर्य हाय.
9
तेबी माय डायो पौलुस जो आमी ख्रिस्त येशु केअता बंदिवान हाय तेबी मोयहाकी विनती केअनु मान हारो वाटी.
10
माय जेलुम आथो ताहा जियाल आध्यात्मिक जल्मो देदो तो मा पोयरो अनेसिम इया विषय तुमहान विनंदी कीहु.
11
तोअ पेहला तुल कयुज कामानेय आथो, पेन आमी तुल आने माले आपु बेण्याहाल बी उपयोगी हाय.
12
तियाहाल मायुहुय मा जीवालाज, तोही फासो मोकल्यो.
13
सुवार्ते केअता आय बंधनाम पोडलो आथो तोअ शिवाय तियाहाय मा सेवा केअरा जोजे आखीन तियाल मा आरी थोवा मा मानाम आथो.
14
पेन, तोअ इच्छा शिवाय काय की नाहा सेकतो काहाका माल हारो नाहा लागतो, तो इ उपकार दबावाम नाहा पेन आनंद की केअरा जोजे.
15
देवाय तियाल ईया खातोर अलग केअराव्यो वेअरी काहाका सदाकांदाअ केअतअ तोज वेअरा जोजे.
16
आमी फसो दास जेहडो नाहा, पेन दसादेख जाअखे मेराला पावाहा ऐहंडो वेअरा, तो माने खुब मेरालो हाय पेन डिलाहोस ने प्रभुम तुला कोअतो जाहाको मेरालो वेअरा जोजे.
17
तो तियाले तु माल भगिदार हमुजुतो वेअरी, तोअ आयज हाय एहेकी मानीलेवनु.
18
तियाहाय तोअ काय नुकसान केअलो वेअरी नेता तो काय देवनु वेअरी ते माअ हिशोबाम मांड.
19
आय पौल इ आखु सोता आथाकी लिखुहु; आय सोता फेड केअहे. शिवाय तु सोता माआ कर्जो हाय, पेन इया उल्लेख आय केअतो नाहा.
20
ऐ पावुहु, प्रभु खातोर मापे ओतो उपकार केअ; ख्रिस्ता नावाम मा जिवाल आराम देअ.
21
तु इ मनोहो एकी खात्री कीइन माय तु लिखहे; आने आय जाहु के, तुमा मा आखुला केअेता बी जाहाको तु केअहे.
22
शिवाय माअ खातोर रेउलु व्यवस्था की थोव काहाका तुमा प्रार्थनाकी माआ तुमाहाय आवुलु विई ऐखी माय आशा कीहु.
23
ख्रिस्त येशुम माआरी जेलाम हाय तो एपफ्रास ओ तुल सलाम मोकलेहे.
24
आने तेहेकज माआ आरी रेअनारा मार्क, अरिस्तार्ख, देमास आने लुक ऐ तुमाहाल सलाम मोकलुताहा.
25
आपु प्रभु येसु ख्रिस्त इया कृपा तुमा आत्मा आरी रेअ. आमीन.