¹ येशु ही त्या लोकाहाल आख्यो, आय तुम्हाल खोरो आखु इही उभे रेहले जे बाकी लोकु हाय जिआल देवा राज्या सामर्थाकी आवनु देखाय तावलुग तियान मोअनु अनुभव नाय आवे. ² फाची खुब दिहानंतर येशुही पेत्र, याकोब आने योहान लिन तो डोगाप गियो तियाहा हुबुर तिया रुपांतर वियो. ³ तिया पोतडे खुब चोमकुनारे आने उजले आथे, ओते उजले आथे पोगाम केल्लाज गोठील नाय की शकी ऐहेडे वी गिहले. ⁴ ताहा माेशे आने एलिओ तिइया आरी प्रोगाेट विइओ, बेनी येशु आरी गाेठ्या केतुला. ⁵ पेत्राय येशुल आख्यो "देवा तुमाहा इही हाय इ हारो हाय आपु तिन मांडवा बोनवु एक तुमा वाटो, एक मोशया वाटो आने एक एलिया वाटो". ⁶ पेत्र ऐहकी गोग्या तियाल काय गोगनु तो होमजातलो नाय, काहाका ते बीगिइले आथे. ⁷ ताहा एक वादलो तिइआ ऊचे आलो आने तियाआन सावली केअेई. फासी वादलामाने आवाज आलो “ओ मा मेरालो पोयरो हाय इया तुमा उनाया”. ⁸ अचानक तियाई सोमकी वेयो ताहा तियान येशु सिवाय केडोज नाय देखायो ⁹ ते डोगापने अेठा उतअतुला ताहा येशु तियान आज्ञा केयी तुमाही जो वेअलो हाय तो येशु मोअलामेने उठे हुदु केडालुज मा आखाहा. ¹⁰ तिआल ती गोठ तियाही तियाआमुज थोवी, पेन ते मोअलाआमने उठनु अर्थ काय हाय तियाआरी एक बिहीरा आरी गोठ्या केअतले . ¹¹ येशुही तियाल फुच्यो ‘पेहलीदाव एलीया आवा जोजे ऐहकी नियमशास्त्रामने मास्तुर काहा आखता. ¹² तो तियान आखे, होव एलिया पेहलादाव आवीन होग्या गोठ्या हारी रीती केहे, पेन माआहा पोयरा कहेता तियाआय खुबे त्रारास केरा पोडी, आने तियाल नाकाराम आवी ऐहेकी पवित्र शास्त्राम लिखला हाय ? ¹³ आय तुमाहान आखे एलीया आलोज हाय आने तियाआ बाराम जो लिखाला हाय तिआन जेहकी जोजे तेहकी तियाई तियाल केअयो. ¹⁴ फासी ते लोक शिष्यांपाही आले ताहा तीयाहाने तिया सोमकी खुब लोक हाय आने नियमशास्त्रा हिकवीना तिआ आरी वादविवाद केहतो हाय ऐहकी तियान देखायो. ¹⁵ होग्गा लोक येशुल विन चामकाय गिया आने ते तिया स्वागत केरा केअता दोवडी गिया

¹⁶ येशु ही शिष्यान फुच्यो तुम्हा तिया आरी काहा वादविवाद केअता बोहता ? ¹⁷ ताहा तियामने एकाही तियाल उत्तर देदो, गुरुजी मा याहाकीय पोयराल तोही लिइ आलेा तियाआम पुथडो होकाय गियो होय आने तिआल गोगता नाहा आवतो. ¹⁸ आने जाहा तो तिआल तेहे ताहा तो इसीन आसाटी देहे, आने मुयाल फेबदे लावी टाकेहे. दात किकडावे फासी लाबो सोडाक विही जाहे. मायु तो शिष्याल काडा आख्यो पेन तियान काडता नाहा आलो. ¹⁹ येशुय तियान आख्यो, “तुमा कोमी विश्वास केअनारा पिढी मायु तुमहआरी कोते लुगु रेनारो ? तुमाआरी कोतेलुगु सहन केअहेवु ? पोयराल इही ली आवा.” ²⁰ फासी तियायी पोयराल येशु पाही लि आले, आने पुथडाई येशु होवे वेअयो ताहा तरुतुज त्या पोयराल मोहडी देदो, आने तो पोयराे तारतीवे पोडआअ लाग्यो तिया मुयामने फेवदे निगा लागे. ²¹ फासे येशुय तियाअ बाहकाल फुच्यो, “ कोते समयुवेने एहडो होय ?” बाहकाय तियाल आख्यो, “हानापेने ओ एहडो हाेय ?”. ²² खुपज दाव तियाल मारा खातुर आगीम आने ते पायाम तियाल टाक्यो हाय, तुमाहाकी काय वेअतो वेरी ते आमाप दया केरा आने आमा मोदत केरा.” ²³ येशुय तियान आख्यो “शक्य वेरी ते एहकी काहा आखतोहाे ? जिआल विश्वास हाय तिया खातोर होगो वि शकेहे.” ²⁴ येशुय वेअयो की माआहा टोलो तिया होवे दोवडुते आवी रेये हाय ताहा येशुय पुथडाल बोबलीन आख्यो “ऐ पोयरामेने पुथडा आय तुल आज्ञा की रीयोहो इयामेने बारे निगी जो आने कोदीज इयाम विओ मा.” ²⁵ फासो तो बोबलीन तिआल मोअलीन बारे निग्यो आने तो पायरो मोअला होस वी गियो, आन माहान लाग्यो तो मोय गियो हाय. ²⁶ फासी तो बोबलीन तियाल पीअलीन बारे निग्यो आने तो पोयरो मोअला होस वि गीयो आने माहान लाग्यो का तो मोइय गीयो. ²⁷ पेन येशुय तियाय तिया हातुल तिइन तिआल उठव्यो आने तो उभी री गीयो. ²⁸ पासी येशु कोमे गियो ताहा तिया चेलाही ऐखालाम तियाल पुच्यो, आमाही तिया पुथडाल काहा ना काढी शक्या ? ²⁹ येशुय तिआन आख्यो " ही अेहडी जात हाय ति प्रार्थना केअला वाची बिहरी गोटी की नाहा निगी शक्ती". ³⁰ तिहीने निगीन ते गालीलाम ने जातुला इ केडालुज नाय मालुम पोडा जोजे येशु इच्छा आथी. ³¹ काहाका तो तिया चेलाल हिकवुतलो तिआई तियान आख्यो “माआहा पोयऱ्यो विश्वासघात केअनारा माआहा हाताकी तेराम आवी. ते तिआल माय टाकी पेन मारणामने तो तिसरे दिही जिवी उठी". ³² पेन इया गोगनु अर्थ तियान होमजायो नाहा आने ति गोठ पुछाखातोर ते बितला. ³³ फासे ते कफर्णहुमाम आले .येशु कोमे आथो ताहा तियाय तियाल फुच्यो वाटीप तुम्हा केहडा गोठी आखा आथे. ³⁴ पेन ते ठाकेज रिया काहाका वाटीम ते गोगतलाकी होग्गाम मोडो केडो हाय. ³⁵ फासी येशु एठा बोठो तियाय बारा चेलान हादीन आख्यो, “जिया केअडाल पेअलो वेअरा वेरी तियाय होग्गा पाचला वेअनु हाय ,आने होग्गा नौकर वेरा जोजे.” ³⁶ फाची येशुय एक हाना पोयराल हादीन तिया माजमे उबी केअयो आने तिआन आख्यो. ³⁷ जाे केडो मा नावाकी इ पोयराल मानीली ले माल मानीली आने जो केअेडो माल माने तो मालुज नाय ते जिआय माल मोकल्या तियाल बी मानी ली. ³⁸ योहानाही येशुल आख्यो, “मास्तुऱ्या, आमाहाई एकाल तो नावाकी पुथडे काडता देख्यो, आने आमाही तियाल नाहा केरा देदो, काहाका तो आपोमने नाय आथो.” ³⁹ पेन येशुय आख्यो, “तियाल नाहा केरा ऐहकी नाहा आखा, काहाका जो केडो मां नावे की चोमत्कार केअरी फासी तो मांविरुध्द माठ्या गोठ्या गोगी नाय शकी. ⁴⁰ आपु विरुध्द जो नाहा तो आपो केअता हारो हाय. ⁴¹ माय तुमाल खेरो आखु, ‘तुमा ख्रिस्ता होय ऐहकी आखीन जो केडो तुमाल प्यालो पाई पिया दिई तो खेरोज आपो हारा कामाल सोडी नाय. ⁴² माआप विश्वास थोवनारा केडा हानाल जो केडो देवाईन दुर केरी तिया बोचीम मोडो दोगडो बादीन दोऱ्याम टाकी देवाम आवी इ हारो हाय. ^{43 44} तुल तो हुदो हाथ पाप केरा खातोर आखे ते तो तु तोडी टाक. बेन हाथ रिन नरका आगिम जाऊलो तिया केअता हारो एक हाथ नय रिअन होरगाम जाऊला हारो. ^{45 46} आने तुल तो पाग पाप केरा लागवेहे ते ता काडी टाक बेन पाग रिन तुल नरकाम फेकीदि तियाकेअता हारो तु लोंगडो बिन होरगाम जाऊलो हारो. ^{47 48} तुल तो हुदाे डाेवो पाप केरा लागवे ते तु तियाल काडी टाक, बेन डोवा रिन तियान मोअते नाहा अेहडे किडे खाई आने आग ओलाती नाहा अेहडा नरकाम फेकी दिई. इयामने तुल एकुज डोवो रिन देवाराज्याम जावनु हारो ⁴⁹ काहाका होग्गा पोरिक्षा आगी की वेनाआरी हाय

⁵⁰ "खारो हारो हाय, आने खराही तिया खाऱ्यो रेअनु पारवाय गिअयो ते तो पाछी केहकी खारो केरा. तुम्हा एकबिजा आरी प्रमाकी ऱ्या आने एकबिजाआरी शांतीकी ऱ्या ".