¹ हाती जांहा आरामादिही विती गियो ताहा मरीया मगदालीयाय याकोबा याहकी मरीया आने सालोमी इयाही सुगंधी चिजा वेच्यात्या लेद्या. इया खातोर का ते आवीन तिया शरीरावे लागवे. ² आने आठुड्या पेहेले दिही माेडी वेगऱ्यो दिही निंगा बोखताव ते पुयारापाही आलया ³ आने तियाही एक बिजाल आख्यो, आपु खातोर पुयांरा मुयापेने डोगडो केडो काडी ? ⁴ पेन हेएयाप तियीन मालुम पोड्यो का डोगडो एकी होवे ठेपुलो हाय, तो खुब मोडो आथो. ⁵ आने तियीही पुयाराम विहीन वेयो ता हुदी होवे बोठलो, उजलो झगो पोवलो ऐक जुवानाल देख्यो, आने ते काबराय गीया. ⁶ पेन तो तियांन आखेहे ‘काबरायाहा मां, क्रुसाप चोडवुलो येशु नासरेथकराल तुमा होदत्याहा, तो जीवी उठलो हाय, तो इही नाहा, जी जागे तियाल थोवलो आथो तो जागो वी ल्या.’ ⁷ पेन तुमा जा, तिया चेलान आने पेत्राल आखा का तो तुमा आगला गालीलांम जाहे, जेहंकी तियाय तुमनेल आखलो तेहंकी तिही तुमा तियाल देखाय. ⁸ ताहा ते बारे तिग्या आने ते बी गेहल्या तीयाल ते कबारमुन्यो नाही पोड्या, आने केडालुज काअव्ही आख्यो नाहा काहाके ते बि गीयाल्या आथ्या ⁹ आठवुड्या पेहला दिहा-दिही येशु उठयो त्या पासे मग्दालीया शेहरामने मरीया, जीयेमेने तियाय सात पुथडे काडली आथी तियोल दर्शन देदो. ¹⁰ ती गियी आने रोडीन, दुखी विन तीया चेलाहान इ गोठ आखी. ¹¹ ते उनायो का तो जीवतो हाय आने तियोय तियाल वेअलो हाय, ताहा ते तियाही तियो आखुलाव विश्वास थोव्यो नाहा. ¹² फासे तियाहा मेने बेन जा, जाहां ते गावावेल जातला ताहा बिहीरा रुपाम तियाहान मिल्लो, ¹³ ताहा ते पासे फिरी आला आने त्याबाराम तीयाही बिहिरान बी इ गोठ आखी पेन तीयाही त्याव विश्वास थोव्यो नाहा. ¹⁴ फासे जाहा आकरा जां मांडो खाअ बोठला आथो ताहां तो तियाहाम प्रगट वेयो आने जियाहाय तियाल जीवतो विईन उठलो देखलो आथा तियाह विश्वास नाहा थोव्यो इया खातोर तियाहान अविश्वास आने कठीन मन केअयो इया खातोर तियाम तियाहान दोष देदो. ¹⁵ फासे येशुय तियाहान आख्यो, “तुमा बादे दुन्याम जायन दुन्यामेने बादा लोकाहान ही गोठ आखी देखावजा. ¹⁶ जो माअहुं इयो हारी गोठीवे विश्वास केरी आने बाप्तिस्मो ली तोअ वासाय जाय, पेन जो विश्वास नाय केरी तो दोषी ठरवाय जाय. ¹⁷ आने ते विश्वास केरी तियाहाम ए निशाण्या वेरी ते मांअ नावाकी पुथडे काडी टाकी. ¹⁸ आने तियाहान केल्लो बी विष पियाय जाय तेबी ते मोअनारे नाय ते दुख्याहावे आथ थोविन प्रार्थना केरी आने ते हारे वी जाय. ¹⁹ ए गोठ्या तियाहान आखी पारवायो ताहा, प्रभु येशु उसे होगगामे निंगी गियो आने तो पोरमेहेरा हुदिवेल बोठो. ²⁰ फासे चेला तिहींने निंगी गिया आने बादा जागाहांवे इ हारी गोठी आखा लाग्या, ताहा प्रभु तियाहा आरी काम केअतो रियो आने जे निशाण्या आखल्या ते वेअतल्या तियोहोंकी वचना सेवा वादती गियी. आमेन.