¹ तिया दिहामें कैसर आगुस्त ऐहेडी आज्ञा केयी का, आखा जगतु माहा नावे लिखाय जाय ² ई पेअली नाव नोंदणी आथी, जाहा कीरीनिय ओ सिरीया देशा राज्यपाल आथो. ³ हरऐक माहु नाव नोंदावा खातोर जिया तिया गावुम गिये. ⁴ फासो योसेफ बी गालील प्रांताम नासरेथ गावाम यहुदीया प्रांताम दाऊदा बेथलेहेम ईया गावे गायो काहाका दाविदा कुटूंमामने आने तिया कुळामने आथो ⁵ ओ नाव लिखावा खातोर जिया आरी तिया साखरपुढो वेअलो आथो, तियु गरोदर (महिना) मरीयाल तिया आरी लीई लेदी. ⁶ आने ऐहेकी वेयो का, तिहीज तियु दिही पुरा वि गिया, ⁷ तियुल तिया पेअला पाेयराल जल्मो देदो, आने तियाल तियु पोयराल पोतळाम वेटालीन ओखडाम थोव्यो, काहालका तियाह धर्मशालाम जागो नाहा मिल्यो. स्वर्गदुताहा की चारवाल्याहान संदेश ⁸ तिया भागाम, मेडा चारनारा राती खेताम रेअतला आपु टोलाल राखता आथा. ⁹ एकदम देवा एक दुत, तिया हुबुंर आवीन उबो रिअया, आने प्रभुअ तेज ऊजवाडो तिया समकी विइ गियो, आने ते खुब बिइ गीया. ¹⁰ देवदुताय तियाहन आख्यो कि बिया नाहा; जो मोडो आनंद होग्गा माहान वेनारो हाय, तिया सुवार्ता आय तुमाल आखुहु. ¹¹ दाऊदा नगराम, आज तुमा खातोर तारनाराय जल्मो लेदलो हाय! तोओ ख्रिस्त प्रभु हाय. ¹² तुम्हा खातोर ई चिन्ह रिई, तोओ बालक त्याने पोतळाम वेटाला वीन गोवाईमे हुवावलाे तुम्हाल देखायई ¹³ फासो एकाएक आकाशाम सैन्या एक मोडाे टोओ, तिया देवदुता पाही आलो, आने देवदुत देवा स्तुती केअतला आने आखतला. ¹⁴ “परम उंचाहाम देवाल गैरव आने पृथ्वीप (धरती) जिया महासंबंधी तोओ संतुष्ठ हाय तियाहाम शांती.” ¹⁵ फासे ऐहेकी वेयो का देवदुत तिया पाहीने स्वर्गाम गियाे, ताहा मेडा चारवाल्यान एक बिहिराल आख्यो, चाला आपु बेथलेहेम हुद जाहु, आने बोनी गेहेलीज जे गोठ परमेश्वराय आमाल आखली, ती विहयु. ¹⁶ ताहा तेहे माहार माहार गिया आने तियाही मरीया, योसेफ आने गोठाईम थोवलो पोयरो तियान देखायो. ¹⁷ जाहा मेंडा चारवाल्याहाय तियाल वेयो, ताहा तिया पोयरा बाराम जो गोठ्या आखल्या आथ्या ते तियाल आखाने जाहीराम आख्या ¹⁸ फासे उनानारे होग्याज माही तिया मेंडा चारवाह्याही आखल्या गोठीप नवाई केयो. ¹⁹ आने मरीयुम इ होंग्या गोठ्या मनन केया, आने तेअे आपु मोनात थोव्या ²⁰ फासे तिया मेडा चारवाह्याहान आखाम आल्लो आथो, तिया प्रमाणे तेअे होग्याज गोठया उनायने, आने विईन देवा गौरव आने स्तुती केअतेज फासे गिये. यीशु देवा नाव थोवाम आलो ²¹ आठवा दिही हाती सुंते दिही आलो ताहा तिया नाव येशु थोवाम आलो, ई नाव ताहा गर्भधारण वेअरा पेअलाज देवदुताय थोवलाे आथो. देवा कोअमे येशु देवा अर्पण (मंदीर) ²² आगला मोशे नियमशास्त्रा प्रमाणे शुद्धीकरण केअरुलो दिही पुरा व‍ेअयी ताहा तियाल उच्चे यरूशलेम शहराम लिई गिये, ताहा इयाखातोर कि, तिया प्रभुल समर्पण केअरावा. ²³ काहालका हरऐक पेअलो जल्मो लेदलो नर (पोयरो) प्रभु खातोर पवित्र मानलो जाआ जोजे ऐहेकीज प्रभु नियमशास्त्राम लिखलो हाय, तिया होस केअरावा. ²⁴ आने प्रभु नियमशास्त्राम आखल्या होस होल्या (ओलगी बच्या जोड) जोडा आने कबुतरा बेन पिल्ले तिया यज्ञ अर्पण केअरूलु खातुर तिही लिई आवुलु हाय. शिमोन आने तिया स्तोत्र (गित) ²⁵ ताहा वेअरा, यरुशलेम तो शिमोन नावा तिही एक माहु आथो , तोओ नितीमान आने भक्तीमान आथो, तो इस्त्राएल सांत्वना (दिलासो) वाट वेयलो आथो, आने पवित्र आत्मा तियापे आथो. ²⁶ आने प्रभु ख्रिस्ताल वेअया शिवाय तो मोओनारो नाहा ऐहकी पवित्र आत्मा तियाल प्रकट केअलो आथो. ²⁷ आने तो आत्मा की भरपुर विइन परमेश्वरा कोअमे आलो, आने जाहा याहकी बाहाकाय येशुअ बाळाले , तिया बारामे नियमशास्त्राम, रिअतीरिवाजा होस केअरा खातोर माजमे लाले . ²⁸ ताहा शिमोनाय येशुल तिया आथाम लेदो आने तियाल देवाला धन्यवाद केअयो आने आख्यो. ²⁹ "ओ प्रभु, आमी तोओ वचना होस तोओ दासाल शांतीकी जाआ देतहो. ³⁰ काहाकी माआ डोवावाय तोओ तारण वेअलो हाय. ³¹ तुयुल तोअ होग्याज राष्ट्रांआ माहा हुबुंर तियार केअयो. ³² तोओ परराष्ट्रीयाम प्रगट केअरा खातोर उजेड, आने तोओ इस्त्राएल माहा वैभव ऐहेकी हाय." ³³ तिया बआरामे गोठ्या तिया याहकी बाहाकाल नोवाय लाग्यो ³⁴ आने शिमोनाय तियाल आशिर्वाद देदो, ओ तिया याहकी मरीया तियुल आख्यो, वेअराह, इस्त्राएल मेने खुब माहा पोडी जाऊलो आने फासे उठुलु, ईया खातोर आने तिया विरूध गोगी ईया पुरावा खातोर थोवलो हाय. ³⁵ ईया खातोर की, खुब माहा मोनामेने विचार खोलाम आवी आने तोओ सोता जिवाम तलवार खुहुपीली जाय. हन्ना साक्षी ³⁶ तिही हन्ना नावु एक संदेष्टी रेअतली आथी, ती आशेर पीढीमेने फनुएलु पोयरी आथी. तीई खुब डायी वीई गेहली आथी. तियु वोराडा फासला तीयु कौओवाला आरी सात वर्षे रेहली. ³⁷ तीई चौ-याऐंशी वर्षो विधवा आथी, आने तीई परमेश्वरा कोआ सोडीन नाहा गिई, तिहीज उपवास आने प्रार्थना किईन रातदिही सुरूज उपासना केअतली आथी. ³⁸ तियुल तियाज टेमुपे पाही आवीन देवाअ आाभार मान्यो, जोओ यरूशलोमाम सोडवाखातोर वाट वेअतले आथे, तिया होग्गान तियुय तियाबाराम आख्यो. ³⁹ जाहा तियाय प्रभु नियमशास्त्रा होस होग्गाज काही पुरो केअयो, तोओ गालील देशमने तिया गावाम नासरेथ फासो आलो. ⁴⁰ पोयरो मोडो वेअतो गियो, आने ताकदवान वेयो, आने ज्ञानाम वादतो गियो आने देवा कृपा तियाप आथी . पोयरा यीशु देवअ कोअमे ) ⁴¹ दरएक वर्षो तिया याहकी बाहाको वल्हांडण सणा खातोर यरूशलोम शहराम जातले. ⁴² जाहा तोओ बारा वर्षा वेअयो, ताहा सणा रिअती होअस ऊचे यरूशलेम शहराम जाहलो ⁴³ फासे सणा दिही पुरा केअया, तोओ कौअ वेला फासो आवा नीइगयो, फासे येशु (पोयरा) एकलोज यरूशलोमेज फासला रिई गियो, आने ई तिया याहकी बाहाकाल मालुम नेय आथो ⁴⁴ तोओ तिया आरी प्रवास केअनारा टोला आरी वेरी, ऐहेकी हमजीन तेअ एक दिहा वाट चालते गिये, फासे तियाही तिया नातेवाईक आने हेंगात्याही तीया होद केअरा सुरूवात केअयी. ⁴⁵ जाहा तोओ तियाहान मिल्यो नाहा, ताहा तिही तेअे यरूशलोम शहराम फासे आले आने तिही तियाय तिया होद लेदी. ⁴⁶ ऐहेकी वेअयो की, तीन दिह्या फासो तियान परमेश्वरा कोअमे मिळ्यो, तो हिकवुनारा बचमे बोहीन तिया उनातलो आथो आने तियाहन प्रश्न पुछतलो आथो. ⁴⁷ जियाय तिया उनाया ते होग्गाज तिया समजबुध्दी वाय आने उतरा की नवाय वेयो. ⁴⁸ जाहा तियाल तियाय वेअयो, ताहा तियाहा नवाई लाग्यो, तिया याहकी तियाल आख्यो, "पोयरा तुअ आमाआरी ऐहेकी काहा वाग्यो? ऊअना, तोओ बाहाको आने माय कष्टी करीने तो होद केअते आले". ⁴⁹ येशुय तियान आख्यो, तुमु मान होद काहा केहतेहे? माय माआ बाहाका कौओरा जोजे, ई तुमाहाल माहीती नाहा का? ⁵⁰ आने तोओ तियाआरी जोओ काय शब्द गोगतलो ते तियान हमजयो नाहा. ⁵¹ फासो तोओ तिया आरी नासरेताम गियो आने तोओ तिया मानिन रिअयो. तीया याहकीन तेअे होग्याज गोठ्या तियु मोनाम राखी थोव्या. ⁵² येशु ज्ञानाम, शरीराम, देवा आने लोका कृपाम वदतो गीयो.