¹ येशु यरीहो सेहेराम पोची गीयो आने तिहीने जातलो आथो. ² ताहा व्या, जक्कय नावा केडो एक माअहुं आथो तो करपट्टी लेनारो आने खुबुज मातलो आथो. ³ येशु केडो हाय तो वेरा खातोर कोशिश केअतलो पेन खुबुज गोरदीम तिया काय चालेनेय, काहाका तो निचो आथो. ⁴ ताहा तो बादाहा आगाडी दोवडुतो गियो आने येशुल वेरा खातोर एक उंबरा चाडावे चोडी गियो काहका तो तियोज वाटीपेने जानारो आथो. ⁵ हाती येशु तिया जागावे आवताज उंचे विइन तियाल आख्याे, "जक्कया माहार निचे उती आव, काहाका आज माल तो कोअ आवुलो हाय." ⁶ ताहा तो माहार निचे उती आलो, आने खुशीकी तिया आवकार केअे. ⁷ तो विइन होग्गा माहे कुरकुर केरा लाग्या की, पापी माअहा कोअओ गोवारो गियोहो." ⁸ ताहा जक्कय उबो रिइन प्रभुले आख्यो, "प्रभुजी, वेअ, मा आरदी मिलकत गरीबाहान दिहु आने जर मायुंय केडावेने बी ठोगीन कांवी लेदो वेरीता तो आय चारपट दी देहे." ⁹ येशुय तियाल आख्यो, "आज इयो कोअमे तारण वेअलो हाय काहाका ओ बी मांअहु आब्राहामा पोयरो हाय. ¹⁰ काहाका माअहा पोयरो गोमाई गेहलाहाने होदा आने वाचावा खातोर आलो हो." ¹¹ जाहा ते ए गोठ्या उनातला आथा ताहा तियाय एक दाखलो बी आख्यो काहाका तो यरूशलेमा राहरापाही आलो आथो आने देवा राज्या आमिज आवनारो हाय ऐहेकी तीयाहाल होमजात लो. ¹² तीयाय आख्यों, एक मातालो माअहु, तिया राज्य पदवी मिलविन फासे आवेहे इया खातोर तो बिहीरा देशाम निगी गियो. ¹³ तियाय तिया दोहो सेवकाहान हाद्या आने तियहान दोहो माहरा दिइन आख्यो, "आय आवेहे तावलुग वेपारो केअजा." ¹⁴ आने तिया शेहेरोमेने माहे तियावे वेर केअेताला आने तिया फासला वकील मोकलीन आख्यो, "इयान आमाहावे राज नाय केरा एहेकी आमा मोरजी नाहा." ¹⁵ एहेकी वियो का, तो राज मिलवीन फाचो आलो ताहा जिया सेवकाहान मोहरा वेपारो केराखातोर पोयसा देदलो आथा, तीयावे कोतहो कामव्यो तो फुचा खातोर तियाहान तियाय हाघा. ¹⁶ ताहा पेअलो आगला आलो आने आख्यो का, 'महाराज तुयु देदलो मोहरा की माअयु आजी दोहा मोहरा कामाव्याहा.' ¹⁷ तियाय तियाल आख्यो, 'मा हाऱ्या सेवका, खुब हारो केयो, तु वाय हानी गोठीम विश्वासु रियो, इयाखातोर तुल दोहो सेहेराहावे अधिकारी नेमी दिहु.' ¹⁸ फासे बिहीरो आलो आने आख्यो, 'ओ माहाराज पाच मोहरावे मायु बिहीरा पाच मोहरा कामाव्याहा.' ¹⁹ तियाय तियाल आख्यो, 'तुल बी पाच सेहेराहावे अधिकारी नेमी दिहु.' ²⁰ फासे आजी एक सेवक आलो आने आख्यो, 'ओ माहाराज तुयु देदलो मोहर मायुय पोतडाम बांदीन थोवी देदलो आथो. ²¹ तु डांबऱ्यो हाय, जो तु थोवो नाह तो तु काडतोहो आने जो तुयुय पोअयो नाहा, तु वाडतोहो, इयाखातोर माल बीख लागतुली,' ²² माहाराजाय तियाल आख्यो, 'ओ खोटा सेवका, आय तो मुयाकी आखली गोठी की न्याय कीहु. आय डांबऱ्यो माहु हाय, इ तुल मालुम आथो, मायुय जो देदो नाहा तो काडी लिहु आने जो पोअयो नाहा तो वाडतोहो, ²³ फासो तुयुयं मा पोयसा बेंकाम काहाले नाहा थोव्या? आने आय फासो आवतो ताहा माल व्याजाकी मिली जाता.' ²⁴ ताहा तिया पाही उबी रेनाराहाल तियाय आख्यो, 'इयावेने तो मोहर मांगी लिइन जियावे दोहो मोहर हाय तियाल दी द्या.' ²⁵ तिहाहाय तियाल आख्यो, "माहाराज, तियावे ता दोहो मोहरा हाय." ²⁶ आय तुमाहाने आखुहु, 'जिया केडावे हाये, तियाल आजी देवाय जाय आने जियावे नाहा हाय, तियावेने जो कांवी हाय तो बी मागी लेवाय जाय. ²⁷ आय तियाहावे राज नाय केरा जोजे, एहेकी विचार केअनारा मा दुश्मनाहाने इही लीइ आवा, आने मा देखता मांय टाका." ²⁸ येशुय इया गोठ्या आखीन तो यरूशलेम सेहेरावेले आगला गियो. ²⁹ आने जाहा तो जैतुन नावा डोगाही बेथफगे आने बेथानी आवी पोच्यो ताहा तिया बेन चेलाहान एहेकी आखीन मोकल्या. ³⁰ आने आख्या, "तुमा हुबुंरने गावाम जा.आने तिही जाय पोचाहा ताहा आमीलुग केडोज जियावे बोठो नाहा एहेंडो एक फुरक्या पिलको बांदलो देखाय. तीयाल सोडीने इही लीइ आवजा. ³¹ आने केडोबी तुमाने फुची, 'इयाल काहा सोडता? ताहा एहेकी आखजा, प्रभुल इया गोरज हाय." ³² जियाहान मोकलुला, ते तीही जाय पोच्या ताहा जेहेकी आखलो तेहेकी तियाहान सापड्यो. ³³ आने ते फुरक्या पिलकाल सोडतुला, ताहा तिया मालिकाय तियाहांने आख्यो, "तुमा पिलकाल काहाल सोडताहा?" ³⁴ ताहा तियाय आख्यो, "प्रभुल इया गोरज हाय." ³⁵ ते तियाल येशुही ली आला, आने तियाहा पोतडे तिया पिलकावे फांगाव्ये आने तियावे येशुल बाहाव्यो. ³⁶ येशु वाटीपेने जातलो ताहा माहा तियाहां पोतडे वाटीवे फात्तले ³⁷ जाहा तो जैतुन डोगा उतुअरतीवे आलो, ताहा होग्गा चेलाहा मोडा टोलो हाय, तियाहाय जे हाऱ्या गोठ्या चमत्कार कामे वेआले आथे तिया खातोर तियाहाय मोडाहाकी बोबलीन देवा स्तुती केऱा लाग्या. ³⁸ तियाहाय आख्यो “प्रभु नावाकी आवनारो राजो आशिर्वादीत हाय! होरगाम शांती आने उचाम उचा जुगांवे गौरव वेअ." ³⁹ ताहा खुब माहाहामेने बाकी परुशी येशुल आख्यो, "गुरुजी, तो चेलाहान ठाकोऱ्या आख. ⁴⁰ तियाय आख्यों, "आय तुमाहान आखु, ए ठाकाज रियाअ ता डोगडा बोंबली उठी." ⁴¹ जाहा तो पाही आलो ताहा तो शेहरा होवे वेअयो, ताहा तियावेल विइन तिया खातोर रोड्यो आने आख्यो, ⁴² केल्या गोठ्या तुले शांती देनाऱ्या ते आजे होमजी लेतो ता कोतों हारो वेअतो ! पेन आमी ते तो डोआहा हुबुंरने दोबावी थोवल्या आल्याहा. ⁴³ काहाका एहेडा दिही आवनारा हाय का, तो दुशमन आवीन चारी सोमखी टोलवायन तुल कोंडवी लीइ आने तो माज मे आवा खातोर वाट तियार की लीइ. ⁴⁴ ते तुल आने तो पोयराहान तो पीतडाम धुलीम मिलवी आने ते डोगडाप डोगडो राअ नेअय देनारे काहाका तु देवाय तोअवे दोया केअयो तो टेम तुयुय ओहख्यो नाहा.” ⁴⁵ येशुय परमेश्वरा कोअ गियो आने तिही वेपार केअनाराहान बारे काडी देदे. ⁴⁶ आने तियाय आख्यो, एहेंकी लेखलो हाय की, "मां कोअ प्रार्थना केअनु कोअ वेरी, पेन तुमाहाय तियाल बांडाहा कोअ उबजावलो हाय." ⁴⁷ आने तो हमेशा परमेश्वरा मंदीराम हीकवुतलो. मुख्य याजक माहे, नियमशास्त्रा हिकवुनारा, माहाअ मुख्या बी तियाल माअई टाका कोसीस केअतला आथा. ⁴⁸ पेन तेहेकी केअराखातोर तियांन सुज्यो नाहा काहाका होग्गा माहा तियाल आनंदाकी उनातला आथा.