अध्याय १
1
येशु ख्रिस्ता दास आने याकोबा पावुहु यहुदा इयाहिने पत्र; देवबाहाकाल खुब पोटेहे एहंन्डो आने ख्रिस्त येशु केअता तियाय राखी थोवलो, एहंन्डा होग्गा हादलाहान
2
दोया, शांती आने प्रीती इ तुमाहान खुब मिलती रेअ.
3
पावुहु, जाहा माय तुमाहान ती ताराणा बद्दल लिखा केअता खुब कोशीश केअतलो, तियाल मान तुल ई होमजावनु हे खुब गरज वाटली हाय का, जो विश्वासा केअता कोशीश केअरा खतोर तो पवित्र माअहान एकुज दावु होपी देवाम आलो आथो,
4
काहाका, जे इ शिक्षा केअता पेहलानेज नेमाले आथे, एहंन्डा कोअताहा तेबी लोक चोइन माअज मे आलाहा; ते भक्ती नाय केअनारा लोक हाय, तियाहाल ते आपु देवा कृपा पालटीन तियुल कामातुरपणा स्वरूप दिइन आपु एकुज देव प्रभु येशु ख्रिस्त, ईयाबद्दल सत्य काय हाय तिया विरोध केअेता हा.
5
जाहा तुमाहान इ पेहलानेज माहीती हाय तेबी माय तुमहान इतवी दिहु एहकी मा इच्छा हाय का, परमेश्वराय त्या माहान मिसर देशामने बारे काड्ये आने जियाहाय तियाहाप विश्वास थोव्यो नाहा, तियान तियाय फासे नाश की टाक्ये,
6
आने जी देवदुताहाय आपु अधिकारा जागो नेय सामालता आपु स्वत:योग्य रेअवनु जागो सोड्या, तियाय तियाहान सादानकादा बधंनामने खुब आंधाराम ती न्याया द्याहा केअता सामाली थोवली हाय;
7
सदोम गमोरा आने तिया जागे जागे ने गावे इयाही तियाहोचुज जारकर्मे केअयी आने बिहरा डिअला (अनैतिकता) फाचला लाग्ये, आने ते उदाहरण म्हणुन सादानकादा आगी शिक्षा भोगतो थोव्योहो,
8
तेहकीज होपने वेअनारेबी डिलाहाकी बाटळातेहे, ते अधिकारी तुच्छ मानताहा आने स्वर्गदुताहा निंदा केअताहा,
9
पेन मोडो देवदुत मिखायल याय सैतानाआरी जाहा मोशे मोअला शरीरा केअता वादविवाद केअयो, ताहा तियाल हारो माठो गोगणु हिम्मत नाहा केअही, पेन एहकी आख्यो, “प्रभु तुल धमकावे,
10
पेन ए माअहे ज्या गोठया जाअते नाहा, तेहंन्डी गोठी केअता खाराब गोगतेहे, पेन तियाहान बिगर ओकली जनावोराहा होस , नैसर्गिकरीत्या ज्या गोठ्या होमजात्याहा तियाद्वारे ते सोताज नाश की लेताहा.
11
तियाहा केअहंन्डी खाराब दशा वेअरी, काहाका ते काईना वाटीपे चालतेहे, आने सोता लोभा केअता बलामा होस खाराब विचार वि गियाहा,
12
ए लोक तुमा प्रीती भोजनाम कलंक एहंन्डे हाय, ते तुमा आरी बिनलाजी खातेहे आने सोताहा देड पोअतेहे, ते वारा आरी निंगी जानारे बिनापाया वादलो हाय, ती पेहल्या पिकाम फोलवो नाय देनारो एहन्डो हाय, बेन दाव मोअय गेहेली आने उपटी टाकली एहन्डो चाडे हाय,
13
ते समुद्रा मोड्या लाटांहोस सोता लाज ऊचे लावतेहे जियाहा. खातोर सादानकादा केअंता कालोकींट आदारो राखी थोव्योहो, एहंन्डा भोटक्या तारा ते हाय.
14
आने आदामाहीन सातवो, हनोखयायबी इयाहाविषयी संदेश दिइन आख्यो का, "वेअरा, प्रभु आपे लाखो पवित्र जाअवा आरी आलोहो,
15
तो होग्गा न्यायनिवाडो केअरा आने तियामेने होग्गा भक्तीनाय केअनारा माअहान, तीयाहाय भक्तीहीना होस भक्तीहीन कामा खातोर आने भक्तीहीन पाप्यान, तिया बोद्दल तियाय आखला होग्गा कठोर गोठीकेअता दोष ठरवुलाम आवी रियेहे"
16
ते कुरकुर केअनारे, असंतुष्ट वाटील दोष लागवुनारे आने आपु वासनाहाकी चालनारे, ते मुयाहाकी गर्वा गोठृया केहतेहे. आने आपु लोभाकेअता ते माअहा वाँहवॉ केहतेहे.
17
पेन मा पावु बोयुहु, तुमा ता आपु प्रभु येशु ख्रिस्ता इया प्रेषिताहाय पेहलांज आखल्या वचनाहान तुमा ईतवा,
18
तियाहाय तुमाहान आखलो आथो का, “शेवट्या कालाम ठट्टा केअनारे माअहे उठी आने आपु भक्तीहीन वासनाहोस चाअली,"
19
ऐ ते हाय जे फुट टाकताहा ऐ शरिरीक माअहे हाय, जियाहाम आत्मो नाहा.
20
पेन पावुहु, बोयुहु तुमा आपु परमपवित्र विश्वासाप आपु रचना केअते रिइन पवित्र आत्माहाकी प्रार्थना केअरा,
21
सोताहाल परमेश्वरा मोयाम बोनवी थोवा आने सादानकादा जीवना केअता आपु प्रभु येशु ख्रिस्ता दया वाट जोअवते ऱ्या.
22
जे शक केअतेहे तियाहाप दोया केअरा
23
आने थोडाहान आगीमने ताआयईन काढीन वाचवा. थोडाहाप बी बीन दया केअरा; पेन ती पोतडाल बी दुरी केअरा जो शरिराहांकी खाराब वी गीयोहो नाश की लेताहा.
24
आमी, तुमाहाल मजबुत रेवुलाम आने आपु गौरवी आरी रेवुलोमे खुशीमे, निष्कलंक उबो केरूलामे जो ताकतीमे पुरो पोराललो हाय.
25
एहंन्डो जो एकुज देव आपु तारनारो, तियाल येशु ख्रिस्त आपु प्रभु इयाहीने गौरव, महीमा, पराक्रम आने अधिकार युगा पेहलांनेज,आमी आने सादानकांदा हाय, आमेन.