¹ तेहकीज मायु जाे प्रभुम बंदीवान, तो तुमान विनवनी की रीईलो हाय, देवाहीन तुमान हादावले हाय तियाम हारकीरीती जिवा जोजे. ² होग्गाई नम्रतेकी खुप हारीरीती आने ऐकबिहीराल सहन किईन मोयाकी स्विकार केअेनु हाय. ³ शांतीकी बाधाईन आत्मा ऐकी राखा खातोरा होग्गी गाेठीम हारो तो केरा. ⁴ जी रिती तुमान बी एकुज आशाम एकजागे वेराखातोर हादलो हाय ती रितीकी एक शरीराल आने एकुज आत्मो हाय. ⁵ एकुज प्रभु एकुज विश्वास, एकुज बाप्तिस्मो. ⁶ एकुज देव जो हाग्गा बाहाको तो, होग्गाप आने होग्गामेने आने होग्गाम हाय. ⁷ ख्रिस्ताई देदला दाना मोजमापाकी आपोल होग्गान दान मिललो हाय ⁸ वोचन अेकही आखेहे, जाहा तो उच्चो चोड्यो, ताहा तिईयाई कैदील तोबाम लेदे, ओन लिगीये ओन तिईयाई लोकाहान देणग्या देद्या. ⁹ आमी जाहा वोचन अेहकी आखेहे “उचे चोड्यो” ते इया अर्थ काय ? तेहकीच तो तोरतीपने अधेलोकाम बी उत्यो अेहकीच वेअेहे का नाहा ? ¹⁰ जाे अेठा उत्यो तोज उंसे होग्गा होरगाहीने उंसो ठिकानाम चोड्यो. इयाखातोर का होग्ग्या गोठ्या तिइ्यई पोय काडा जोजे. ¹¹ आन तिईयाई खुद लोकान प्रेषीत, संदेष्टे, सुर्वातिक, पालक आने शिक्षक अेहकी दाने देदीह. ¹² ते देणग्या देवाआ सेवा कार्याम पवित्रलोकान तियार केअेरा आने ख्रिस्ताआ शरीराल आत्मिकरित्या सामर्थ्यवान वेअेरा खातोर देद्याहा. ¹³ देवा ईस्सा हाय का आपो होग्गे विश्वास थोवनारे एक वेजी काहाका आपु तिइया पोयराप विश्वास थोवतेहे आने आपो तिईयाम वादा जोजे तेहकीज तिइया केअतो ज्ञान आपोन होमजा जोजे. देवाआ इ ईस्सा हाय का आपो मोडे विश्वास थोवनारे वेअेरा जोजे, एक विईन, वादीन ख्रिस्ता हारके बोनीन जो पुर्ण हाय. ¹⁴ इर्याखातोर का आपो इया आगला हाना पेायराहोस बादा नाहा जोजे. तेहकीच माआहा कपटाकी, ठोगावीनाऱ्या मार्गाहीने जानारा युक्तीकी अेहड्या होग्ग्या नोव्या हेकवुनरुपी वाआराकी तुमआ रोस्तो लाटाकी अेहेते हे डोलनारा उड्याहोस नाहा वेअेरा जोजे. ¹⁵ तिइयाखेता आपो मोयाकी खेरो गोगनु आने होग्गा मार्गाहीने तिइयाम वादा जोजे जो आमा मुनको हाय ख्रिस्त. ¹⁶ जिइयाकी विश्वास थोवानाराआ होग्गो शरीराल जोडालो रेहे आने तो होग्गो सांधाकी एकुज जागे बांधलो रेहे आने होग्गो भाग तो जेहकी काम केअेरो जोजे तेहकी तो केअेहे आपो राचना मोयाम वेअेरा खातोर शराीलाआ होग्गा भागाआ वाढ वेअेहे. जुनो आने नोवो जीविताक्रम. ¹⁷ तियाल आय इ आखु आने प्रभु नावाम तुमान विनंती कीइहू, जेहकी परराष्ट्रीय भ्रष्ट मोना खराबरीतीकी चालतेहे तेहकी चाला नाहा. ¹⁸ तिया विचार आंदारामाने वेअेले हाय, आने तिया मोनामे जिद केअेता तियामेने अनाडीपोन देखाइेन देवाआ जीवनाहीने ते जुदे वेअेले हाय. ¹⁹ तिइयाइ खुद आपो सिनालाम वाचावी लेदलो हाय, आने होग्गा प्रकारा अशुध्दगोठी ठगलाई किन वोयावि लेदले हाय. ²⁰ पेन तुमाआ ख्रिस्ताईने अेहडीरिती हिकले नाहा. ²¹ तुमा तिईयाबोद्दोल उनाये वेअेरी आने तिईयाईने येशुहीने जो खेरो हाय, तिज रितीकी तुमान तियाम शिक्षण मिल्ली वेअेरी . ²² ते तुमा जुनो माआहु तियाल काडी टाका जोजे, काहाका तो तुमाआह पेहलो वागुलाकी जो जुना कपटाकी हारो नाहा माठ्या गोठीकी पोरालो आसिन तिईया नाश विरीईलो हाय. ²³ ईयाखातोर तुमा आत्माकी मोनाम नोवे केअेले जा जोजे ²⁴ आने जो नोवो माआहु, जो देवाआज्ञा की नितीमान आने खेरा पवित्रआत्माम उबजावलो हाय तो वेअेरा जोजे. रोज्या जिवनु नियम ²⁵ तिईयाल खोटो केअेरो सोडी द्या होग्गाही तिईया आऱ्या आरी खेरो तोज गोगा जोजे काहाका आपो एकबिजा अवयव हाय. ²⁶ तुमआ रोगावाया पेन पाप केअेरा नाहा, वाआतीवेअेला पोडे पोडे ताव तुमाआ रोग सोडी द्या. ²⁷ सैतानाल संधी द्या नाहा. ²⁸ जो केडो चोरी केअेतो वेरी ते तिईया ही ईया आगला चोरी केअरा नाहा, उलटो तिइयाई आपो हाथाकी काम केअरा जोजे काहाका तिइयाल गोरोज वेअेरी ते तिईयाई तिईया वाटामेन दाआ खातोर तिईयापाही काईतेबी जोजे. ²⁹ तुमाआ मुयामने केअेल्ली बी माठी भाषा निगा नहा जोजे,तिईया उलटो गोरजेकी तिईयाहारी गोठ वेअेरा जोज, तिईयाखातोर उपयोगाम आवणारा शब्द निगा जोजे, ईयाखातोर जे उनाया तिईयान कृपा मिला जोजे. ³⁰ आने देवाआ पवित्र आत्माल दुखी केअरा नाहा काहाका तुमान खोडणी पोईन मुक्ती दिईयाकेअेता तिईयाही ने तुमान शिक्को माराम आल्लो अेहेडे तुमा हाय. ³¹ होग्गा प्रेकारा कोडवी, संताप ,रोग, बोबलुनु, देवाआ निंदा ई होग्गा प्रकार खोठ्याआरी तुमाआईने दुर केअेरा जोजे. ³² एकबिहीराआरी मोयालु ओन कनवाळु वेरा, आने देवाही ख्रिस्ताम उघडी रितीकी माफ केअेयो , तेहकी एकबिहीरान माफ केअेरा.