¹ येशु ख्रिस्ताम जो जिवन हाय तिया जिवनु वोचना घोषणा केअरा खातोर, देवा इस्सा कि येशु ख्रिस्ता प्रेषित पौल इयाहीने, ² मोयआलो पोयरा तीमथ्य इयाल, देवपिता (परमेश्वर) आने येशु ख्रिस्ता आम्हा प्रभु इयाहीने कृपा, दोया आने शांती मिले. ³ रात आने दिही माय प्रार्थनाम रीन तुल इतवुहु, आय त्या परमेश्वरा धन्यवाद किहुं आने तिया सेवा आगला डाया रिती कीअ चोखा मेानाकी किहु ⁴ मा खातोर तो डोवाम जे आहवे आलेहे तियान इतवीन तुल मिला खातोर उतवाल्यो हाय काहाका तुल मिलीन आनंदाकी पोराय जाव. ⁵ तो मे खेरो (निष्कपट) विश्वासने मान तो खेरो भोरुसो इत हाय जो पेहला तो आजली लोईस आने तो याहाकी युनिकेम आथो, मान भोरुसो हाय का, तोज विश्वास तुमा बी हाय. ⁶ तियाल आय तुल इतवी दि रियाहो का, परमेश्वरअ वरदानु आग जी आमिलुग सिलगुली हाय, ती तुल ताहा मिलली जाहा माय तोप आथ थोवलो. ⁷ काहाका परमेश्वर आम्हान जो आत्मो देदलो हाय तो आम्हान बिखऱ्यो नाहा बोनवुतो ता ती आम्हान प्रीती, संयम आने सोकतीही पोरालो आत्मो देदलो हाय ⁸ तियाहाल तुम्हाआपे प्रभु आने तिया खातोर जो माय तेराय गीयो, तिया साक्षी दाअ खातोर लाजवाता नाहा. काहाका तुल परमेश्वराय जी सोकती देदही, तियुकी सुवार्ता खातोर दुखे वेअठा खातोर माअ आरी रेअ. ⁹ तियाय आपुन साभाल्यो आने आपुन पवित्र जीवनु खातोर हाद्योहो, आपुय केअला काआमा की नाहा ता सोता हेतुकी आने तिया कृपाकी केअयो. जो परमेश्वराय येशु ख्रिस्ताम सुरुवाती कालुम आपुन होपी देदलो हाय. ¹⁰ पेन आम्ही आपु उध्दारकर्तो येशु ख्रिस्त प्रकट वेअताज देखावाय गियो का, तियाय मरणु नास केअयो आने जीवन आने सदा जीवना सुवार्ता मने प्रकासित केअयो. ¹¹ माने त्या सुवार्ताआ प्रचार केअनारो प्रेषित आने शिक्षक नेमलो आथो. ¹² इयाज कारणाकी माय ओतो दु:ख भोगीरियोहो, आने तेबी आय लाजवातो नाहा काहाका जियाप आय विश्वास थोवुहु तियाल आय वोहखुहु काहाका मान मालुम हाय तियाय मान जो काम होपलो हाय तो दिही नाहा आवतो ताव लुग तो तियाल सामभाली. ¹³ आने ज्या सुवचना नमुनो तु माहीने उनायो, तो नमुनो आने येशु ख्रिस्ता पे विश्वास आने प्रीती इयाम आगळा वाधतो जो. ¹⁴ आपुम वोहती केअनारी पवित्र आत्माकी त्या हाऱ्या गोठिया सांभाली थोव. ¹⁵ आने तुल ता मालुमुज हाय का, जे आशियाम रेअतेहे ते मान सोडीन निगी गिये. ते फुगल आने हर्मगनेस हाय. ¹⁶ अनेसिफरू कुटुबाप प्रभु दोया केअ काहाका तियाय होग्गा माअ समाधान केअयोहो आने माय जेलुम हाय तिया तियाल वाय बी लाज नाहा वाटी. ¹⁷ उलटो तो रोम सेहराम आलो ताहा जाव लुग मान मिली नाहा लेतो ताव लुग तो श्रम लिन मान होदतोलो. ¹⁸ प्रभु तियाल त्या दिहाल प्रभुयने दोया मिले काहाका तियाय इफिसाम माअ वागी वागी सेवा केली हाय इ तुल हारकिज मालुम हाय.