¹ परमेश्वर आमा बाहाको आने प्रभु येशु ख्रिस्ता मे हाय थेस्सलनीका शेहेरामनु मंडळील पौल, सिल्वान आने तीमथियुस इया होवेनु. ² परमेश्वरा बाहाको आने प्रभु येशु ख्रिस्त इयाहा रहीने तुमाहान कृपा आन शांती मिले, ³ मा पावुलाहां आमा कायमुंज तुमा बाबतीम परमेश्वरा आभार माना जोजे इ हाराम हारों हाय, काहाका तुमा विश्वासाम खुबुज वादी रीयेहे आने तुमा बादें एक बिहीरापे खुबुज मोया केतेहे, ⁴ इया की तुमाहाप जी तकलीत आने जे संकटे आवतेहे ते तुमा सहन केतेहे आने विश्वासाम टिकी रीयेहे, ए गोठ्या आमा परमेश्वरा मंडळीहीम अभिमाना की आखी देखावताहा, ⁵ तो परमेश्वरा खेरो न्याया प्रमाण हाय तो न्याय ओ हाय का जिया खातोर तुमाहा दुख ली रियाहा तिया परमेश्वरा राज्याम तुमा खेरा होमजाया जोजे. ⁶ तुमाहाप संकट लावनारा लोकाहांन संकट तियाहान बी फांसे आवी आने संकट लेनारा तुमाहान आमा आरी आराम दी इ परमेश्वरा नजरीम खेरो हाय. ⁷ इया खातोर प्रभु येशु आवनु टेमाप ऐहेकी वेरी तो तीया सोकतीशाली देवदुताहा आरी होरगामेनी आगी जालाकी प्रगट वेरी. ⁸ ताहा जे लोक परमेश्वराल ओखुता नाहा आने आपु प्रभु येशू हारी बातमी मानता नाहा तियाहान तो शिक्षा केरी, ⁹ ताहा तियाहान प्रभु येशु हुबुरनु आने तिया सामर्थ्या महिमा इहीने दुर केराम आवी सदाकाल नाश वेनु इ शिक्षा तियाहांन मिली, ¹⁰ आपुहू पवित्र लोकाहा इहीने तियाल महिमा आने मानपान मिला जोजे इयाखातोर तो आवी ताे दिही तियाहा बादाहा विश्वास केनाराहाम तुमा बी रीहा काहाका आमाहांय जी साक्षी आखी ती तुमाहाय मानी लेदी, ¹¹ इया खाातोर ताे आमा तुमा खातोर कायमुज एहेंडी प्रार्थना केता का आपु परमेश्वराय तुमाहान वेल्या इया पाचाराणाल खेरो एहेंकी माना जोजे आने हारा कामा प्रत्येक माेनाकी आने विश्वासा कार्य सामर्थ्याकी पुरो केरा जोजे, ¹² इया खातोर का आपु परमेश्वर आने प्रभु येशु ख्रिस्त कृपा की आपु प्रभु येशु नावाल तुमाहा की आने तुमाहान तिया नावा की महिमा मिले.