2 यी खोरी वात तीनुह बोगवानो हाते जोलमकीज जीवाय जुड़े कोरीन पोक्कु बुरहु आपतलु काहाके बोगवान कोवी गोडायणेन पेलेन तीनुह वायदु कोरलु से! एने बोगवान कोदी नी ठोगे !
3 एने एवी बोराबोर टेमे च्यु तेरी हाजी खोबर देखाड्य एने च्यी वात आमु आखानुह पोरचार कोरतला आपुह बाचड़नारा बोगवानोन हुकुम दोखो यो काम मेहे होपायलो से ! 4 ए तीतुस मी यी चीट्डी तोहो लेखतलू तु यीशु मोसीपोर बुरहु कोरनेमा मार होस बुरहान पाव्वी पाव रोयुह तु मार खोरा पुरयान होस से आपणा बाहा बोगवान एने वाचाड़नारा यीशु मोसीखेर दोखी दोया एने शांती तोहो जुडती रोये !
5 तु आमरा कामोह पुरो कोरे एने तु मारा हुकुम दोखो सेहरोडीट मोंडलीन पुडारया नीवाड़े कोरीन मी तोहों केरेत काड़ापामाणी मेकीन आवलु ओतु ! 6 मोंडलीन राखवावी कोरनारू पुडारी बीगुर गुनावालु एने एकुज लाड़ीवालु रोयणु जुवे तेर पुरया यीशुपोर बुरहु कोरनारा रोयणु जुवे एने वात नी माननारा एने उजाड़या नी रोयणु जुवे
7 एने आखी मोंडलीन खास राखवावी कोरीन ओगवायी कोरनारू पुडारी बोगवानोन नोजरोमा एने माणहोह नोजरोमा पुरूत पुरू बीगुर गुनावालु रोयणु जुवे काहाके च्यु बोगवानोन काम सोमावणारू से एने पीटारू एने डावावु एने दार कुट्यु एने आय सुट्य एने दोंदान पोयहान हाय हाय कोरनारू नी रोयणु जुवे ! 8 पुण च्यु ओनजावड़ान पावणाय कोरनारू रोयणु जुवे होमेस्या हाज काम कोरने इस्या कोरनारू एने माणहो हाते हाजो वेवार कोरनारू दोरमी एने पोवीत्र सोताह काबामा मेकीन नेम माननारू रोयणु जुवे !
9 खोरी हीको कोरीन एने जोखड़ी पोडनारान बुलती बोंद कोरनेन कोरता तीनाह जुडली तीनी खोरी वातोपोर च्यु टीकीन एने पोक्कु बुरहु कोरीन रोयणु जुवे ! 10 काहाके होंटा ओनमानता माणहे खोरी हीकोन वीरूद कोरीन रीकामी वात देखाडीन माणहोह फोसाडनारा से एने खास कोरीन च्या येहुदी माणहे ओहला सेताह एने पाप दोखा वाचणु ओये ते चामडो कातोरनेन रीतु कोरनु जुवे एहे हीकाडनारा से !
11 तींदरी बुलती बोंद कोर देजी काहाके च्या तोहली खोराब वात हीकाड़ीन पोयहा कोमायणेन कोरता आखा गोरे गोरे बीगाड़ देतला ! 12 उंजु तींदरू एक बोवीस्य कोयणारू कोय रोयुह के केरेदमायला माणहे होमेस्या ठोगणारा एने च्या खोतरनाक जोनवरोन होस से एने उजग्या एने खादोन सेताह !
13 यु पुरावु खोरू से कोरीन बुरहामा पोक्का ओयणे वीस्वास्यानुह केहेक चेतावणी आपजी 14 खोरी वात सुडीन येहुदी माणहोन माने गोड्या काव्या एने डोग हीकोपोर च्या मोन नी लागाड्नु जुवे 15 जीनु माणहोन मोन एने वीचार सुखलो रोये तींदरे कोरता आखा चीजे सुखला रोयहे पुण वीटोवला एने बीगुर बुरहा वालान कोरता कायीज सुखलो नीबंदे काहाके तींदरो मायलो माने एने वीचार वीटोवलो से
16 ओहला माणहे बोगवानोह जाणतला एंहे कोयतला पुण तींदरा कामोमा तीनाह इनीकार कोर देतला च्या हीगीह आवे ओहला काम कोरनारा एने नेम नी माननारा से एने काल्ला बी हाजा कामे कोरनेन च्या लायक नीब !