¹ १ ) तीना दीहोमा बोगवानोन आरामोन दीह यीसु एने तेरे चेला गोंवोन खेतोमा ओयता जातोता एने तेर चेलाह बुख लागली कोरीन च्या उब्या तुडीन खाणे बाज गोया। ² २ ) फरीसी पोंयवाला यो देखीन यीसु ह कोया देख तार चेला ते आरामोन दिही येहुदिन नियमो मा ज्यो नी करनु से । ³ ३ ) ओवतु यीसु तिनुह कोयु दावुद राजा एने तेर हातीह बुखला ओता तेतार च्या काय कोरला ओता तेर बारामा तुमु बोगवानोन पुस्तकतोकोमा काय वाचला च्यो ओर नींब के । ⁴ ४ ) च्या केहे के बोगवानोन घोर मा गोया एने बेट चोडावला रुटा ज्यो पुजाराहा सुडीन दिहरा कुणीज नी खाय साकतला च्या रुटा दावुत राजा एने ज्या तीनाहाते ओतो च्या बोगवानोन तोबवाला वाडामा जायींन खादया । ⁵ ५ ) बोगवानोन पुस्तोकोमा काय वाचला के पुजारा काम कोरीन साब्बतोन रीत तुडला ती बोगवान तीनुह मुनावाला नि गीणयु ।

⁶ ६ ) पुण मी तुमुह कोयो ज्यु याहरी से चु मंदीरोम दोखु बी खुब मोटु से । ⁷ ७ ) तुमु एरो मोतलोब जागता ते एक दिहराह कीव कोरे चा मेहे पटतेलो मार कोरता जोनवर मारीन बादा छोडवने दोखा ते तुमु मार चेला पोर गुनु नी लगाडता । ⁸ ८ ) काहाके आरामोन दिही माणहे काय कोरनु जुवे एने काय नी कोरनु जुवे कोरीन फेसलु कोरनेन होक माणहोन पुरयान से मोंजे पोरवुन से । ⁹ ९ ) ओवतु यीसु च्याहरी दोखु नीकविन येहुदी माणहोन बोक्तीन गोरमा आव्यु ।

¹⁰ १०) च्याहरी एक माणुह ओतु तेर आथ पांगवु ओतु थुडाक फरीसी पोंथवाला च्याहरी ओता च्या यीसु पोर विरुद्ध कोरने बाज गोया च्या यीसु पोर काय बी गुनु लगाडने नोट हुत्तोता कोरीन यीसुह फुस्या आरामोन दिही मांन्दलह हाजो कोरनु हाजो से के । ¹¹ ११ ) ओवतु यीसु तिनुह कोयु जोर तुमुह पाह मेडो बुकडोओये एने आरामोन दिही खाडामा पोड जाहे ते तुमु काय कोरहोत तुमु खाडाम दोखा नी काडे के । ¹² १२ ) मेडा बुकडा दोखु माणुह गोणु मोटु से कोरीन आरामोंन दिही मादलाह हाजो कोरनु ताले से। ¹³ १३ ) एहे कोरीन चु ओवतु पांगवा आथवावा कोयु तार आथ नांबु कोर कोरीन च्यु तेर आथ नांबु कोरयु लोगेज तेर आथ दिहरा आथोन होस हाजु ओय गोयु।

¹⁴ १४ ) पुण तेतार फरीसी पोंथवाला बारथे नीकवीन यीसुह केहेक मारहु कोरीन होमयु लागाडणे बाज गोयु। ¹⁵ १५ ) यो जाणीन यीसु च्याहरी दोखु जात रोयु एने वारुज माणहे तेर फोसोव जाणे बाज गोया एने च्यु आखा मांदलानुह हाजा कोरयु ।

¹⁶ १६ ) इने तिमहु चेतावनी आपु तुमु दिहरा माणहोन ओगोव मारा बोडाई कोरीन मी काय कोरलु चो कुणीहुज जुण कोयता । ¹⁷ १७ ) काहाके ज्यो बुल एसाया बोविस्य कोयणारु कोयलु ओतु च्यो पुरो ओये। ¹⁸ १८ ) देखु यु मारु सेवक से इनाह मी निवाडलु से च्यु मारु गोणु लाडकु से एने इना दोखु खुब खुस से मारा जीव आत्मा इनामा बोर दिह मी तीनु आखान हाजीहुते नियाव निवाडु कोरन्यु से कोरीन च्यु आखी जातीन माणहोह नियावोन खोबर कोयहे । ¹⁹ १९ ) मार सेवक माणहा हाते जोखडी नी पोडे एने तीनुहाते मोटे नी आयडे ।

²⁰ २० ) चु बुरान फाटहा रोंदवतला तेहे नी रोदवे एने उलवायाणारा दिवाहा ओगुज नी उलवे ज्याहलोगन बोगवान खोराखोर नियाव कोरीन नास नी कोरे ।

²¹ २१ ) तेतार दुनियान आखी जातीन माणहे मार सेवको पोर आसा राखहे। ²² २२ ) ओवता थुडाक मानहे यीसु पाह एक आंदवु एने मुकु ओत एने तेरा मा भुतडु बोरायलु ओतु तेर हाते लाव्या एने यीसु तिनहा हाजु कोरयु एने च्यु बुलने अने देखने बाज गोयु।

²³ २३ ) यो देखीन आखा माणहे बोंगलायीन एक दीहरहा कोयणे बाज गोया यु ते दाऊद पुरयु ज्यू राजा कोरने आवणारु यीसु मोसी नींब के । ²⁴ २४ ) पुण फरोसी पोंथवाला यो होबींन कोया यु ते बुतडान पुडारी बेलजेलुलोन ताकोटोमा माणहोम दोखो बुतडाहा काडतलु ।

²⁵ २५ ) यीसु तिनरा मा काय विचार कोरतला जो जाणीन तिनुह कोयु जोर एकुज राजोन माणहे ओंव सोव्वा विरुद्ध ओयीन वाराय जाये ते च्या राजवाडो टीके नी तोहलो एकुज गोरोन नी ते एकुज सेहरोन माणहे ओवा सोववा विरुद्ध ओयीन वेराय जाये ते च्यो उजडी जाहे । ²⁶ २६ ) तोहलो जोर बुतडा बुतडान ओवा सोंव्वा विरोद ओयीन जुलाए च्या एखठा नी रोय सोकतला एने बुतडान राज फाटफुट ओय जाहे ।

²⁷ २७ ) जोर मी बेलजेबुलोन ताकोत दोखु बुतडा काडतलु ते तार चेला कुणीन ताकोटोमा बुतडा काडतला तुमरा चेलाज तुमरु इसाब लिन तुमरु नियाव कोरहोत। ²⁸ २८ ) पुण जोर मी बोगवनोन जीव आत्मान ताकोत दोखु बुतडा काडतलु ते बोगवानोन राज तुमरा विस्मा आव लागलो ।

²⁹ २९ ) जुरवार माणहोह बादे बिगुर तेर गोरमा बोरायीन तेरा मालदोन चुरीन नि ली जावाये तिना जुरवार माणहोह दोखु जादी जुरवार माणहोह तिनहा बाधदेहे तेतारुज ते गोरोन मालदोन चुरीन लिजाय सोकहे ।

³⁰ ३०)ज्यु मारहाते निमबे च्यु मार विरुद्धोमा से एने ज्यु माणुह मारहाते मीवीन नी रोयतलु चु खोराखोर खोव्वी देतलु । ³¹ ३१ ) कोरीन मी तुमुह कोयतलु माणहोन आखी बातीन पाप एने बोगवानोन विरुद्ध बुलनाराह लोगोन तींदरी माफी जुड जाहेइ पुण चज्या पवित्र जीव आत्मान विरुद्ध बुलतला तिनुह बोगवान माफ नी कोरे ।

³² ३२ ) जोर कुण माणहोन पुरयान विरुद्ध काय बी बुले ते बोगवान तिनाह माफ कोरहे पुण जोर कुण पोवित्र जीव आत्मान विरुद्ध बुले ते बोगवान तिनाहा इनी कोवी नी ते आवनारी कोवीमा बी कोदी नी माफ कोरे । ³³ ३३) हाजो जाड हाजो फोव आपतलो पुण खोराब फोव आपतलो जाडोन फोव देखीन आपु यो जाड हाजो से के खोरबसे कोरीन जाण सोकतला।

³⁴ ३४) तुमु जहरवाला गोढहान होस से तुमुज खोराब ओयीन केहेक तुमु हाजा बुल सोकतला काहाके ज्यो काय तुमरा मोनमा बोरायलो से चोज तुमरा मुयोमा दोखो निकोवतलो । ³⁵ ३५) हाजा माणहोन मोनोन खोजानामा दोखी हाजी वात निकोवतली एने खोराब माणहोन मोनोन खोजानामा दोखी खोराब निकावतलु से ³⁶ ३६) एने मी तुमुह कोयतलु बोगवानोन नीयावोन दिही माणहे बुलतला तिनी एकके वाय बार बातोन लेखो आपणु पोडहे ।

³⁷ ३७) काहके तुमरी वातोमाज तुमु गुनावाला एने बीगुर गुनावाला ठोरहे । ³⁸ ३८) तेतार येहुदीन नेम हिकडनारा एने फरोसी पोथवाला थुडाक माणहे यीसुह कोया ए मासतोर बोगवान तोहो मुकोलु से कोरीन पुरावु आपनेन कोरता तु एक निस्याणी देखाड कोरीन आमु इस्या कोरतला । ³⁹ ३९) यीसु तिनुह जोपाप आप्यु एविन पीडीन माणहे तुमु खोराब एने सिनावान काम कोरतला पुण तुमु मेहे चोमत्कार कोरने कोयतला बोगवान बोविस्य कोयणारु योनान कोरता कोरलु चोमत्कार सुडीन तुमरे कोरता काईज चोमत्कार नी कोरे । ⁴⁰ ४०) योना तीन दिही एने तीन रात मोटला मासान पेटोमा रोयलु माणहोन पुरयु मी बी तीन दिही एने तीन रात दोरतीन खुयारमा रोयीह । ⁴¹ ४१) जेतार बोगवान माणहोन नियाव कोरहे तेतार निनवे सहरोन माणहे इनी पीडीन माणहोन हाते जीवता ओयीन तीनुपोर युनु लागडाहोत काहाके निनवे सहरोन माणहे जेतार योनान पोरचारोन वात होमबेवला तेतार पाप सुडीन बोगवानोखेर मोन फीरावला ओता एने मी तुमुह खोराखोर कोयो योना दोखु बी मोटु एक माणुह याहरी से। ⁴² ४२) तेतार दोकसीन दिसा खेरली राणी इना पीडीन माणहो हाते जीवती ओयीन तीनुह गुनावाला ठोरावहे काहाके ची दोरतीन कुपरे दोखी सुलेमानोन ओक्कलोन वात हों आवली ओती देखु याहरी एक माणुह से चु सुलेमान दोखु बी मोटु सेबोवणे । ⁴³ ४३) जेतार वीटोवली आत्मा माणहोमा दोखी निकविन जातली तेतार च्यी उजाडी जागामा फिरीन आरामा कोरने जागु हुदतली पुण तीनीह जागु नी जुडतलु । ⁴⁴ ४४) तेतार बुतडु कोयहे जीना मानहोहमी सुडलु तिनापाहा फोसु मी जायीह जेतार बुतडु फोसु जातलु ते जोहलो एक हुडलो गोरोन होस बारिन सापसुप कोरलो एने होबाडलो देखाय नोवलो तोहलु चु माणुह तीनाहा हाजु देखायतलु ⁴⁵ ।४५) तेतार बुतडु जाईन एने तेरे हाते तिना होखा जास्ती खोराब इने विटवला दिहरा सात बुतडा हुदिन लेटुज आवतलु एने आखा तिना माणहोमा बोरायीन रोयतला ओवती तिना माणहोन जीवाय पेलली दोस्या दोखी बी खुब खोराब दोस्या ओय जातली तहज इन पापी पीडीन माणहोन दोस्या बी ओयहे । ⁴⁶ ४६) जेतार यीसु गोरदी हाते वातु कोरतोतु तेतार तेर आयी एने तेर बायहे तेर हाते वातु कोरनेन विचार कोरता ओता । ⁴⁷ ४७) तेतार कुणतोरी यीसुह कोयु तार आयी एने तार बायहे गोरोन बारते उबरोय रोयाह च्या तोहोहाते वातु कोरने वाट जुवतहा । ⁴⁸ ४८) यो होंबीन यीसु च्या कोयलु तीनहा कोयु कुण से मारी आयी एने मारा बायहे । ⁴⁹ ४९) तेतार च्यु तेर चेलाखेर तेर आथोन इसारु कोरीन देखदयु एने कोयु देखु याज मार आयी एने मारा बायहे से । ⁵⁰ ५०) काहाके ज्या मारु सोरग मायला बाबान मोरजी पोर चलतला च्याज मार बायह एने मार बोणीह एने मार आयी से ।