¹ १) ओवतु यीसु पवित्र आत्मा मा भरीन ,यरदन नदी देखु आव्यु ,अने आत्मान अगुवाईमा जंगलमा फिरतु रोयु।

² २) अने चालीस दिह तक शैतान तेरी परीक्षा कोरतु रोयु ,तीना दिहोमा काहीच नी खादलु ओतु,अने जेतार दिहे पुरा ओया तेतार भुख लागी । ³ ३) अने शैतान तिनाहा कोयु ,अगर तु परमेश्वरन पुरयु ओयते ,दगडाहा कय के रुटु बण जा ।

⁴ ४) येशु तीनाहा जवाब आप्यु ," लेखलो से माणुह रुटा कोरीनुज जिवतु नि रोये क्ष।( व्यावी.८:३) ⁵ ५) तेतार शैतान तिनाहा ली गयु , अने तीनाहा थुडाक टेममा जगमा आखा राज देखाडयु । ⁶ ६) अने तीनाहा कोयु, मी यो आखो अधिकार ,अने ज्यो देखणे बाजरयु आखो तोहो आप दिह ,काहाके यो मेहे होपणे आवलो से,अने जिनाहा कोये तीनाहा आप सेकतलु । ⁷ ७) इनान कोरीन तु जर मेहे वंदेहे ,तेतार यो आखो तारो ओय जाहे।" ⁸ ८) येशु जवाब आप्यु ,लेखलो से प्रभु परमेश्वर तु वंदजी ,अने तेरीज आराधना कोरजी ।( व्या६:१३-१४) ⁹ ९) तेतार तीनाहा यरुशलेम मा जाईन मंदीरन उपर ( सीगापर) उभु करयु ,अने तीनाहा कोयु,अगर तु परमेश्वरन पुन्यु ओहे ते सताहा निचे पाड दे।

¹⁰ १०) काहाके लेखलो से,च्यु तारा बारामा स्वर्गदुतोह आज्ञा करहे , के तारी राखण करे । ¹¹ ११) अने च्या तोंह हाथो - हाथ उपर झेल लेहे ,ओहलो नी ओये के तारा पायोंमा दगडान ठुकर लागे ‌( भजन संहिता ९१:११-१२) ¹² १२) येशु तीनाहा जवाब आप्यु,यो भी कोयणेन आवलो से,तु तारा परमेश्वरन पारख जुण कोरतु।( व्या . ६:१६) ¹³ १३) जेतार शैतान परिक्षा ,( फारखी ) लुदु तेतार थुडुक टेम तीनुह हाते देखु जात रोयु। ¹⁴ १४) तेतार येशु आत्मामा भरीन ,गलील मा गोयु ,तेरी खबर आसपासन आखा देसमा पसरी गई । ¹⁵ १५) अने च्यु तीनुह आराधना मा उपदेश कोरतु रोयु , अने आखा तेरी बठाई करने लाग्या । ¹⁶ १६) अने च्यु नासरतमा आव्यु ,जेहरी तेरो पालन - पोषन ओयलो अते ,आपनी रितीन अनुसार त्योहार दिह आराधना मा जाईन वाचनेन कोरीन उभु रोयू । ¹⁷ १७) यशया भविष्यद्वक्तान पुस्तक तिनाहा आपली अती ,अने ची पुस्तक उघाडीन ची जागा निकवी चेहरी यो लेखलो ओतो । ¹⁸ १८)" प्रभुन आत्मा मारपर से, इनान कोरता च्यु बिखारीही खुशीनवान होंबावणे कोरीन मारु अभिषेक करलु से,अने मेहे इनान कोरता मुकल्लो से अने बंधनमा से तीदंरा छुटकारान अने आंधवाह देखनेन सुसमाचार कोयो ,अने ज्या सेंदायला से तीनुह निकावो ।( यशायाह ५८:६,६१:१-२)

¹⁹ १९) अने प्रभुन खुश रोयणेन तक प्रचार करो । ²⁰ २०) तेतार पुस्तक बंद करीन चेलान हात मा आप्यु ,अने बठ गयु ,अने आराधना मायला आखा माणहन डुवा तेर पर लाग रोया ओता। ²¹ २१) तेतार च्यु तीनुह कोयु,आजुज यो लेखलो पुरो ओयलो से। ²² २२) अने आखा तीना बाव्या अने जी अनुग्रह हन वात तेरा मुयमा देखी निकवती अती ,तेरसी अचंभा ( आश्चर्य) अयतोता अने कोयतोता " काय यु युसुफन पुरयु निमले काय ? ( लुका २:४२,भजन संहिता ४५:२) ²³ २३) च्यु तीनुह कोयु, "तुमु पर ई कहाणी जरुर कोयहोत , कि हे डांक्टर आपणा खुदह हाजु कर ; जो काय आमु होंबोवला से की कफर्णहममा तु कोरलु तीनाह आपणा देसोमा भी कर। ²⁴ २४) अने च्यु कोयु " मी तुमुह खरी कोयो कानलु भविष्यद्वक्ता आपणा देशमा मान-पान नी जुडतलो । ²⁵ २५) मी तुमुह खरी कोयो के एलीयान दिहोमा जेतार साढे तीन वरहे तक आकाश बंद रोयलो ,या तक के आखा देशोमा काव पोडलु ,तेतार इस्त्राइल मा खुब हंन्टा राडायली ओता ।(१ राजा १७:१,१ राजा १८:१)

²⁶ २६) पुण एलीयाह कुणीपा नी मुकलने आव्य ,केवल सैदान सारफतमा एक रंडायली पाह ।( १ राजा १७:९) ²⁷ २७) अने एलीशा भविष्यद्वक्तान टेंमे इस्त्राइल मा खुब हंवटा कुडयाव अता , पुण सिरीयान रोयणारु नामानह छुडीन तीनु माईन कुणी शुदध नी ओयु ।( २ राजा ५:१-१४) ²⁸ २८) यी वात होंबवतेज जतरा आराधनामा अता ,तीनु आखाहा खत लागी । ²⁹ २९) अने उठाडीन तीनाहा गावन बारथे निकाव्या ,अने जीना बोयडा पर तींदरो गांव वोहलो अतो ,तेरी चुटीपर ली जाईन के तीनाहा नेचा नाखणे अतो । ³⁰ ३०) पुण च्यु तीदंरा विसमा देखु निकवीन जात रोयु। ³¹ ३१) बादमा च्यु गलीलन कफर्णहुम गावमा गयु , पवित्र दिहमा उपदेश कोरतु ओतु । ³² ३२) च्या तेरा उपदेश दोखा आश्चर्य अय गयला ,काहाके तेरो वचन अधिकार हाथे ओतो । ³³ ३३) आराधनामा एक माणुह ओतु,जिनामा आसुद आत्मा अती ।

³⁴ ३४) च्यु खुब मोटे आयडी पोडयु ," हे येशु नासरी ,आमुह तारहाते काय काम? तु काय आमुह नाश करने आवलु ? मी तोहो जाणतलु तु कुण से,तु ते परमेश्वर सुकलु माणुस से। ³⁵ ३५) येशु तीनाहा झुलयु ने कोयु,ठावकु रोय अने तीनाम देखु निकवी जा ," तेतार अशुद आत्मा तेरेमा देखु आपटीन वीगर तरास देने तेरमा देखु निकवी गयु । ³⁶ ३६) इनी वातो पर आखाह अचंमा ( आश्चर्य) ओयो ,अने च्या एक दिहरा हाते वातु कोरता जाईन कोयने लाग्या ," यो कोहलो वचन से ? के यो अधीकार अने सामर्थ ( हक्क अने शक्ती ) असुद आत्माहा आज्ञा आपतलो ,अने ची नीकवी जातलो ³⁷ ।३७) अतः चारी खुणे तेरी चवचव ओयणे लागी । ³⁸ ३८) च्यु आराधना घरमा देखु उठीन शिमोनन घरमा गोयु ,अने शिमनन हाहुह खुब जादा हरी आवरयी अती ,अने च्या तीनाहा तेर कोरता विनती कोरया ।

³⁹ ३९) च्यु तेरे हाते उभु रोइन हरीह जुल्यु ,अने हरी लगेय उतरी गोयो ,अने ची लगेच उठीन तीदंरी सेवा चाकरी कोरने लागी । ⁴⁰ ४०) दिही बुढणे टेमे तिदंरे- तिदंरे यहारीन अलग अलग ( बातीन ) बिमारीमा पोडला ओता ,च्या आखा तीनुह तेर पाह लाव्या ,अने एक- एक पर हाथ मेकीन तीनुह हाजा कन्यु । ⁴¹ ४१) अने आयडती अने यो कोयती जाईन " तु परमेश्वरन पुन्यु से हंवटामा देखी निकवी गयी ,पुण च्यु तीनुह झुलतु अने बुलने निदेतोतु ," काहाके ची जाणतली के यु मसीहा से । ⁴² ४२) जेतार दिह उग्यु ,तेतार च्यु निकवीन एकखाली जागे गोयु ,अने मोटी गर्दी तीनाह हुदती हुदती तेरपाह आवी अने तीनाहा रुकणे लागी के आमरे पाह देखु मा जाय । ⁴³ ४३) पुण च्यु तीनुह कोयु," मेहे ऊंजु दिहरा गावमा भी सुभसंदेश कोयणेन गरज से,काहाके मी इनान कोरता आवलु से।

⁴⁴ ४४) अने च्यु गलीलन आराधनामा प्रचार कोरतु रोयु।