¹ ए वीण ओकल्या गोलातीया ,कुण तुमुह वेचातो लेदलु ,तुमरी ते मानु डुवाने ओगोव यीसु मोसीन कुरुस पोर देखायु गोयु।

² मी तुमुह यो जानणे चाहतलु , के तुमु आत्माहा के काय नेमोन कामो से,या बुरहा खेर दोखु जुवडयो ।( गलातीयो ३:५,प्रेरितो १५:८)

³ काय तुमु ओहला विण ओकल्या से, काय आत्मान रिती पोर सुरवात कोरतला , एवी डीलोन रिती पोर आखरी कोरहे ⁴ तुमु हाजी वातोन कोरता खुब दुख वेठला से,की नी ? च्यो आखो वायबार से के ? नीम्बे ।

⁵ इनान कोरीन ज्यु तुमुह आत्मादान कोरतलु , एने ओवी तुमुह ताकतन काम कोरतलु से, ज्यु काय नेमोन कामो दोखु या विस्वास हाजली वातसे एहें कोरतलु से । ⁶ अबराहम बोगवानपोर बुरहु कोरलु एने यो तिनान कोरीन दोरमीकता गिणायो गोयु।

⁷ कोरीन तुमु जाणनु जुवे के च्या बोगवानोपोर बुरहु कोरहे च्याज आबराहामोन पुरया से।

⁸ खुब सालोन पेल पोवित्र पुस्तोकोमा जानने पेलुस बोगवानोपोर बुरहु कोरतला कोरीन तीनुह दोरमी ठोहरावे तुमुह आखा जातीन माणहोह आसीरवाद आवहे।

⁹ ते ज्यो विश्वास कोरनेवावा से , च्या विश्वासी आबराहाम हाते आषीष जुडतलो से। ¹⁰ एने जोतरा बी माणहे नेमोन कामो मा बुरहु मेकतला से,च्या आखा हरापोन आधीन से,काहाके लेखलो से,ज्यु कुण नेमोन पुस्तकोमा लेखलो से ज्यु कुण नेमोन पुस्तकोमा लेखली ओयली वातोहो आखी वातोन कोरने खेर नी रोयतलो च्यु सापीत से।( याकुब २:१०-१२, व्यवस्थाविवरण २७:२६)

¹¹ पुण यी वात मालुम पोडयी नेम पावणेमा कोरीन बोगवानो नोजरोमा दोरमी नी बोणे ,काहाके दोरमी जोणा विस्वास दोखा जीवोता रोयहे ।

¹² पुण इन बुरहान वायोन एने नेमोन वायेन खुब फोरोक से,काहाके बोगवान नेमोन पुस्तकोमा यो लेखाय रोयलो से ,च्या नेम पावतला च्या बोगवानो हाते जोलम काजा जिवोहे । ¹³ बोगवानोन पुस्तोको मा यो फेलायलो से कुण बी कुरुसो पोर टांगणेमा आवतलु से ते बोगवान तिनाहा सोराप आपलु से,आपुपोर नेम लावणेन मोरपोन डोंड दोखु आपुहु सुडाव्यु ।(व्य२१:२३)

¹⁴ यो इनान कोरीन ओयो ,आबराहाम आसीरवाद मोसी यीसुन दिहरा जाती तोक पुये ,एने आमुहु बुरहु कोरणे खेर तीना आत्माहा बुरहु कोरे जीनाहा वायदान ओयली से। ¹⁵ हे बायोहो मी माणहोम रिती दोखु कोयो , के माणहोन वाचा बी पोक्की ओय जातली से ,ते नी कुण तिनाहा टावतलु से, एने नी तिनामा दोखु बढावतलु से।

¹⁶ तुमु जाणतला के बोगवान आबराहाम एने तेरा पुरयान पुरयाहा वायदु कोरलु,बोगवान एहे नी कोयु ,मी तोहो एने तारा आखा पुरयान पुरयाहा वायदु कोरतलु ,पुण यो कोयु मी तोहो एने तारा बासोह वायदु कोरतलु च्यु बोस यीसु मोसी से ।

( मती १:१)

¹⁷ पुण मी यो कोयतलु से की ज्यो नियम बोगवान पेल दोखुज पोवको कोरलु ओतु तेरो नेमोन चार होव तीस वोरोह बी आवीन बी नी टाव सोकतलु से तेरी नेम बोगवानोन वायदाह तुडीन वायबार नी कोर सोकतला।

¹⁸ बोगवान आबराहामोह आपणे वायदु कोरलु ओतु,च्यु पावलु तिनामा तिनाहा आसीरवाद जुडलो ,पुण बोगवान आबराहामोह कोरलु वायदु वायबार ओय जाहे कोरीन आबराहामोह वायदु दोखु आपोलु। ¹⁹ जोर ओहलो ओहे ते बोगवान काहा नेम आपलु ,नेम माणहोन पापोन देखाडणे कोरता आपायलो से,पुण जो नेम खोरु बोगवानोन च्यो नेम तेरा सोरगदुतोह लागाडीन आपलु ।

²⁰ पुण वीस्मा काय एक काय नी ओयतलो,पुण बोगवान एकुज से। ²¹ ते काय नेम बोगवान कोरली वायदान , विरुद्धमा से ,कोदी नी काहाके यदी ओहली नेमन आपली ओती जयु जीवन आप सोकतली पुण खोराखोर धारमीकमा नेमन मा ओयतली से।

²² पुण पोवित्र पुस्तोक कोयतलो के,आखी कोवी पापोन ताकोतोन काबामा से,कोरीन यीसु मोसी पोर बुरहु कोरने माज बोगवानोन सुटकारान,बुरहु कोरानारान कोरता जुडतलु । ²³ पुण विस्वास मा आवणेन पेल नेमोन अधिकारोमा आमु बांधायला ओता ,ओवी तिना बुरहामा आवणेन तेतार प्रगट ओयणे वावु ओतु ,आमु तिनान बांधायला मा रोयहु ।

²⁴ यीसु मोसी पोर बुरहु कोरने मा आपु बोगवानोन नोजरोमा दोरमी बोण्या ताहलोगोण नेम आपुहु हीकाडतलो एने रारववावी कोरतली।

²⁵ एवी यीसु मोसी पोर बुरहु कोरनेम टेमे आव लागी ,एवी दोखु आमु पोर नेमोन कायीज होक निंबे ।

²⁶ तुमु आखा यीसु मोसी पोर बुरहु कोरतला,कोरीन तुमु आखा बोगवानोन पुरया से। ²⁷ एने जोतरा तुमु मोसी पोर बुरहु कोरीन बापतीस्मा लेदला से च्या आखा जेहे तुमु नोवलो लुगडा पेर लेदला से।

²⁸ ज्या यीसु मोसी पोर बुरहु कोरतला,च्या बोण एक हारका से,एवी कुण यहुदी नी रोयु , एने कुण युनानी कुण दास ने सुटलु रोयणारु मानुहु मी से बाया नी माणहे उमु आखा यीसु मा एक से।

²⁹ जोर तुमु यीसु मोसीन से ते खोरला आबराहामोन वोंस से एने बोगवान आबराहामोह आपलु वायदान खोरलु वारीस बी से ।