6 ¹ Wanaadi a'deddu ecammannamo nacontoncomo cönä'döa'to Eliseo wwä: "Ñña mmai weichojo dö'tä cöwa'cäiñe'dana amäädä ajaadä cöweicho'como. ² Aashichaato tödööcä, ñaa adoojäcä Jordancwaca, inña töwaadäiñe dhanwacomo dee nacä'aato cömmaichomo amäätojo, yää que caamäaato inña cöweicho'como", quee cönä'döa'to. Eliseo cöneccujä'a'to: "Änwanno täjai maato awa'de" quee cönä'döaacä. ³ Tooni ijimmätoncomo cönä'döaacä: "Aashichaato tödööcä, ma'che ñaa jadä osootoi jadäiñe" quee cönä'döaacä. Eliseo cöneccujä'acä: "Wöta ajaadäiñe" quee cönä'döaacä. ⁴ Mädääje töwö cöntämä chääjadäiñe, Jordacwaca tönwanno cönä'döicho, yaawä deamma dee acäätädö cönaajäntoicho. ⁵ Yaawäne' tooni cönaajäntaacä dee acäätädö, wööwö ejuudu cöneemaichajoi, jadheedä wööwö ejuudu cöne'ducai na'cwaca; töwö cöncä'tömöi cönä'döaacä: "¡Cajaa yeedhajä, a'dhato e'ca'ajä nä'jaanä madä! quee cönä'döaacä. ⁶ Mädääje ñäädä dhanwa Eliseo Wanaadi anoonö cönä'döaacä: "¿ä'chä nejuccai? quee cönä'döaacä, töwö cöneecaimai yaawä yeejuca'jödö dö'tä Eliseo wwä. Töwö yä'jeje dee cönaacätäi, na'cwaca cöneemai yaawä, yämma sejaadadi cöntawa'näi. ⁷ Eliseo cönä'döaacä chäwwä: "Ajäichä" quee. Mädääje ñäädä dhanwa cönonwojoi, cönaajäi yaawä tamäädö que. ⁸ Yaawä ñäädä cajiichaana Aram ñano, Israelitacoomo cönwänä'ta'todaawä, töwö tösootoi jadäiñe cönä'jaacä, edääje cönä'döaacä: "öwö ömmai na'de, umjummadö woije wa'de yäätä", quee cönä'döaacä. ⁹ Mädääje ñäädä dhanwa Eliseo Wanaadi anoonö, cönaanontäi Israelita cajiichaanaichomo, edääje cönä'döaacä: "Maadä mötäi'che tönoiñato mädä, arameos weicho'como, maadä nä'taato", quee cönä'döaacä. ¹⁰ Yä'jeje Israelita cajiichaanaichomo tanoonö dhanwacomo cönenno'jaicho, ñäädä Wanaadi tanoonö wwä töneecamma cönä'jaacä weiñäje. Tooni yä, aacäde jeiñemma, cajiichaana nötäämä maadä, töwö nä'jaanä waadiyaaje. ¹¹ Cajiichaana Aram ñano töwäätäncano'tä töweiye cönä'jaacä, weiñäje ecammadö weijäcä, töwö tösootoi cöna'dejaicho, edääje cönä'döaacä chäwwäiñe: "¿Ane'cääme'nei ecamma'se'da maato ñäädä Israelita jadäiñe yoojodöajä naadö tacaade'da cantawäiñe?" quee cönä'döaacä. ¹² Yääje mma yaawä tooni shootoi cönä'döaacä: "¡öng'jö amäädä cajiichaana, edääjeene na, töweiye na Wanaadi wono wa'deuwödö, ñäädä Eliseo Israelitaa töne'tä weneeneto Israelita cajiichaanaichomoje, töwö töneecamma weneene töcaajichaanai wwä amäädä awa'deuwö'jödö!", quee cönä'dööaacä. ¹³ Töwö cajiichaana cöneccujä'acä: "Eneeta ñäädä Eliseo döiña, wanontaato maane yaawä canno dhanwacomo ñäädä ajäiyeto" quee cönä'döaacä. Cönäätäcammai yaawä chäwwä edääje: "Eneecääneja'ma, eetä'da töwö na Dotan ña", quee. ¹⁴ Mädäjeene ñäädä cajiichaana tösootoi cönaanontäicho Dotan ña, jooje cönä'ja'to ñanno töweewänä'taamo cawaayu de'wäncomo, tadaada de'wäncomo mmaja, tönwanno coijai jataaca cönä'döicho, jata cönaawädhentäicho yaawä. ¹⁵ Wanaadi wono wa'deuwödö sotoi, jenadäädä'cä cönä'jäi, jödo'na cöne'ja'cai, cöneedantäicho jata awoodhecääcä yä'döa'como, ñanno töweewänä'taamo cawaayu de'wäncomo, tadaada de'wäncomo mmaja, shootoi cönä'döaacä: "¡Oh, cajiichaana! ¿ane'cäämö cöödöaato eduuwa cönwanno?" quee cönä'döaacä. ¹⁶ Eliseo cöneccujä'acä: "Tösaade'da eichä, cönwanno eetä caatoodö cho'jodhenñe'cäjeene wanna caato, töweewänä'taamo e'jodhenñe'cä", quee cönä'döaacä. ¹⁷ Yaawä Eliseo cöna'deuwöi Wanaadi wwä, cönä'döaacä: "Amäädä Waanadiiyö, äwwä we'ca'a mä'dä enuudu a'ducaacä, eneedö wetä chäwwä", quee cönä'döaacä. Yä'jeje Wanaadi cöna'ducai ñäädä shootoi enuudu, töwö cöneeneaacä yäätä, cawaayu jooje yeichöcoomo jöö de'cäcä, tadaada wa'to wa'cä cönääneaacä Eliseo awoodhecääcä. ¹⁸ Yaawä aramaeos wä'ta'jäcä töwwadäädäiñe, Eliseo cöna'deuwöi Wanaadi wwä, cönä'döaacä: "Aneene'da nädöiñaato canno canno soto, öwö we'ca'a äwwä", quee cönä'döaacä. Mädääje Wanaadi ñanno cöneenu'däicho, Eliseo ne'catäädö woije. ¹⁹ Yä'jeje Eliseo cönä'döaacä aremeoscoomo wäiñe: "Ääma jöönö edä, jatajönö mmaja edä dea, ä'täcä öncäcä öwööne manadätäiye ñäädä dhanwa mujiyatoodö döiña", quee cönä'döaacä. Samaria ña töwö cönaadäicho yaawä. ²⁰ Samaria ña töwä'döa'comjäcä Eliseo cönä'döaacä yaawä Wanaadi wwä edääje: "Cajiichaana Wanaadi, canno dhanwacomo enuudu a'ducaacäde eduuwa, töneene ä'döiyetoode", quee cönä'döaacä. Mädääje Wanaadi cöna'ducaichea chäänuduucomo, töneene cönä'döicho yaawä, mädääje cönäädantäicho Samaria ñano jataawä töweichöcoomo. ²¹ Israelita cajiichaanaichomo cönä'döaacä yaawä Eliseo wwä, ñanno eneea'jäcäiñe töwwä: "¿wöja'janto ca, jaaja'cä?¿wöja'janto?" quee cönä'döaacä ²² Eliseo cöneccujä'acä: "amäädä mmaane canno mämja'joicho'de, ¿emaajai cha ätö'taanä ñanno wänä awä soto ajäiya'comjäcä äwwä, asaudai che, äshiimadaiche jeiñemma? yuduucomoone tödööcä ije'tacaiñe, yoocödööcomo mmaja, ääwashinchäiyeto, töwoocödööcomo aneenöiyeto, ennacaiyeto yaawä tädhaajätoncomo döiña", quee cönä'döaacä. ²³ Mädääje cönnöjoi ñäädä cajiichaana, jooje chääwanshiyööcomo cöneejodööjoi, cönääwashinchäicho yaawä, töwoocödööcomo cöneenöicho deea, yä'ca'comjäcä cönennojaicho chäädhajätoncomo wadäädä mmaja, ñanno waadiya arameocoomo numa e'jö'da töweiye cönä'ja'to, Israelita nonoodöcoomo de'cäi. ²⁴ Yä'jeje yaawä äcuude Aram ñano cajiichaana, Ben Adad täätö, tösootoi quini'jummaicho tamedäädä, ñanno töweewänä'taamo, Samariañano cönwänä'täicho, yää jata cönaajäicho yaawä. ²⁵ Mädääje Samaria ñano jataawä jooje ämi cönä'jaacä yaawä, täje weiñä yeijäcä, tönwanno töneejemaajo cönä'ja'to burro ju'jä'jödö acäichea sotooto'cä wa'cä (80)jödaata tödöjoone, tooni waajädäcanä o'nä (1.23litros), jaduuma wetö eje'jödö mmaane cönä'jaacä ijaatodea (5) jödaata. ²⁶ Israelita cajiichaanaichomo wääwannä'taame tömmai mu'dudui de'cäcä, wodi cöncä'tömöi chäwwadäädä, cönä'döaacä: "cö'wa'täcä amäädä cajiichaana", que cönä'döaacä. ²⁷ Israelita cajiichaanaichomo cöneccujä'acä: "Cajiichana Wanaadi ä'wa'tä'da yeiya'jäcä, töwaacö'jemma öwö ä'wa'täjai'chawa, a'que na natö äwanshije tödöemö, uva a'que mmaja vino je tödööemö", quee cönä'döaacä. ²⁸ Edääje mmaja cajiichaana cönä'döa'dea: "¿Ane'cäämö äjääcä neja'dä'anä?" quee cönä'döaacä. Ñäädä wodi cöneccujä'acä: "määdhä wodi edääje cönä'döaacä öwwä: 'ännedö ene'cä'de cotööcooje ca'nätäiye edä anooto, önnedö daja jenamma ca'naatodea cotööcomooje' quee cönä'döaacä. ²⁹ Mädääje jeene önnedö'cä ñaa cöna'näi totööje, tänäädö wetä, aneedawä anooto awä öwö daja edääje wä'döaaquene chäwwä: 'amäädä ännedö daja ene'cäde eduuwa, ca'nätäiye cotööcomooje', quee. Yaawäne' töwö tönnedö mmaane cöneetone'täi yaawä" quee cönä'döaacä ñäädä wodi. ³⁰ mädääje ñäädä wodi wa'deuwödö eta'jäcä cajiichaana wwä, töwoomö cönshinchai, dho'näno yaamoto'como yoomö täne cönä'jaacä (tömmai mu'dudu de'cäcä yaademaadawä), soto cöneene'ma'to yoomö yaajoi yeichö. ³¹ Yä'jeje töwö cönä'döaacä: "Eduuwa deamma Eliseo ju'jä wijöncä'ja, Wanaadi maamichanñojo yaawä, yeema'ñojo jeiñenma mädä annö'da weiya'jäcä edä anooto", quee cönä'döaacä. ³² Eliseo maane tömmai chaca cönä'jaacä shuucu yaatajimaajä, inchoncomo mmaja cönä'ja'todeea chääjadä yaatajiima'como. cajiichaana tooni dhanwa tanoonö cönaanontäi towaajo, yaawäne' ñäädä dhanwa dhanoonö wä'dödö owaajo yönñanñe, Eliseo cönä'döaacä inchoncomo wwä: "Eneetäcä'ma, mä'dä cajiichaana conemjönö, yeemadö wetä tösootoi nenno'jai öwwadäädä, etaatäcä eduuwa, sadä yä'döa'jäcä mä'dä dhanoonö, mönatata a'dutääcä'de yaawä täije omoomö'da yeichö wetä. cajiichaana maane inchäcäiche deamma yä'dötoojo na", quee cönä'döaacä. ³³ Mädääje ya'deutaame deamma chäwwäiñe, cönä'döi ñäädä cajiichana anoonö yöiñanñe, cajiichaana cönä'döaacä: "Eetä conemjönö naadö Wanaadi woijato mädä, yääje yeijäcä ¿ane'cääme'nei yoomojai wanä eduuwa ö'wa'tädö Wanaadi wwä?", quee cönä'döaacä.