¹ Hoshiaho nta kuciyagiriza abali muli Yesu Kristu. ² Bulya irhegeko ly'omuka guhana obuzine muliYesu Kristu lya kulikuzize oku irhegeko ly'ecaha n'ery'olufu. ³ Bulya ebi amarhegeko garhahashaga erhi buzamba bwa mubiri burhuma.Nnamahanga yene abijizire erhi arhuma omugala omu mubiri gushushire ogwirhu gw'ebyaha mpu lyo ahima ecaha n'omu mubiri gwage ayigiriza ecaha. ⁴ Mpu ly'obushinganyanya bw'amarhegeko buba muli rhwe,rhwe olugendo lwirhu lurhashimba mubiri ci muka. ⁵ Neci abashimba engeso z'omubiri bya mubiri bashwira.n'abashimba omuka bya muka bashwira. ⁶ Bulya enyifinjo z'omubiri luli lufu,ci enyifinjo z'omuka kal kalamu n'omurhula. ⁷ Cocirhuma enyifinjo z'omubiri zishomba Nnamahanga,bulya zirhashimba irhegeko lya Nnamahanga,ciru zirankanalihasha okulishimba. ⁸ Abashimba eby'omubiri barhankasimisa Nnamahanga. ⁹ Mwehe, murhali bashimbi bamubiri ci bashimbi ba muka,kulya kuba omuka gwa Nnamahanga guba muli mwe.Orhagwerhi Omuka gwa Kristu arhali wa Kristu. ¹⁰ Ci akaba Kristu amulimwo,ciru omubiri gukaba gukola gufire erhi caha cirhuma,omuka gohe guzine erhi bushinganyanya burhumire. ¹¹ N'akaba Omuka gw'olya wafusagya Yesu omu bafu guli mulimwe,olya wafusagya Yesu Kristu omu bafu anahe emibiri yinyu y'okufa akamu oku buhashe bwa Muka omubamwo. ¹² Ntyola,benewirhu,rhuli omu mwenda ci gurhali mwenda gwa mubiri mpu rhwalamira omubiri. ¹³ Bulya mukalamira omubiri,mwafa,ci mukayirha ebijiro by'omubiri n'obuhashe bwa Muka,mwalama. ¹⁴ Neci kobinali abahekwa na Muka gwa Nnamahanga,bo bali bana ba Nnamahahanga. ¹⁵ Murhahabagwa muka gwa baja mpu mwa yoboha.Cikwone mwayankirire omurhima g'okujirwa bana,gwo gunarhuma rhwayakuza erhi: ''Abba,Larha!" ¹⁶ Muka Mutakatifu yenene anaje omu murhima gwirhu oku kuhamiriza oku rhuli bana ba Nnamahanga. ¹⁷ Obwo rhuli bana bage,rhwe rhwayimire,rhuli mimo ya Nnamahanga.Na rhwayimire haguma na Kristu,bulya rhuli omulibuko rhweshi naye lyo rhuyishi kuzibwa haguma naye. ¹⁸ Neci nbwine niehe oku amalibuko gen'igulu garhankagererwa oku bukuze rhwayishihabwa. ¹⁹ Bulya ebiremwa byoshi biri byalinguza oku abana ba Nnamahanga baciyerekana. ²⁰ Ebiremwa byahizirwe omu buja,arhali oku bulonza bwabyo,ci oku bulonza bw'owabihebagamwo.kwone bicilangalire ²¹ ou na byo byayishirhezibwa omu buja bw'obubi,b'ishangire irenge ly'entagegwa ly'abana ba Nnamahanga. ²² Rhumanyire bwinja oku kuhika ene ebiremwa byoshi biri omu mirenge binadwirhe byalumwa n'emikero y'okuburha. ²³ Arhanali byone byo,ciru nirhu rhwe rhugwerhe eshokolezi za Muka__omurhima gwirhu omu mirenge guli,rhuli rhwalinda okuhinduka bana,bobuli bucunguzi bw'emibiri yirhu. ²⁴ Bulya obucunguzi bwirhu bucire bulangalire n'okubona eci omuntu alangalire burhaciri bulangalire.Eci omuntu abwine kurhi akacilangalira? ²⁵ Ci erhi rhwankalangalira ebirhurhabona, rhwanabirinda buzira kurhama. ²⁶ Kwonokwo, Muka Mutakatifu anarhabale ubuzamba bwirhu,bulya rhurhishishenga okushinganine,ci Muka Mutakatifu yene orhusengerera omu njamu zirhagwerhi oku zankaderhwa. ²⁷ Naye olya ovulula emirhima ayishi ebi Muka alonza,amanyire oku Muka asengerera abimana nkoku Nnamahanga azigira. ²⁸ Kandi rhumanyire oku Nnamahanga akolesa byoshi oku minja g'abamusima,balya yene ahamagire oku bulonza bwage. ²⁹ Bulya balya yene acishogaga kurhenga mira abarheganyize babe nshusho y'Omugala lyo aba nfula omu balumuna banji. ³⁰ Nabarheganyize,abahamagire.Nabahamagire abajizire beru_kweru.Nabajizire beru_kweru abhire obukuze. ³¹ Cicigi rhwankayushula kw'ebyo? Nka Nnamhanga ali olunda lwirhu,ndi wa nkarhuhima? ³² Ye orhalikiriraga Omugala ci amuhana nterekero kuli rhwe rhweshi,bici ankacibula bwarhuha haguma naye? ³³ Ndi wankaciderha mpu aheka abarhole ba Nnamahanga lubanja?Nnamahanga yene ye bayeza. ³⁴ Ndigi wankacibayagiriza?Ka Yesu Kristu wafaga anafuka?Ka Yesu Kristu otamire ekulyo kwa Nnamahanga odwire arhusengerera? ³⁵ Ndigi wankacirhukula omu buzigire bwa Kristu?ka malibuko,ka maligo,ku kabulirwa,kishali,ka kubula ecirhwayambala,ka kanga kazibu,ka mugushu? ³⁶ Nkakula biyandisirwe, ''we rhuma rhwayirhwa bwaca bwayira kwo bakola barhurhola nka bibuzi byajibagwa." ³⁷ Cikwone mw'ebyo byoshi rhunahime erhi olya orhuzigira orhuma. ³⁸ Neci nmamyire bwinja oku ciru olufu erhi buzine,ciru bamalaika erhi amami,ciru gano mago erhi amango gayisha,ciru amahashe, ³⁹ oli emalunga,oli okwidaho,nta ciremwa ciru n'eciguma cankahasha okurhuberula oku buzigire bwa Nnamahanga,buli muli Nnahano Yesu Kristu.