¹ Oli ngonyo omu bwemere mumuyankirire buzira kumucisa kadali oku ntanya zage. ² Hali omanya mpu akalya ngasi biryo,omuzamba yehe arhalya ezirhali nshogo_lubala zone. ³ Owalya amanye arhaganyagusagya orhalya,n'orhalya arhagamba owalya,bulya Nnamahanga amuyankirure. ⁴ Oli ndi w'oyo mpu watwa olwa mwambali wabene? Ayimazire erhi ahirimire,okwo kuyerekire nnawabo.Cikuyimanga anayorha ayimazire bulya arhali misi Nnahano abuzire y'okumulanga arhahirime. ⁵ Hali omanya mpu olusiku lurhashusha lundi,haligi n'owundi omanya mpu ensiku zoshi ziri kuguma.Ngasi muguma ashimbe oku abwine omwirwe lyage. ⁶ Oke nga ensiku,akujira Nnahano orhumire,n'olya ngasi biryo,Nnahano orhuma akujira bulya avuga Nnamahanga omunkwa,orhalya naye Nnahano orhuma akuleka anavuga Nnamahanga omunkwa. ⁷ Bulya ntaye muli rhwe ocilamira yene na ntaye ocifira yene. ⁸ Rhukalama Nnahano rhulamira,na rhukafa Nnahano rhufira.Omukalamu n'omu lufu rhuli ba Nnahano. ⁹ Bulya Kristu afire anafuka mpu lyo aba mwami w'abafire n'abazine. ¹⁰ Ci w'oyo,ciruma otwa olu banja lwa mwene winyu? Nawe we,cirhuma oganyagusa mwene winyu? Kali rhweshi rhweshi rhwahamagalwe omu lukiko lwa Nnamahanga. ¹¹ Bulya kuyandisirwe mpu: "Nbofa kula nba ndamire," Nnahano adesire, "ngasi idwi lyanfukamira na ngasi lulimi lwaha Nnamahanga irenge lyage." ¹² Kuli kuderh oku ngasi muguma muli rhwe anahane eshambalo zage yenene embere za Nnamahanga. ¹³ Kusiga rhuleke oku katwirana emanja rhwene nanene,rhumanye erhikwo rhwankarhuma mwene wirhu asarhala erhi ahirima. ¹⁴ Nmanyire na nnyemire muli Nnahano oku nta kantu kahumanya omu bworhere bwako,ci obwine oku kantu kalebe kali kabi oyo kanamuhumanya. ¹⁵ Erhi wankalerera mwene winyu oburhe erhi biryo birhuma erhi orhacishimbiri enjira y'obuzigire.Mashi omanye wankarhuma mwene winyu Kristu afiraga ahera erhi biryo byawe birhuma. ¹⁶ Hoshiaho omanye obwinja bwawe bwankaderhwa oku bubi. ¹⁷ Kali obwami bwa Nnamahanga burhali bwami bwa biryo erhi bwa binyebwa,ci bushinganyanya,murhula,n'eshagali muli Muka Mutakatifu. ¹⁸ Okolera Kristu ntyola asimisa Nnamahanga n'abantu banamusime. ¹⁹ Kusiga kukwanine rhushimbulire ebilerha omurhula n'ebyankarhabala abirhu. ²⁰ Mashi omanye wankashaba omukolo gwa Nnamahanga erhi biryo birhuma.Neci ntahabiri oku ebiryo byoshi biri binja;ci bihinduka bibi oku muntu obirya omu kusaraza abandi. ²¹ Kuli kwinja oku rhalya enyama, oku rhanywa omurhobo, n'okurhajira akantu kankarhuma mwene winyu asarhala erhi ahirima. ²² Obwemere bwawe ogwerhe obulange omu murhima gwawe embere za Nnamahanga.Iragi lyage omuntu omurhima gwage gurhalonza amango adwire ahiga ebi ajira. ²³ Ci ngasi yeshi ojakw'alya anadwirhe arhindira erhi mira ayaga, bulya arhashimbiri izu ly'obwemere bwage, na ngasi kantu karhenga omw'izu ly'obwemere erhi caha.