¹ Ngatsi ngiyabuka ngabona liWundlu eNtsabeni yaseSiyoni lime nebantfu labati 144000, babenelibito lalo, neleYise libhalwe emabuntini abo. ² Ngeva livi liphuma ezulwini lelevakala lifanana nemabhudlo emanti, lifanana nekudvuma lokukhulu. Lelivi lalifanana nekuhlabela kwetingitali tishaywa bashayi bato. ³ Labantfu lababenelibito leliWundlu neleYise emabuntini abo, basukuma bahlabela ingoma lensha embikwesihlalo sebukhosi, nasembikwetidalwa letine, nasembikwemaluna. Kute lomune labengahle abe nemandla ekufundza lengoma, ngaphandle kwabo kuphela lababehlengiwe emhlabeni lababeti 144 000, ⁴ Laba bangemadvodza langazane asatingcolise ngalabasikati, bamsulwa. Ngibo laba labalandzela liWundlu nome kukuphi lapho liya khona. Kubo bonkhe bantfu ngibo labahlengiwe, balulibo lwaNkulunkulu nelweliWundlu. ⁵ Akuzange sekutfolakale emanga emilonyeni yabo, abanasici. ⁶ Ngase ngibona lenye ingilosi indiza emkhatsini esibhakabhakeni, iphetse liVangeli lelingunaphakadze lekushunyayelwa kulabo labahlala emhlabeni, etiveni tonkhe, nasemindenini yonkhe, nasetilimini tonkhe, nakubantfu bonkhe. ⁷ Yakhuluma ngelivi lelikhulu yatsi, ''Yesabani Nkulunkulu, nimniki ludvumo, ngobe sikhatsi sekwehlulela kwakhe sesifikile, mkhonteni yena lowo lowenta lizulu nemhlaba, nelwandle, nemitfombo yemanti.'' ⁸ Ingilosi yesibili yalandzela yatsi, ''Iwile, iwile iBhabhulona lenkhulu, leyenta tonkhe tive tinatse liwayini lebugwadla bayo.'' ⁹ Kwalandzela ingilosi yesitsatfu, yakhuluma ngelivi lelikhulu yatsi ''Nakukhona lokhonta silo nemfanekiso waso, emukele neluphawu lwaso ebunini lakhe nasesandleni sakhe, ¹⁰ uyawunatsa liwayini lentfukutselo yaNkulunkulu lelinekuphelela kwemandla alo latselwa endzabeni yelulaka lwakhe. Uyawuhlushwa aviswe buhlungu ngemlilo nangesibabule, embikweliWundlu. ¹¹ Intfutfu yekuhlupheka kwabo yenyuka, kuze kube nini nanini. Abanako kuphumula, imini nebusuku, labo labakhonta silo nemfanekiso waso, nome ngangubani lowemukela luphawu lwelibito laso. ¹² Loku kubita kucinisela kwalabanwele, labo labagcina imiyalo yaNkulunkulu nekukholwa nguJesu. ¹³ Ngase ngiva livi ezulwini litsi, ''Bhala naku, Babusisiwe labafile bafela eNkhosini kusukela kulesikhatsi, Moya waphendvula watsi bayawuphumula ekusebenteni kwabo kamatima, ngobe tento tabo tiyabalandzela.'' ¹⁴ Ngase ngibona lifu lelimhlophe, lona bekahleti etikwalo afanana neNdvodzana yemuntfu, anemchele weligolide enhloko yakhe, ngesandla sakhe aphetse lisikela lelikhaliphako. ¹⁵ Lenye ingilosi yaphuma ethempelini, imemeta lona bekahleti etikwelifu ngelivi lelikhulu itsi, '' Tfumela lelo sikela lakho, kuvunwe, ngobe sikhatsi sekuvuna sesifikile, tonkhe tilimo sekufanele tivunwe. ¹⁶ Ngako lowo bekahleti etikwelifu walijikijela emhlabeni lelisikela lakhe, umhlaba wase uyavunwa ke.