¹ Ngesikatsi Jabin, inkhosi yase Hazor, eva loku, watfumela umlayeto ku Jobab, inkhosi yase Madon, kulenkhosi yase Shimron, phindze kulenkhosi yase Akshaph. ² Waphindze watfumela umlayeto kuletinkhosi lebetise ntsabeni ngasevenilenyakatfo, emfuleni wase Jodani ngaseningizimu yase Khinerethi, nasematsafeni, phindze nase Naphothi Dori ngasenshonalanga. ³ Waphindze watfumela umlayeto kuma Khenani ngase mphumalanga phindze nenshonalanga, ema Amorithe, ema Hithithe, ema Pheresi, ema Jebhusi eveni letintsaba, phindze ema Hivithe ngaphansi kwentsaba i Hemoni eveni le Mizpah. ⁴ Onkhe emabutfo abo aphuma kanye nabo, inombolo lenkhulu yemasotja, inombolo yabanjenge mhlaba losemantini. Bebanema hhashi lamanengi netincola tawo. ⁵ Onkhe lamakhosi ahlangana lapho bekubekwe khona skhatsi sekuhlangana, phindze bahlala emantini ase Meromi kutosusa imphi nema Israyeli. ⁶ Simakadze watsi ku Joshuwa, ''Ungesabi ebukhoneni babo, ngoba kusasa ngalesikhatsi ngitobaniketa kuma Israyeli bangulabafile. Nitochwalisa emahhashi abo, phindze nishise netincola tawo.'' ⁷ Joshuwa nabo bonkhe bantfu bemphi beta. Befika masinyane emantini ase Meromi, base bahlasela letitsa. ⁸ Simakadze wanikela titsa etandleni tema Israyeli, base bayatishaya phindze babachubekisa e Sidoni, Misrefothi Mayimu, nasesihosheni sase Mizpha ngasemphumalanga. Babahlulekisa kangangokube kute lowasala aphila. ⁹ Joshuwa wenta njengoba Simakadze abemtjelile. Wajuba imilente yemahhashi wase ushisa netincola tawo. ¹⁰ Joshuwa wagucukela emuva ngaleso sikhatsi wabamba Hazari. Washaya inkhosi yakhona ngenkemba. (Hazari abeyinhloko yayo yonkhe imibuso.) ¹¹ Bashaya ngenkemba konkhe lokwakuphila lobekulapho, phindze wabahlukanisa kutsi babhubhiswe, khona kutsi kutobabete lokuphilako lokutosala kuphila. Wase ushisa Hazari. ¹² Joshuwa watsa onkhe emadolobha aletinkhosi. Phindze watsatsa netinkhosi tabo wase uyatibulala ngeluhlangotsi lwenkemba. Wababhubhisa bonkhe ngeluhlangotsi lwenkemba, njengoba Mose sisebenti saSimakadze besilayetile. ¹³ Israyeli akazange ashise emadolobha bekakhiwe entsabeni lencane, ngaphandle kwa Hazari. Nguye Joshuwa lamshisa. ¹⁴ Emabutfo aka Israyeli atsatsa yonkhe imiphango kulamadolobha kanye netimfuyo tabo. Babulala wonkhe umuntfu ngeluhlangotsi lwenkemba kwaze bafa bonkhe. Kute labakushiya lokudaliwe lokuphefumulako. ¹⁵ Njengoba Simakadze abelayetele esisesbentini sakhe Mose, ngaleyondlela, Mose walayetela ku Joshuwa, ngako Joshuwa wentanjalo. Kute lakushiya kungakentiwa kuloku Simakadze bekakulayetele ku Mose kutsi akwente. ¹⁶ Joshuwa watsatsa yonkhe lendzawo: live letintsaba, onkhe ema Negevu, yonkhe indzawo ya Gosheni, ematsafa, umfula wase Jodani, live letintsaba laka Israyeli kanye nemave awo lamancane. ¹⁷ Kusukela e Ntsabeni i Halaki dvutane ne Edomi, kubheka ngasenshonalanga khashane njenge Bhali Gadi esihosheni celeni kwe Lebanoni ngaphansi kwentsaba i Herimoni, watsatsa omkhe emakhosi wawabulala. ¹⁸ Joshuwa wacala imphi sikhatsi lesidze nawo okhe emakhosi. ¹⁹ Kute nalinye lidolobha lelenta kuthula nemabutfo aka Israyeli ngaphandle kwema Hivites labekahlala eGibhuyoni. Israyeli watsatsa onkhe lalamanye emadolobha kuwayisa emphini. ²⁰ Ngoba kwakungu Simakadze lowacinisa tinhlitiyo tabo kutsi bacale imphi nema Israyeli, khona kutsi atobabulala ngaphandle kwesihawu, njengoba abetjele Mose. ²¹ Ngako Joshuwa weta ngaleso sikhatsi wabulala ema Anakimi. Wakwenta loku eveni letintsaba, eHebroni, Debhiri, Anabi, phindze nakulo lomkhe live letintsaba lase Juda, phindze nakulo lonkhe live letintsaba laka Israyeli. Joshuwa wababhubhisa bonkhe nemadolobha abo. ²² Kute namunye wema Anakhimi lowasala eveni laka Israyeli ngaphandle kwa Gaza, Gathi, na Ashidodi. ²³ Ngako Joshuwa watsatsa yonkhe indzawo, njengoba Simakadze bekashito ku Mose. Joshuwa waliniketa njengendlalifa kuma Israyeli, kubhekene kusinye ngasinye sive. Ngako lelive laba nekuphumula kuletimphi.