¹ Chimona cha Ovandiya. Muene Yehova ua handekele evi kutumbula Endome nguendi: tunovu mudhimbu ua kuli Yehova, keho vana tumu kanganda hakati ka mishovo na ku handeka nguendi, ''Katukeni! keho tumu katuleni muku lua ndhita!'' ² Taleni, nji ka puitha ua mundende hakati ka mishovo; uka shavuka muakama. ³ Ku lihaletha cha mbunge yove chika ku kuitha, ove uye ua ku kala mu myandhi ya livue, muimbo lyove lya chili; uye a handeka mu mbunge yeni nguendi, ''Yiya aka nji uitha hantci?'' ⁴ Vutuhu u londa muilu ngue chungu, vutuhu lishua lyove ua lihaka hakti ka vintanga -ntanga, ange njika ku tunditha kuye_evi vikevyo vya nahandeka Yehova. ⁵ Nga vaka kupuanja venja kuli yove, nga vaka ku puanja venja ku matciki_vati una vatuka!_Nga va puanjele noho vana puithamo ndi? nga vaka kuhela vushuka vua vinyu venja kuli yove, nga vanethela vushuka vumo vua ku shasha ndi? ⁶ Vya Esau va vithetela vati cho? Vufuko vueni vua ku shueketha va vutonda vati cho? ⁷ Voshe vamala vaka vuthamba vove vana ku tuala mu njila mu njila yove ku ngamba. Vamala vaye vakele na chivovo hamo lika nove vaka ku kuitha keho vana ku tuvakana. Vaye valya mbolo yove va kuta nganjo muintci lyove. Muli yikeye ku mua kele mana. ⁸ ''Ku litangua liye''_mua li na kuhandeka Yehova nguendi_''Ku njika nyeka vamala vaka mana kutunda ku Endome na ku dhivuka vya ku mukinya ua Esau ndi? ⁹ Vamala veni va ndhili vaka komoka, Temane, linga nkala vamala vakatca ku mukinya ua ua Esau ha ku va tciha. ¹⁰ Muomu muyoyo ua uingi una pangele kuli munanonko Yakomba, shuama yika kufuika, keho uka vatuka ku myaka yoshe. ¹¹ Ha litangua liye omo vangendhi va ambatele vikuata vyendi, na vana vambala va kovelele mu vikolo vyendi, na ku litahela Yelusalema, yove vene ua kele ngue umo uavo. ¹² Vuno keti utale litangua lya munanoko, mu litangua lya ku vihilila kueni, keho keti u yolele muakama vantu va Yunda mu litangua lya kutca kuavo; keti uli hamethe mu litangua lya kayando. ¹³ Keti u kovele mu chikolo cha vantu vange ku litangua lya kayando kavo; chili, keti utale lipaketho lyavo ku litangua lya kayando kavo, keti muthaleke mavoko vyavo ku litangua lya kayando kavo. ¹⁴ Keti u kemane ku vimbango muku vatula vaye veni vanovoka, keho keti u ka kundamethe vaye veni vana thupu ko, keti uka hane vaka kuovoka ku litangua lya kayando kavo. ¹⁵ Muomu litangua lya Yehova lili muyehi ku mishovo yoshe. Ngue mu una pangele, vaka vipanga kuli yeni; milonga yeni yika tenguluka ku mitue yeni vavenya. ¹⁶ Muomu ngue yeni mua nuine ku mukinya ua kuyela, ngocho mu va kanua ntcimbu yoshe mishovo yoshe. Chili va kanua na ku mina keho vika kala ngue ku va kele ko. ¹⁷ Vuno ku Mukinya ua Zion ku kala vaye vana trua, keho va kala va kuyela, na njivo Yakomba vaka fuka vufuko vuavo. ¹⁸ Njivo ya Yakomba yika kala tuhya, na njivo ya Yosefe mulengi, na njivo ya Esau vishuashua, keho vaka shuama hakati kavo, na ku valya vakevo. Kuye ku ka lihona umo ku njivo ya Esau, muomu Yehova ua handekele evi.'' ¹⁹ Vantu vatundile ku Nengeve va kafuka mukinya ua Esau na vantu vaye va ku chana va Filisteo; keho vaka fuka chifuti cha Efalaime na chifuti cha Samaliya, na Mbenjamine aka fuka Ngileande. ²⁰ Keho vakandhita va vantu ava va Yisaleli va kafuka chifuti cha Kanana ngue ku lahako ngue Zalefate. Vaka ndhita va Yelusalema, vaye vali ku ku Sefalande, vakafuka limbo lyakama lya Nengeve. ²¹ Keho muovole vaka kanduke ku mukinya ua Siono ku shika chifuti cha mukinya ua Esau, na vumuene uka kala kuli Yehova.