¹ Uye muka kumu kuakula yikeye na ku katukila yove. Takametha limbo lyakama, takametha vingila, koletha vintungi vyove, likanyamethe muakama. ² Muomu Yehova yikeye aluitha vukama vua Yakomba, ngue vukama vua Yisaleli, muomu vaka ku jukula vana va jukula vakevo na ku viyitha mintango yavo ya viti vya vinyu. ³ Ntelo ya vaka ndhili vendi yina venge, na vakandhita vana dhala vya ku venga; matemba a temuna na vikungo ku litangua liye omo avyukitha, keho va helengendha makunga makunga avo mu mpundhi. ⁴ Matemba a jaluka mu vingila; vakevo va hiluka vuathi na mu makumi auana mu vingila vya kama. Vakevo vatala ngue vilambi, keho vakevo va shatuka ngue vilambi. ⁵ Endi a vuluka vamuata vendi; va pundukile kuli umo na mukuavo mu kuenda kuavo; va shatukile vuathi ku luitha limbo lya kama. Ntelo yakama yi vapanga ku kuohyela ava vaka kuluitha. ⁶ Vikolo vya vindonga vya shokolola, keho njivo ya muene ya uile. ⁷ Huzambe yikeye na kutu keho yikeye va mutuala; ndungo yendi ua mukentu a lila ngue livembe, vali pupa ha vintulo vyavo. ⁸ Ninive yikeye ngue mema aku hita, hamo lika na vantu vavo va pulula ngue mema aku shatuka. Vakuavo vatambakana nguavo, ''Yimaneni, yimaneni,'' vuno naumo uahi a tenguluka kunima. ⁹ Pupeni viye vya mavue aku toka achili, tambuleni mavue a vunchele achili, muomu kuye ku kuakele kulenga kua vufuko, kuli muka vufuko vuoshe mu Ninive ayongola vyuma. ¹⁰ Ninive vyahi vilimo; mu ngocho na vukalu. Nkala mbunge ya umo yishangunuka, ku tcikama kua nkala uoshe enda kumo lika, keho vihanga vya vakevo vina njumua. ¹¹ China cha vindumba chili cho, na muhela uliuo ua vana vindumba kuye ve kulila, kuye ku vendele vindumba na luhavo, hamo lika na muna ndumba, kuye kuva kele na lyova lyahi ndi? ¹² Ndumba ua tavuile vya ku puithilamo vana vendi; endi ua takenyene va luhavo luendi, keho ua shulithile vina vyendi viye vya ku pupa, na vivandelo vyendi na viye vya ku puanja. ¹³ ''Tala, ange nji mukachidhindo chove_ovu vukevo vumbangi vua Yehova ua vimbunga. Njika tcimika matemba eni mu muintci, keho na mukuale uka lya vana vandumba veni. Njika teta mbunda yove kutunda ku chifuti, na majui a tunganda ku va kovu lalo.''