¹ Kalunga kulaya ua handekele nava kuku yetu hali va polofeto vintcimbu vya vingi na muvingila vya kulithatha. ² Vuno matangua ano, aku kotokela na handeka netu hali Munendi, uye yana puitha suana ua vyuma vyoshe, hali yikeye lalo ua pangele vyuma vyoshe. ³ Yikeye nakala kutua cheke cha vungulu vua Kalunga. Yikeye chifua cha Kalunga vavenya, akoletha vyuma vyoshe na lijui lyendi lya ndhili. Omo na shokolola laya ngila mulonga ua vantu voshe ua vuthambuetha, na tumama kulivoko lya chilyo lya Kalunga, muka ndhili yoshe. ⁴ Munendi ua mu puithile uakama kutuvakana tungelu kulidhina lya kutuvakana lyavo lalo. ⁵ Muomu ku vaye tungelu Kalunga nahandeka nguendi, ''Yove una kala Munange, litangua lya lelo njina kala Yisho'? Ndi kuli vaye tungelo vana handeka Kalunga nguendi, "Yange njikakala Yishe kuli yendi, nendi aka kala Munange kuli yange"? ⁶ Vuno lalo, muye Kalunga aneha munendi uambeli hano hantci, akuanya nguendi," Tungelo voshe va Kalunga vamulemethe yikeye." ⁷ Keho na tungelo na handeka nguendi, ''Yikeye na puitha tungelo vendi mpundhi, na vindungo vyendi na vapuitha mulengi ua tuhya. ⁸ Vuno munendi nguendi, " Chitumamo chove, cha vumuene uove, Kalunga, cha kala cha myaka na myaka kuye kuhua. Na mbueti ya vuovoke yikeyo mbueti ya vumuene vuove. ⁹ Una yongola vuchili una dhindi kuvihya. Ngocho Kalunga, Kalunga kove, na kuvuavuetha na madhi akuyolela kutuvakana kuendi. ¹⁰ " Keho ove Muene, ha kulivanga ua hindile luvula lua hantci. Na lilu vipanga vya mavoko ove. ¹¹ Akeo aka dhimangana, vuno ove uka kalelela. Akeo aka kula ngue vidhala. ¹² Uka adhenga ngue lipayi ngue chikoveyo, keho akeo aka kala muamo. Vuno ove uakala mumo lika na myaka yove koyi kahu." ¹³ Vuno Kalunga ua kuanyene kuli vaye tungelo tuendi kunkala ntcimbu nguendi, "Tumama kuno kulivoko lya chilyo, noho njika puitha vitodhi vove ngue kachitumamo ka muintci lya myanja yove"? ¹⁴ Keti ku tungelo voshe vakala vimpundhi vaye veku mupangela, na kuli vaye vovatuma muku takametha muomu voshe vaye vatambula kuovoka?