¹ Ange mukuluntu njithona kuli mukentu ua kuhangula na vana vendi, vaye va nja yongola mu vuchili_ keti hamo yange lika, vuno na voshe vaye vana dhivuka vuchili_ ² muomu lya vuchili ovu vua kala muli yetu novu vua kala netu myaka na myaka. ³ Ngodhi, na chivovo cha Kalunga Tata na Yesu Kilistu, Muna Yishe, mu vungulu na chidhango vi ka kala netu. ⁴ Njili na liyango lya kama mu kua ku uana vana vove vamo venda mu vuchili, ngue mu tua tambula lishiko eli kuli Tata yetu. ⁵ Ngocho nji na ku kandelela shukulukambu, ove muna mumbanda_keti ngue mu nji na ku thonena lishiko lya lihya, vuno uye u tuovua kutunda ku ku livanga_ linga tu li yongole umo na mukuavo. ⁶ Echi chikecho chidhango, tuende ngue ku mashiko endi. Eli likelyo lishiko, ngue mu uovua kutunda ku mbangelo, ngualyo uende mo. ⁷ Muomu vaka ku tanganetha va vengi vana li shandanganena mu chifuti, kuva yongola kutava nguavo Yesu Kilistu uedhile na muvila ua ntcitu. Ou yikeye muka kutanganetha yikeye antekilistu. ⁸ Linyungeni, linga keti mu dhimbalethe viye vi mua pangela, vuno linga mu tambule fueto ya kushula. ⁹ Ou uoshe a tualelela ho keho ka kala mu vilongetha vya Kilistu ka kele na Kalunga. Vuno uye a kala mu vilongetha evi, ali na Yishe na Mona voshe. ¹⁰ Nga umo a kenja kulyeni vuno ka mi longetha vilongetha evi, keti mu ka mu tambule mu vinjivo vyeni nambe ku mu hinduitha kuahi. ¹¹ Muomu ku nkala uoshe uye a mu hinduitha yikeye a li haka mu vipanga vya kujuala. ¹² Njili na vya vingi vya ku mi thonena, vuno kunji yongola ku thona ha mukanda na tindya. Vuno, nji na tumamena kuija nja ku kuanye neni mesho na mesho, linga liyango lyetu li hete mo. ¹³ Vana va munanoko va vakentu vaye va va hangula vana mi hinduitha.