¹ Paulu, yu va thanene kuli Kilistu Yesu a kale ka apostolu mu chidhango cha Kalunga, na munayina yetu Sostene, ² ku chikungulukilo cha Kalunga ku Kolintu, vaye va vana toketha muli Kilistu Yesu na ku va thana va kale vantu va ku yela, hamo lika na vaye voshe vali mu muhela va ka tambakana lidhina lya Muene Yesu Kilistu, yikeye Muene uavo netu. ³ Ngodhi na chivovo cha Kalunga Tata na Muene Yesu Kilistu vi kale neni. ⁴ Muomu lyeni njika hana ku shangala kuli Kalunga kange muomu ngodhi yendi na Kilistu Yesu ya mi hana. ⁵ Na mi hana vu fuko mu vingila vyeka na vyeka, mu vihandeka na mu mana, ⁶ ngue mu vana tava vumbangi vua Kilistu ngue vuchili hakati keni. ⁷ Ngocho vene muli na vuana vua chithithimba ngue mu mua tatelela navua ku yomboloka kua Muene Yesu Kilistu. ⁸ A ka mi koletha lalo noho ha ku manethela, linga mu ka thambue ha litangua lya Muene Yesu Kilistu. ⁹ Kalunga ua mu ngulu, yikeye ua mi thanene mu lyuvuathano lya Munendi Yesu Kilistu Muene uetu. ¹⁰ Ngocho njina mi kandelela, va munanana, mu lidhina lya Muene uetu Yesu Kilistu, linga mu tave, na katepetho ka yeneke mukati keni. nji na mi kandelela linga mu lyuvuathane kumo lika na mana amo lika na vutumbe vumo. ¹¹ Muomu vaKoloyi vana nji leke vyeni, vamunanana, nguavo mukati keni muli vimpata. ¹² Evi nji na vi tumbula vene: Nkala uoshe hakati keni a ka kuanya, nguendi, "Ange njili na Paulu," ndi nguendi, "Njili na Apolo", ndi nguendi, "Njili na Sefasi", ndi nguendi, "Njili na Kilistu. ¹³ "Yesu kuma ua li tepetha ndi? Paulu va mi kulikila uo ndi? Eni va mi mbuitika mu lidhina lya Paulu ndi? ¹⁴ Nji na shangala kuli Kalunga nguange na umo ueni yi nja mbuitika uahi, kuvanga lika Kilispu na Ngayu. ¹⁵ Ku teuetha umo a ka kuanya nguendi va mu mbuitika mu lidhina lyange. ¹⁶ (Nja mbuitikile lalo njivo ya Setefanu. Ku tunditha ko ovo, ku nji dhivuka nga nja mbuitikile ko va kuavo veka.) ¹⁷ Muomu Kilistu ka nji tumine kumbuitika vuno kuambulula majui a chili_ keti na majui a mana, linga keti nji dhimangane ndhili ya chiti cha kulindakana cha Kilistu. ¹⁸ Muomu vimpande vya chiti cha ku lindakana vya kala vya vuheve ku va ka ku tca. Vuno ha kati ka vaye va novoka, vi na kala ndhili ya Kalunga. ¹⁹ Muomu va na thono, nguavo, "Nji ka viyitha mana a vaka mana. Keho nji ka nona ho mana a vaka mana." ²⁰ Muka mangana uiye? Na mu ka kuli longetha uiye? Ndi mu ka vimpata vya chifuti kuiko ali? Kalunga kuma keti ua tengulula lidhangamena lya vantu mu vuheve ndi? ²¹ Muomu chifuti ku cha dhivukile Kalunga na mana a cho, Kalunga cha mu tokele ku mbunge kuli vaye va tava ku hitila mu majui a vuheve. ²² Muomu va Yundeya va thetela vi dhivukitho vya ku komoketha na vaNgelengu va thetela mana. ²³ Vuno tua mbulula ku kulika kua Kilistu, ku keko kua kala chipundukitho kuli vaYundeya na vuheve kuli va ka vifuti. ²⁴ Vuno kulyavaye vu va thana kuli Kalunga, vaYundeya na va Ngelengu voshe, tuambulula Kilistu ngue ndhili na mana a Kalunga. ²⁵ Muomu vuheve vua Kalunga vukevuo vua tuvakana mana a vantu, na ku dheya kua Kalunga ku tuvakana ndhili ya vantu. ²⁶ Taleni ku thana kueni, vamunanana. Keti muva voshe mua dhangamene mu vuntu. Keti muva voshe mua kele vaka vukama. Keti mu va voshe vaka vumuene. ²⁷ Vuno Kalunga ua shovuele vyuma vya vuheve mu chifuti linga vi shaukithe va ka mana. Kalunga ua shovuele vya kudheya mu chifuti linga vi shaukithe viye vya ndhili. ²⁸ Kalunga ua shovuele vya vindende vi va thembulula mu chifuti. Na yikeye ua shovuele vyuma vi va yeneka ku tanda ko, linga vi lekethe vungocho vua viye vi va tandela ku vungulu. ²⁹ Ua vi pangele evi linga muvila keti u ka lihamethe ku mesho endi. ³⁰ Muomu lyevi vya pangele Kalunga, mualolo mu li muli Kilistu Yesu, uye ua kele mu ka mana a kutunda kuli Kalunga. Ua kele vu chili vuetu, kuyela, na vuovoke. ³¹ Ngue mu va na thono, ''Uye a li hametha a li hamethe muli Muene."