¹ Ame nakengire Karunga anayimana kushidjambero aghamba ashi, ''Toghona kuwiru yangundi mposhi ntateko ngayikunyungange. Vindembaghura ghugcene-ugcene kudimutwe davo navantje, ame nganidipagha wavo wakuhulilira narufuro. Kundereko ghumwe wavo ngashenduko, kundereko ghumwe wavo ngaheno. ² Nampili ngavatime mushirongo shavafe, namoshi, lighoko lyande ngalikaghupa mo, nampili ngavaronde muliwiru, mo nganikavaghurumwita. ³ Nampili ngavavande kuwiru yandundu, nganivashana nakuvaghupako. Nampili avakavanda kushinko shalifuta ashi nashavamona, nkoko nganitapa marawiro kuliyoka ngalivashume. ⁴ Nampili ngavayende mughunkwati, okuno vavo vanankore vavo kunakuvashinga nakuvakarera kumeho, nkoko nko nganituma rufuro rukavadipaghe. Mantjo ghande ngaghakengera papavo mposhi nivadjonaghurepo kapishi nivaruwane ghuwa. ⁵ Hompa Karunga munankondo kukwata shirongo shasho kuyengumuka; navantje ovo vatungo mo kukara muligugho; navintje ngaviyimana yira mukuro, ntani ngavidama yira mukuro waEgipute. ⁶ Ghuye mudiki washilyatero shendi muliwiru, ntani mbyo atulitapo lirombe lyendi pantunda yalivhu. Ghuye kurenkita mema ghamulifuta, ghapoposhe pantunda yalivhu. Karunga munankondo ndyo lidina lyendi. ⁷ Kapishi nanwe nka munakara yira vantu vamuCush kukwande, anwe vaIsraeli? -Ovino mbyo anatokora Karunga munankondo. Nani kapi natunditire vaIsraeli mushirongo shaEgipute, ano vaFilistine muCrete, ano vaArameyeni vatunde muKir? ⁸ Kenga, mantjo ghaHoma Karunga munankondo kunakara pambara davanandjo, ntani ame nganivadjonaghurako kuntunda yalivhu, kapi nganirudjonaghura, ovi mo anavinkondopeke Hompa Karunga munankondo. ⁹ Kenga, ame nganitapa marawiro, ntani ame nganinyunganga varudi rwavaIsraeli mudimuhoko nadintje, yira momo vatjipanga ghuheke pakatjipa, mpo ngoli shi nampili liwe lyalididi lyashawera palivhu. Vantu vande navantje vavanandjo ngavafa kurufuro, ovo vanakughambo ashi ¹⁰ 'lidjonaghuro kapi ngalivakondera ndi kapi ngavagwanekera nalyo.' ¹¹ Muliyua olyo nganiyerura ntembeli yaDaviti oyo yawo, nakughayara dimufa dayo. Ame nganiwapukurura madjonaghuko ghayo, nakuyidikurura yira pamayua ghakare, ¹² mposhi ngavavhure kupinga ruha rwaEdomu, nadimuhoko nadintje odo vayita palidina lyande. Ovino mbyo anakughamba Karunga munankondo- ghuye kuviruwana vino. ¹³ Kenga, mayuva kunakuya, Hompa munankondo anakumanenenemo- pashirugho osho mupuruli ngapitakana muyanguli, ntani mumyoni mandjembere ngapitakana mukuni mbuto. Kundundu ngakushonya vhinyu yaghutovali, ntani vindundwena navintje navyo ngavipupa. ¹⁴ Nganikavyuta vantu vande vaIsraeli ovo vakaro mumango. Ngavatungurura mbara odo dadjonaghuko kumwe nakutunga mo, ngavatapeka mandjembere nakunwako vhinyu yako, ngavakara navipata nka ngavalya mo nyango yamo. ¹⁵ Ame nganivitapeka mushirongo shavo, makura kwato nka ogho ngaviduro mo mushirongo osho navapa,'' mo anakutanta Hompa Karunga wenu.