¹ Ovino mbyo aneghidire Hompa Karunga. Kwakengire shikumba shanyango yapakurombo! ² Karunga aghamba, ''Vinke ovyo ghuna kumona, Amosi?'' Anighamba, ''shikumba shanyango yapakurombo.'' Makura Karunga antantere, ''Ghuhura wambunga yande Israeli kuna Kuya; Kapi nganivatulira ntere makura. ³ Ntjumo damundjugho yaKarunga ngadikara ntjumo damalirankali muliyuvha olyo-ovino byo anatokora Hompa Karunga - vimpu vyavingi, ngavavivhukuma nkeheku! shiporepore!'' ⁴ Tegherera kuno, anwe mwalyatango vahutu nakutjida vanaruhepo mushirongo. ⁵ Vavo kuna kughamba, ''Ruvede munke ngakatundako kakwedi kakape, makura ngatuvhure kughulita mahangu shimpe? Ruvede munke ngalipwa liyuvha lyaSabata, makura ngatuvhure kughulita vilya? Atwe ngatuvhure kudidipita ntjetikito nakuyerura ndando, morwa atwe ngatukonge mukuruwanita shiviha shavimpempa. ⁶ Ovino makura atwe ngatughulite rukokotwa rwarudona, tughure vihepwa nasisiliveri, navahutu kurupando rwavicamakaku.'' ⁷ Karunga kwaghanine mukunenipita Yakobu, ''vyaghushiri ame kapi nganivhura kuvhurama nkehevino viruwana vyavo.'' ⁸ Nakuvhurashi ngoli shirongo shikinke morwa vino, navintje ngaviyeruka yira mukuro waNile, navyo ngavipupapupa nakudamuna shimpe nka, yira mukuro waEgipte. ⁹ Ngaviya muliyuva olyo - olino litokoro lyaHompa Karunga - ashi ame kurenkita liyuva litoke mutwe katji, nakurenka ghudjuni ghukare mumundema mwi mbarangandja. ¹⁰ Ame nganipirura vipito vyenu ngarukare ruguvo natjumo denu nadintje ngadikare malira nkali. Ame ngani renka namuvantje ngamudwate vyuma vyamalira-nkali nakukurura maparambamba nkehedino dimutwe ngani renka yira rugugho rwakuguvira mona ahuru, naliyuva lyakukora dogoro kughuhura. ¹¹ Kokenga, liyuva kuna kuya - Olino litokoro lyaHompa Karunga- opo nganituma lirumbu mushirongo, kapishi lirumbu lyamboroto ndikapishi lyalinota lyamema, ngoli lyakuyuvha nkango daKarunga. ¹² Vavo ngavarenda-renda kutundilira kulifuta vayende kulifuta; ngavaduka vatunde kughumboyera vayende kughupumeyuva mukushana nkango daKarunga, ngoli kapi ngavadiwana. ¹³ Muliyuva olyo vakadona vakukushuka navamatighona ngavafa kulinota. ¹⁴ Ovo ngavaghana mundjo yaSamariya nakughamba, 'Karunga ghoye ndi muyumi, Dani,' ntani, 'ndi ndjira yaBerisheba yikarerere,' vavo ngavawa kapi ngavarambuka nka.''