¹ Tegherera koyino nkango nakutapa yira rushumo rwaruguvo kwenu; mbunga yaIsraeli. ² Israeli wakukushuka anaghu; ghuye kapi ngarambuka nka; ghuye ngavamushuvilira palivhu lyendi kwato nka ghumwe ngamurambwito. ³ Vino mbyo anakughamba Karunga: ''Odo nkurumbara ngadirupuko naliyovi ngapahupa lifere, ntani odo ngadirupuko nalifere ngapahupa murongo tupu ngavahameno kuruha rwaIsraeli.'' ⁴ Vino mbyo anakughamba Karunga kumbunga daIsraeli: ''Ntjene me ngaghupare! ⁵ Washayenda ghushane Betheli; ndipo ghukangene Giligali; washayenda kuBeersheba. KwaGiligali kunakungena mughunkwati, ntani Betheli kapi ngakarapo nka. ⁶ Shana Karunga ntani ngaghupara, ndipo ghuye ngatumburuka yira mundiro ayende mushirongo shaJosefu. Ngavidongonoka, ntani kwato muntu ngahuparo mo muBetheli. ⁷ Ovo vantu vapirura veta yira mughudano nakuvukumina ghuhungami palivhu!'' ⁸ Karunga ashita ntungwedi nambunga dantungwedi dakuvembera; ghuye kupirura matiku akare mwi ndi ngurangura; ghuye kurenka liyuva litoke namatiku ntani kuyita mema ghalifuta; ghuye kurokita atunde kuwiru arokere palivhu. Karunga ndyo lidina lyendi! ⁹ Ghuye kuyititapo lidjonaghuko pawangu-wangu kuvaka nkondo mposhi lidjonaghuko kuya kuvapangeli. ¹⁰ Vavo vanyenga kehe ghuno wakuvavyukita mumankurumbara, ntani vavo kwanyenga ghunene wakughamba ghushiri. ¹¹ Mukondashi anwe kulyata vahepwe ntani kughupako maruha gharukokotwa rwendi- nampiri ngoli wadika ndjugho namawe, ove kapi ngaghutunga mo. Ove wakara navitondo vyakuyenga vyamandjembere, ngoli kapi ngaghunwa vhinyu yavyo. ¹² Mpo ame nayiva ndjo doye ntani ghunene wandjo doye- anwe mwanyandekango vantu, nakutambura mfuto yaghufeke, ntani anwe kufukilira vahepwe mumavero ghamunkurumbara denu. ¹³ Mpo ngoli ashi kuvantu ovo ngavavangararo vamwene pashirugho shino shashidona. ¹⁴ Shana ghuwa kapishi ghudona, mposhi ghuparuke. Ano Hompa, Karunga munankondo, ngakara nove, yira momo ghunavighamba. ¹⁵ Nyenga ghudona, hora ghuwa, turapo veta mumankurumbara, mposhi Hompa, Karunga munankondo, ngafera nkenda kulikoro lyaJosefu. ¹⁶ Mbyo ngoli, vino mbyo anakughamba Hompa, Karunga munankondo, Hompa, ''Ngamukakukema munkurumbara nadintje nakulira muvitarata navintje, 'Nane! Nane!' Ngavayita vandimi navantje vayalire vafe, ano vakashiliro ngavakukema. ¹⁷ Ngamukukema mushikunino shamandjembere, ame nganiyapita mukatji kenu,'' mo anakughamba Karunga. ¹⁸ Lihudi ghunene kwenu anwe mwahafero liyuva lyaKarunga! Kurulirankali nke liyuva lyaKarunga? Ngakukara mundema nka kwato shite, ¹⁹ ngavimoneka yira mukafumu anakuduko atjire vanyime mbyo anagwanekere nalikashama, ndipo ghuye ngangena mundjugho kumwe nakakutapa kuliyoka likamushume. ²⁰ Nani liyuva lyaKarunga kapi ngalikara lyamundema nakupira shite? Likurundema nakupira ghukenu nampiri kadidid? ²¹ ''Nanyenga, vyadjanyauka vipito vyenu vyamapuliro, kapi nawananga mo rufuro mumapongero ghenu. ²² Nampiri ngoli mwadjambanga ndjambo dakushwakerera na ndjambo darukokotwa, ame kapi nganiditambura, ntani nka kapi nganikenga kundjambo daghukareli na ndjambo yavimuna vyakuneta. ²³ Tunditenuko kwande muyoyo wantjumo denu; kapi nganitegherera mushagharo wamarumbendo ghenu. ²⁴ Palivango lyavyo, renkenu ghuvyuki ghupupe yira mema, naghuhungami ghupupe yira mema gharupupo. ²⁵ Wtjindjira likudjambero me ndi ndjambo mumburundu mwaka dimurongo ne, mbunga yavaIsraeli? ²⁶ Anwe mwayerura shishwi shaSikkuth, hompa wenu, naKaiwan, karunga wenu wamunene, ogho mwakuruwanena naghumwenu. ²⁷ Mpo ngoli shi ame nganimutjwaywira mushelimunya yaDamaskus,'' mo anakughamba Hompa, walidina Karunga mutulitipo wanavintje.