¹ Munahepa kumonena kukwande, Ame kuhonena kwa Kristusi. ² Ame kumufumadeka unene mukondashi anwe kumvhuruka muvininke navintje. Ame kumufumadeka mukondashi mwakwaterera marongo yira momunagha muronga. ³ Ngoli ame kuna shana mukwate lighano ashi Kristusi ndje mutwe wakehe uno mukafumu, ntani mukafumu ndje mutwe wa kehe uno mugholikadi ntani Karunga ndje mutwe wa Kristusi. ⁴ Kehe uno mukafumu ana kukanderero ndi ayuvhite nkango da Karunga uye kuna dwata likoli kumutwe wendi kushwaukita mutwe wendi, mutwe wendi Kristusi. ⁵ Kehe uno mukamali wa Kukanderera ndi wa kuyuvita nkango da Karunga ahana kudwata shituku kumutwe wendi, kushwaukita mutwe wendi, mukafumu. Vya ngoli kukufana tupu namukamali ogho vana kurura huki mumutwe. ⁶ Nkeneshi mukamuli kapi ana dwata shituku ku mutwe, ana hepa kuteta huki dendi difupipe. Ano ngoli nkeneshi kuyitira lishwaghu mukamali mukuteta huki dendi mukukurura mutwe, hasha adwate shituku kumutwe wendi. ⁷ Mukafumu nakudwatashi likoli kumutwe wendi, mukondashi uye ndje shishwi na uyerere wa Karunga. Ngoli mukamali kuneyeda lifumano lya mukafumu. ⁸ Mbyo ngoli shi mukafumu kapi atunda kurutu rwa mukamali. Nani ngoli mukamali kwa tunda kurutu rwa mukafumu. ⁹ Ntani mukafumu kapi vamuhungira ashi akare wa mukamali. Ngoli mukamali ndje vahungira morwa mukafumu. ¹⁰ Mpo ngoli ashi mukamali ana hepa kukara nashiyivito ya unankondo kumutwe wendi, mukonda yava Engeli. ¹¹ Enengoli, mumbunga Kriste ya Hompa, Kapi mwakara likugaunuko lya mukamali na mukafumu ndi mukafumu namukamali. ¹² Momu tupu vyakara ashi mukamali kwatunda mwa mukafumu, mukafumu naye mukamali amushampuruko. Ntani vininke navintje kutunda kwa Karunga. ¹³ Tokerenu naumwenu: Mukamali nkene akanderere kwa Karunga ahana shituku kumutwe, vya hungama ndi? ¹⁴ Nampili kuvishitwa kapi mwakurongerangako ashi mukafumu nkene akara nahuki dadire, kumuyitira lishwaghu ndi? ¹⁵ Ngoli vishitwa kumuronga ashi mukamali nkene akara nahuki dadire, kuyita lifumano kukwendi? Mpo ngoli ashi huki dadire kwadimupa ashi difike mutwe wendi. ¹⁶ Ngoli nkeneshi mpovali vanakukanano vino, atwe kapi twa karanka waro nankedi dapeke, ndi nampili mumbunga Kriste da Karunga momu. ¹⁷ Kuhamena kumapukururo ghano ghana kukwamoko, kapi nivhura kumupandayika. Opo mwayanga muponge kumwe, kapi mwaponganga mukare mu ukaro wauwa, ngoli mu ukaro wa udona. ¹⁸ Pamuhovo, nayuvha ashi opo mwayanga muponge kumwe mumbunga kriste mungereka, kwakaramo tumbungaghona. Kuruha rumwe name navipura. ¹⁹ Vya ushili mukatji kenu mwakara mbungaghona yakupira kulimburuka, mposhi valimburuki mukatji kenu vashoroke. ²⁰ Ngoli kapishi nkene munapongo kumwe, makura ashi murarero wa Hompa muna kulya. ²¹ Mbyovoshi opo mwalyanga, kehe uno kulya ndya damwene kumeho va unyendi valye ndya davo. Umwe po ndjara ano umwe po anakorwa. ²² Nani kapi mwakara namandi ghakulyera kumwe nakunwena mo ndi? Ndi anwe kushwaura mbunga Kriste ya Karunga na kufita ntjoni ovo vapiro ndya ndi? Vinke nuvhura kughamba kukwenu? kunahoro ashi nimupandayike ndi? Kapi nuvhura kumupandura kwa vino! ²³ Ovyo nawananga kwa Hompa mbyo natapanga kukwenu, Hompa Jesusi, matiku ogho vakamushuvire muliyome, kwa Upire mboroto. ²⁴ Atapa mpandu kwa vashe, ayi bamaura aghamba ashi,'' Ghupenu mulye oru ndo rutu rwande vana kumutapera. Munahepa kuruwana vino muvhurukirangepo.'' ²⁵ Mushi kwavo aghupu nkinda opo vamanine kulya, ayidamuna atapa mpandu kuvashe aghamba ashi, '' Nkinda yino ligwanekero lyalipe lya muhonde yande. Ruwanenu vino kehe pano opo muna kuyinwa, amu vhurukiripo ame.'' ²⁶ Mpo ngoli shi kehe pano muna kulya mboroto yino nakunwa ku nkinda yino, muna hepa kuyuvita mfa da Hompa dogoro nkoko ngakayera. ²⁷ Mpongolishi, kehe uno ana kulyo kumboroto ya Hompa ndi anwe munkinda ya Hompa pa nkedi yayidona uye kutura ndjo ya kudipaya rutu na honde ya Hompa. ²⁸ Muntu ahove kukukonakona mwene pamuhovo, ntani ana kulya kumboroto na kunwa nkinda yino. ²⁹ Mbyovyoshi, kehe uno ana kulyo nakunwa pankedi yayidona uye ahana kuhangura rutu rwa Hompa na ndya dakukukarera ogho kukulyera na kukunwena lipanguro lya mwene. ³⁰ Mbyo muna kara shingi shenu kwato nkondo ntani kuka kuvera-vera ntani vamwe vanarara vana fu ³¹ Nkene kukukona-kona naumwetu nawa-nawa ndi kapi katupangura nka waro. ³² Ngoli nkene tupu atupangura Hompa, olyo livyukito nakuwapukurura ukaro wetu, mposhi kapishi ngava katupangure kumwe na udjuni. ³³ Mpo ngoli shi vaunyande, nkene kuna kuponga kumwe muya lye, muna hepa kukutaterera-taterera. ³⁴ Ogho anakuyuvho ndjara alye kumundi, mposhi opo muyaponga kapishi muya kare mumpanguro. Ano vyakuhamena kuvininke ovyo mwatjanga, nganiya mupa ndjenditito davyo opo nganiya.