¹ Oyɔ emɛ éxé nɔ ehwɛ do emɛlɛ tɔn ɔ, o gɔ nyi inu lelekpokpoe can ɔ, iɖe kuku go wa itɔn e; ɖo gan éxé mɛ o nɔ ehwɛ do emɛlɛ tɔn, mɔ gɔnɔinu lokpo lɔ lɛ bayi ɖi emɛ lɔ lɛ ha ɔ, ehwɛ onɔ da na iɖe. ² Mi nyɔ ɛn fan Mawu da ehwɛ na emɛ éxé wanu etɔnɛ lɛ ɖikɛn esɛnlɔ mɔ lɔ ɛ ɖo ha. ³ Dahwe , oyɔ emɛ éxé nɔ ehwɛ da na emɛ éxé nɔ inu etɔnɛtɔn lɛ bayi tɔn ɔ, mɔ gɔɔnɔ inu watɔn ɖi emɛ enɛlɛ ha ɔ, wo yi lo ɖo fan Mawu la yi ehwɛ yi kɛ nɛ ? ⁴ Alo o yi lo ɖo fan eyɛ la kpego lo hu acɛ na odɔmɛ faa Mawu etɔn gɔdo hunkuku etɔn fe gɔdo odɔmɛ fifa gbo Mawu etɔn nɛ ? Alo ogo nyɔ fan odɔmɛ faa Mawu etɔn nɔ dɔn ɛn nɔ lo lɛkɔ ɖe ehwɛ itɔn lɛ godo e ? ⁵ O mɔ tlito ; ɖo o go gbesisɔ wa lo lɛkɔ ɖe i ehwɛ lɛ godo e; inu éxé wanu olonɔ yi todɔn gbo lohwlɛn ɖawan na iɖe, ɖe gbe éxé gbe Mawu la we ɖe ehwɛ jijɔ gɔdo xomɛsin etɔn xlɛ zɔn kojo ɖiɖo etɔn mɛ. ⁶ Ɖe gbe enɛ gbe ɔ, Mawu la su inu éxé emɛ lokpo lokpo wa e axɔ wii. ⁷ E la na egbɛ magɔn magɔn emɛ éxé hlɔn na inu mɛmɛyi wiwa, mɔnɔ susu gɔdo yɛyi fe gɔdo egbɛ za ninɔ din tɔn ɖekɛ tɔn etɔnɛ lɛɛ. ⁸ Vɔɔ, Mawu la sin xomɛ tawun do agla gufɔntɔ go, gbɛ e go setonu na xojɔxo lɔ e, e mɔ kpo na inu nyinylan wiwa lɛ ɖoɖo. ⁹ Emɛ éxé wa inu nyinylan lɛ tɛtɛ ela we se vivɛ, ema we mɔ xomɛsin , e ma bɛ ɖe Jwifu lɛ ji, e godo ɔ, emɛ éxé gi nyi Jwifu lɛ mɔ we bɔdego. ¹⁰ Eɖe etɔnɛ co Mawu la na Kafu , Yɛyi gɔdo Fifa wu emɛ éxé wa inu mɛmɛyi lɛ tɛtɛ. Ela na Jwifu lɛ tantɛn, emɛ exe go nyi Jwifu mɔ we zɔn ogɔ. ¹¹ Ɖo Mawu go ɖe mɛɖe dovo na mɛɖe e. ¹² Emɛ éxé go nyɔ esɛn éxé Mawu dona Jwifu lɛ, vɔ mɔ jɛ esɛn mɛ lɛ ɔ ela clɔn ɖe esɛn manyɔn etɔn mɛ; emɛ éxé nyɔ esɛn lɔ lɛ vɔ mɔ jɛ esɛn lɔ lɛ mɛ ɔ, ela yi esɛn lɔ lɛ lo ɖo kojo n'i. ¹³ Ɖo ego nyi emɛ éxé ɖoto mɔse esɛn lɛ gonɛ Mawu yi lo bayi ehwɛjijɔnɔ e; vɔɔ, emɛéxé bayi idɔn zɔn emɛ esɛnlɔ etɔn, mɔ yi esɛnlɔ dowalɔmɛ lɛeyɔ Mawu yi lo bayi ehwɛjijɔnɔ. ¹⁴ Nɛnyifan, Jwifu, inumaɖitɔlɛ éxé go nyɔ esɛnlɔ lɛ, jɛ inu wa do esɛn lɔ lɛ ji ɔ, e gɔ nɔ esɛn ma nyɔ can ɔ, e xlɛ fan eyɛlɛ nyɔ inu éxé gbɛtɔ la bayi alo inu éxé gbɛtɔ goɖo wa bayi e. ¹⁵ Enu wiwa ɖexlɛ fan ehwan kɛn gbɛtɔ ɖowa wanu zɔn esɛn ji do e ji lɛ mɛ. E ayimɛ susu fe mɔ ɖe klun fan xojɔxo nɛ; etɔnɛ ke , takun mɛ bubu etɔn lɛ fe mɔ do ehwɛ wi ɖe ganɖehwlɛn lɛ mɛ, e mɔ nɔ xlɛ eɖe lɛ ɖe ehwɛ unkɔ. ¹⁶ Inu éxé la jɔ ɖe gbe éxé gbe Mawu la zɔn Yesu Klisu ji , mɔ da ehwɛ na inu éxé gbɛtɔlɛ nɔ wawitɔn ɖe nugɔ nugɔ lɛ wenɛ, ɖikɛn Ewɛn Ɖagbɛ éxé mi nɔ jla lɔɖo ha. ¹⁷ Vɔ oyɔ, o fan eyɛnyi Jwifu , o mɔ ɖo jiɖiɖe do esɛn lɛ go , o mɔ yi Kafu zɔn MAWU itɔn go. ¹⁸ O nyɔinu éxé jlo Mawu lɛ, esɛn lɛ mɔ kplɔn ɛn fan nɔ jla iɖe ɖo na inu mɛmɛyi wiwa , mɔ ɖe olɔ sɛ ɖe inu nyinylan wiwa mɛ. ¹⁹ O mɔ iɖe lo mɔ emɛ éxé xlɛ imɔ mɛmɛyi wu okungbigbanɔlɛɛ, mɔ mɔ iɖe lo mɔ fan eyɛ nyi kinklɛn na emɛ éxé ɖe zuvlumɛ lɛ. ²⁰ O yi loɖo fan éxé kpɔn nu wu lulunɔ lɛ, gɔdo emɛ éxé go nyɔ inutilɛ, ɖo o kandeji fan eyɛ mɔ inu nyinyɔ adodowe gɔdo xojɔxo tete ɖe esɛnlɔ mɛ. ²¹ O yɔ emɛ éxé kplɔnnu emɛ lɛ ɔ, amu wutu o go kplɔn iɖe e? O lɔ na emɛlɛ fan mima jɛ ajo e, amu wutu oyɔ tete lo jɛ ajo? ²² Oyɔ emɛ éxé lɔ fan e go ɖa wa lɔ aga e le ɔ, amu wutu oyɔ tete gɔ lo lɔ aga? Oyɔ emɛ éxé gbɛ wan na yɛhwe lɛ ɔ, amu wutu o lo sɔn yɛhwexɔmɛ mɔ la fin inu éxé ɖe ixɔ lɔ mɛ lɛ. ²³ Oyɔ emɛ éxé juwɔ gɔdo kafu ɖo onyɔ Mawu esɛn wutu ɔ, o gɔ gbá esɛn lɔ, lo hɛn i nyikɔ deɖui. ²⁴ Ɖo xoma Mawu etɔn lɔ fan: "Miɛlɛ Jwifutɔ ena okɔta kpɔtwɛ lɛ lo lɔ ixo gugu do Mawugo ." ²⁵ Nɛnyifan o zɔn do esɛnlɔ ji ɔ, adagbigbo itɔn ɖo ale nɛ. Vɔɔ, nɛnyifan ogo zɔn do esɛn lɔ ji le ɔ, eɖeɖi o go gbo ada ha. ²⁶ Nɛnyifan emɛ éxé go gbo ada wa inu éxé esɛn lɔ lɔ lɛ ɔ, Mawu go na mɔ ɛn lo mɔ emɛ éxé gbo ada? ²⁷ E mɛ éxé go gbo ada e, vɔ mɔ wanu do esɛn lɛ ji ɔ, la da ehwɛ na oyɔ Jwifu éxé gbo ada; mɔ ɖo esɛn xoma lɔ, vɔ go wanu éxé ɖe esɛn xoma lɔ mɛ lɛ e. ²⁸ Ɖe xojɔxo mɛ ɔ, emɛ éxé nyi Jwifutɔ tete lɛ gonɛ nyi emɛ éxé nyí ɖe okuntakun lɛ e; e go nyi emɛ éxé e gbo ada na ɖe agbaza mɛ lɛ e. ²⁹ Vɔɔ, emɛ éxé nyi Jwifutɔ tete lɛ enyi emɛ éxé nyi Jwifu ɖe kaka e ji lɛ mɛ gbɔn, emɛ éxé gbo ada ɖe jimɛ. Ada gbigbo enɛ ɔ gbigbɔ Mawu etɔn egbo na emɛ; inu éxé e wlan do esɛn xoma mɛ lɛ gonɛ gbo na emɛ e. Jwifu tete nyinyi enɛ ɔ, gbɛtɔ gonɛ kafu wi e; vɔɔ, Mawu e kafu wi.