¹ La jlɛ mi nɔvi éxe e ylɔ fan Fwebee, ogunmɛdada enyi ɖe Klisu e ogun éxe ɖe Sanklé lɔ ji, ² mimɔ lo yi ganjí mɔ wlibo ni ɖe Mawu osintɔ e nyikɔ mɛ, ɖikɛn emɛɖedovo Mawu etɔn la bayi ɖo ɖe eɖelɛ cɛncɛn ha; mi dolɔ wi ɖe inu éxe kɔn ela ɖo mi hudo ɖe lɛ tɛtɛ. Eyɔ fe mɔ dolɔ emɛ susu, emɛ tantɛn edolɔɔ inyɔ tete nɛ. ³ Mi dogbe na Plisílu gɔdo Akilasi na; inyɔ gɔde ewadɔn na Klisu Yesu. ⁴ Emɛ enɛlɛ ɔ, vile ekpo emɔ yi egbɛ lo savɔ do un takun; vɔ inyɔ lokponɔ gonɛ nyɔ inu mɛmɛyi enɛ éxé e wa lɔ e; Klisusɛntɔ éxé go nyi Jwifu lɛ fe e ogun mɔkunnu do inu mɛmɛyi etɔn enɛ lɔ go. ⁵ Mi dogbe na ogun éxé ebɔ ɖe e osinmɛ lɔ fe na. Mi dogbe na un hwannyi Epenɛ́ti éxé nyi emɛ tantɛn éxe ɖo inuɖiɖi na Klisu Yesu ɖe Azíi e tomɛ na. ⁶ Mi dogbe wu Mali éxe jɛ tagba tawun do mi takun na. ⁷ Mi dogbe wu Adlonícusi gɔdo Junuyasi na; nyɔ gɔde enyi okɔta lokpo, mi mɔ nɔ gankpamɛ do kpoɛ. Gbɛtɔ okunɖeji enyi ɖe emɛyiloxlan lɛ mɛ. E mɔnɔ sɛn Klisu feto inyɔ lowe tɔ eji. ⁸ Mi dogbe wu Anpliatúsi éxe nyi un emɛvivɛ zɔn ikpoɛ éxé nyɔ gɔdi miɖe ɖe osintɔ Yesu mɛ wutu. ⁹ Mi dogbe wu Wibɛ́ɛn éxé gɔ mi enɔ wa idɔn do kpoɛ na osintɔ Klisu lɔ na; mimɔ dogbe wu emɛvivɛ untɔn Sitaxisi na. ¹⁰ Mi dogbe wu Apɛlu éxé ɖe nuɖiɖi etɔn xlɛ Klisu na. Mi dogbe emɛ éxe ɖe Alisitobú e sinmɛ lɛ tɛtɛ na. ¹¹ Mi dogbe wu Elódiɔ́n na, okɔta lokpo lɔ ewa inyɔ gɔdi. Mi dogbe wu emɛ éxé ɖe Naasísi osinmɛ, mɔ ɖo nuɖiɖi na Klisu osintɔ mitɔn lɛ tɛtɛ. ¹² Mi dogbe wu Tlifɛnu gɔdo Tlifósu éxe nɔ wa idɔn na osintɔ Yesu Klisu lɛ na. Mi dogbe wu emɛvivɛ untɔn Pɛsízi éxe wa idɔn tawun na osintɔ Yesu. ¹³ Mi dogbe wu Hlufusi éxe nyi emɛ osintɔ Yesu mɔ can lɔ na; mimɔ dogbe wu enɔéxé nyi inu na nyɔfe. ¹⁴ Mi dogbe wu Asɛnklítí, Flegɔ́ɔn, Ɛɛmɛsi, Patlɔbási, Ɛɛmasi; mimɔ dogbe wu nɔvi ɖe lɛ éxé ɖe kpoɛ gɔde lɛ tɛtɛ na. ¹⁵ Mi dogbe wu Filolɔgu gɔdo Juli na, mi dogbe wu Nɛlée gɔdo enɔvi nyɔsi lɔ na, mimɔ dogbe wu Olɛ́npási gɔdo emɛɖedovo Mawu etɔn éxé ɖe kpoɛ gɔ mi lɛ tɛtɛ. ¹⁶ Mikisi nɔvi nɔvi tɔn lo dogbe na miɖe lɛ; Yesu Klisu e ogun lɔ tɛtɛ do gbe loxlan mimɛ tɛtɛ. ¹⁷ Nɔvi lɛ, nɔ ɖe kuku na mi fan ami cɔ miɖe do gbɛtɔ éxé do kinklan emɛmɛ lɛ go. Inu éxe elɔlɛ tɔnvo na inukpinkplɔn éxé mi yi lɛ, emɔnyi ofɔklɛn na mi; mi lɛkɔ ɖe godo nɛ. ¹⁸ Ɖo gbɛtɔ olɔkpa enɛlɛ go nɔ wa idɔn ti na osintɔ Yesu Klisu e; vɔ, odɔ eylɛtelɛ etɔn enɔ wa idɔn na. Elɔxo vivilɛ, emɔlɔ emɛklɔɖu xo lɛ lo flu susu na odɔmɛ faa nɔ lɛ. ¹⁹ Gbɛtɔ tɛtɛ enyɔɛn fan mi se tonu na Mawu; emɔna mɔmɔ jijwɛ do migo; coɔ i jlo fan inu nyinyɔni su mitawun, enɛɔ mi mɔ nɔ wa inu mɛmɛyi; i jlo fan ami nɔ kinkɔn ji, mɔsi na inu nyinylan. ²⁰ Zanle tin ɔ Mawu éxe na fifa emɛ lɔ la kutu lɛgba do mi ofɔlɛ go. Majɛna mi osintɔ Yesu Klisu etɔn ni nɔ gɔdo mi. ²¹ Timɔte, odɔn hagbɛ untɔn dogbe loxlan mi, etɔnɛ ke Lusiwisi, Jazɔ́ɔn gɔdo Sosipatlɔsi fe dogbe loxlan mi. ²² Inyɔ Tɛtiwúsi éxe nɔ wlan xoma lɔ na Pɔlu fe nɔ do igbe loxlan mi zɔn kancica lokpo éxé mɛ miɖe gɔdo osintɔ Yesu Klisu lɔ mɛ. ²³ Gayiwusi éxé yi inyɔ Pɔludo esinmɛ, sin exemɛ ogunlɔ tɛtɛ webɔ ɖe lo dogbe loxlan mi. Elasíti éxe hɛntoxwa ɖaka gɔdo mi nɔvi Kaatúsi dogbe loxlan mi. ²⁴ Majɛna mi osintɔ Yesu Klisu etɔn ninɔ gɔdo mɛ tɛtɛ. Amǐ ! ²⁵ Mi na ami kafuu Mawu ! Acɛ ɖesi ema bayi amilo do igan ɖe inuɖiɖi mitɔn mɛ, ɖikɛn ewɛnɖagbɛ untɔn éxé nɔ jla lɔ mɔ lɔ ɖoha, ɖikɛn wɛnɖagbɛ éxé lɔxo do Yesu Klisu go mɔnɔ jla lɔ lɔ ɖo, ɖikɛn inu nyinyɔ éxe mimɔ yi zɔn inu hwihwla Mawu etɔn mɛ. Inuhwihwla enɛ lɔ mɔɖe bibɛmɛ xoxo. ²⁶ Vɔ, tɛn ɔ, xoma éxe xoyilɔ ɖawantɔ Mawu etɔn lɛwlan lɛ ɖe inuhwihwla enɛ lɛ jɛ agbawungba. Ɖikɛn Mawu magɔn magɔn tete na gbe ɖo ha ɔ, eɖe inuhwihwla enɛ yixlɛ okɔtalɛ tɛtɛ, nɛ lo ɖo nuɖiɖi, mɔ se tonu. ²⁷ Mawu inunyɔtɔ lokpo éxe ɖe lɔ, kafu ni gbɔn lo zɔn Yesu Klisu ji. Amǐ !